ရေဝ်၊ မာတ် ၁၃
တွဵုရးဍုၚ်မန် ပွိုၚ်ဍုၚ်ရေဝ် ကောန်ပၞာန်ပျဳတုသေတ် ဒၟံၚ်ကွာန်တံၚ်ပြၚ် ဥူတာန်သဵုဝွံ ပ္ဍဲဂိတုမာတ် ၁၁ အခိၚ်ဗ္တံ ၜိုတ် ၁၁ နာဍဳဂှ် ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်တုဲ ချိုတ်အာလဝ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဥူတာန်သဵု ကောန်ပၞာန်ပျဳတုသေတ် အာယုက် ၅၄ သၞာံ အခိၚ်နွံဒၟံၚ်ပ္ဍဲသ္ၚိဂှ် ဂကောံရပ်လွဟ်မွဲဂကောံ ခ္ဍံက်တြၚ်ဂတမုက်သ္ၚိတုဲ ကၠုၚ်ကော်ယၟုညးဂှ်ရ အဃောဂ္စါန်ဂြိပ် နူကဵုလက္ကရဴသ္ၚိဂှ် ဒးဒုၚ်ပန်ဂစိုတ်လဝ် ကဵုသေနာတ်ရ။
ဟိုတ်နူဒးဒုၚ်ပန်ဂစိုတ်လဝ်ကဵုသေနာတ်တုဲ ဥူတာန်သဵုဝွံ ပ္ဍဲကဵုခၟၚ်၊ သြိုဟ်တံဂှ် ဒးမကမ်ကလိဂွံဝပ် ၃ လစုတ်တုဲ ချိုတ်အာလဝ် ပ္ဍဲဒၞါဲဒှ်ပရူဂှ်ရ။
အတိုၚ်ဂလာန်ညးဒေသတံဂှ်မ္ဂး ဥူတာန်သဵု ကောန်ပၞာန်ပျဳတုသေတ်ဂှ်ဝွံ ဒှ်ညးကံက်ကဵုဒၟံၚ်အခေါန် သွက်ဌာနက္ဍိုက်ပ်ကမၠောန်တမ္ၚာဂှ် ဂွံတီကေတ်ရ။
ပ္ဍဲကဵုအကံက်ထလဳဂရာမ် ရဲထံက်ဂလာန်ဒပ်ပၞာန်တံဂှ် ဥူတာန်သဵုဝွံ ဒှ်ကောန်ပၞာန်ပျဳတုသေတ်တြေံမွဲတၠရဂှ်ကီု ပ္ဍဲကဵုလၟေၚ်ဒဒှ်ဒးချိုတ်အာဂှ် ဟိုတ်နူအကာဲအရာပရေၚ်ဂီုကၠီုတုဲ ကောန်ဒပ်ကံၚ်ဇြဳပၞာန်တံ ဟွံဂွံအာစိုပ်စၟဳတ်လဝ်ပုဟ်ဂှ် သ္ဂးရ။
ဥူတာန်သဵု ကောန်ပၞာန်ပျဳတုသေတ်ဂှ် ဂကောံလဵုပန်လဝ်ရောဟီုဂှ် ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ် ဟွံဂွံဆဵုကေတ်ဏီရ။
တုဲကၠုၚ် ပ္ဍဲဂိတုဖေဖဝ်ဝါရဳ ၇ တေံဂှ်လေဝ် သၞေဟ်ကၚ်စၟဳတ်ပၞာန်ပျဳတုသေတ် တၞုၚ်ကွာန်ယှိုဲပျဳတာ ပွိုၚ်ဍုၚ်ရေဝ် ဒးဒုၚ်ပန်ပှော်လဝ်တုဲ ကောန်ပၞာန်ပျဳတုသေတ်မွဲတၠ ချိုတ်အာလဝ်ဏီရ။
ပရိုၚ်−သြၚ်လောန်တိုၚ်(မ်)
ဗီု−CJ