လှာဒကှ်၊ မာတ် ၁၃
ပ္ဍဲဒေသလှာဒကှ် တွဵုရးကရေၚ် ညံၚ်ဟွံဂွံကၠောန်သ္ပပေါဲသ္ဘၚ်ဂှ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ပ္တိတ်လဝ်လိက်ရ။
နကဵုစၟတ်တ္ၚဲ ဂိတုမာတ် ၁၀ ဂှ် ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP-AD ဒေသလှာဒကှ်၊ ရုၚ်ဒေသလၟိဟ် (၁) လလောၚ်ပ္တိတ်ကၠုၚ် လိက်လလောၚ်ပၟိၚ် ခမဳသၚ်၊ မိမညးဍုၚ်ကွာန် ကေုာံ ဂကောံအုပ်ဓုပ်ကွာန် အပ္ဍဲဒေသတံ သ္ဂောံဒ္ဂေတ်ဗက်ကၠောန်ၜိုတ်အာတံဂှ်ရ။
အတိုၚ်လိက်လလောၚ်ပၟိၚ်ဂှ်မ္ဂး စနူဂိတုမာတ် ၁၀ တုဲ ဗဒှ်ပေါဲသ္ဘၚ်ဂဳတ (အငြိမ့်) တံဂှ် ဟွံကဵုအခေါၚ် ကၟာတ်အာပိုတ်တ်ဏောၚ်တုဲ ပေါဲထပိုယ်ခမဳ၊ ပေါဲမ္ၚဵုထပ်တဲ၊ ပေါဲစဝ်ကပေါဝ်၊ ပေါဲလှ်ေကလော် ပေါဲပ္တိုန်ဂုဏ်စရာဲနာနာတံဂှ် ကဵုအာအခေါၚ်ပံက်စက်သၠဲရမျာၚ် နူဂယး ၆ နာဍဳ စဵုစိုပ်သဝ်တ္ၚဲ ၈ နာဍဳ မဒှ်ရ။
ညးဍုၚ်ကွာန်မန်တံဂှ် ရဲဒုၚ်တဲ လ္တူလိက်လလောၚ်ပၟိၚ် ဗော်ဍုၚ်မန်တၟိ AD ဂှ်လေဝ် နွံတုဲ လ္ၚဵုတံဂှ် ပ္ဍဲဒေသမန်ဂှ်လေဝ် ထေက်ကဵုဒးပ္တိတ် အမိၚ်သာ်ဏံကီုဂှ် ဟီုဂးဒၟံၚ် လ္တူသဵုယှေဝ်မဳဒဳယျာတံအိုတ်ရ။
ညးဒေသမွဲတၠဂှ် အခိၚ်လၟုဟ် ပ္ဍဲကၟိန်ဍုၚ် ပရေၚ်ဍုၚ်ကွာန်ဟွံညိၚ်ဝတ်က္တဵုဒှ်ဒၟံၚ်တုဲ ပေါဲသ္ဘၚ်တံ ဟွံမွဲဂှ် ခိုဟ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“အကာဲအရာလၟုဟ်ဂှ်တှ်ေ ဟွံကၠောန်ၜိုတ် အရာတံဏံ ခိုဟ်ရဏောၚ်။ ပေါဲသ္ဘၚ်ဟွံမွဲဂှ်တှ်ေ သာခိုဟ်ဏောၚ်ဂှ် ညာတ်ရ။ မုဟိုတ်ရောဟီုတှ်ေ ပ္ဍဲကၟိန်ဍုၚ် ပရေၚ်ဍုၚ်ကွာန်ဟွံညိၚ်ဝတ်က္တဵုဒှ်ဒၟံၚ်တုဲ ပေါဲသ္ဘၚ်တံဏံ ဟွံမွဲဂှ် ဒးရးဒၟံၚ်ရ” သာ်ဝွံ သ္ဂးရ။
ညးဒေသ လ္တူပွိုၚ်ဍုၚ်ရေဝ်မွဲတၠဂှ်လေဝ် ပ္ဍဲကဵုလ္ပာ်ပွိုၚ်ဍုၚ်ညးတံလေဝ် ယဝ်ရကၟာတ်ပေါဲသ္ဘၚ်တံကီုမ္ဂး စိုပ်တရဴဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍာံဍာံဂှ် ဒးချပ်မွဲဂှ်တှ်ေ လ္ပာ်ပွိုၚ်ဍုၚ်ရေဝ် ယဝ်ကၠောန်တှ်ေ စိုပ်တရဴဏောၚ်ဂှ် အဲညာတ်ရ။ ဟိုတ်သာ်လဵုရောဟီုတှ်ေ ဟိုတ်နူအကာဲအရာပရေၚ်ဍုၚ်ကွာန်ဟွံခိုဟ်တုဲ ကၟာတ်ထောံဂှ် ခိုဟ်ဒၟံၚ်ရ။ ပိုယ်တံ ဒုၚ်တဲမာန်ဒၟံၚ်” သာ်ဝွံ သ္ဂးရ။
ပွိုၚ်ဍုၚ်ရေဝ်ဝွံ ဒှ်ဒေသဂကောံပၠန်ဂတးရပ်လွဟ် ဒစဵုဒစးတၠအဝဵုပၞာန်တံ ဇြဟတ်ခိုဟ်မွဲတုဲ လ္ပာ်ဗော်ဍုၚ်မန်တၟိ AD ဂှ်လေဝ် အပ္ဍဲတ္ၚဲအကြာတံဏံ ကရောၚ်ပၞာန် ဇြဟတ်နွံ အကြာ ၁၀၀ ကဵု ၂၀၀ မွဲ လုပ်စိုပ်ချဳဒရာၚ်လဝ် ပ္ဍဲဍုၚ်ရေဝ်မွဲဒၞါဲကီုရ။
ပ္ဍဲကဵုလိက်လလောၚ်ပၟိၚ် ဗော်ဍုၚ်မန်တၟိ AD ဂှ် ဒဵုကဵုအခိၚ်ဗၞတ်ၜိုတ်လဵု ကၟာတ်လဒဵုအာ ပေါဲသ္ဘၚ်တံဏောၚ်ဟီုဂှ် ဟွံထ္မံက်ထ္ၜးလဝ်တုဲ ဟွံဒ္ဂေတ်ဗက်မ္ဂး ကေတ်အရေဝ်သာ်လဵုဏောၚ်ဟီုဂှ်လေဝ် ထ္မံက်ထ္ၜးလဝ် ဟွံမွဲရ။
မွဲလ္ပာ်ဂှ်ပၠန် ညးဒ္ဂေတ်ဗက်အမိၚ်ဂမၠိုၚ်ဝွံ ဟိုတ်နူစၞောန်လဝ် ညးမတန်တဴ အပ္ဍဲဒေသလှာဒကှ်တံဂှ်တုဲ မိက်ဂွံသ္ဂး ကွာန်မန် မဒှ်တိဍာ်ထိၚ်ဒဝ် NMSP-AD တံဏောၚ်ဂှ် ချိၚ်ခယျကေတ်ရ။
နကဵုသြၚ်လောန်တိုၚ်(မ်) စပ်ကဵုလလောၚ်ပၟိၚ် NMSP-AD ဂှ်တုဲ ဂွံထပ်တီကေတ်မာန်ကီု ပ္ဍဲဒေသမန်ဂှ်လေဝ် လလောၚ်ပၟိၚ်လအာတုပ်သာ်ဏံ ဂွံလလောၚ်ပၟိၚ်အာနွံဟွံမွဲဂှ် ဆက်စၠောံလဝ် ဇရေၚ်ညးမၞုံအခေါၚ်ဟီုဂးဗော် နာဲဗညာမန်ကီုလေဝ် လလောၚ်လဝ်ပရိုၚ်ဂှ် ဟွံမွဲရ။
ညးဒေသမန်မွဲတၠဂှ် နကဵုညးဍုၚ်ကွာန်မန်တံ ယဝ်ဟွံဒ္ဂေတ်ဗက် တၚ်စၞောန်ဂကောံရပ်လွဟ်မွဲမွဲမ္ဂး ညးဍုၚ်ကွာန်တံရ ဒးဂိတုဲ ဗီုပြၚ်ကဵုဇြဟတ်ဂရိုဟ်ဟွံသေၚ် ယဝ်အာ နကဵုဗီုပြၚ်စန်ဒက်ကေတ်မ္ဂး သာခိုဟ်ဏောၚ်ဂှ် ထံက်ထ္ၜးလဝ်ရ။
“ညးဍုၚ်ကွာန်တံဟီုဂှ် ယဝ်ဟွံဒ္ဂေတ်ဗက် တၚ်စၞောန်ဂကောံရပ်လွဟ်မွဲမွဲတံဂှ်ဟီုမ္ဂး ညးဍုၚ်ကွာန်တံရ ဒးဂိဏောၚ်။ ဂကောံလဵုဒှ်ဒှ် ညအ်လ္ပကၠောန်တှ်ေ လ္ပကၠောန်ဂှ်ရ ဗၠးဘဲဏောၚ်။ ညးဍုၚ်ကွာန်တံဂှ် လွဟ်မှဟွံမွဲပုဟ်။ ဂကောံလွဟ်လက်နက်နွံမွဲမွဲတံ ဟီုမ္ဂး ဟွံမိက်ကလၚ်လေဝ် ဒးကလၚ်ရဏောၚ်။ အဓိကဂှ် ဗီုပြၚ်ကဵုဇြဟတ်ဂရိုဟ် ညးဍုၚ်ကွာန်တံ ဟွံသေၚ်တုဲ အာနကဵုဗီုပြၚ်စန်ဒက်တံမ္ဂး သာတုဲခိုဟ်ရ။ လ္ပကၠောန်ညအ် ယဝ်ကၠောန်တှ်ေ မုဒှ်အာဏောၚ် လ္တူနူဘပဠသာ်ဏံဂှ် စန်ဒက်ဂှ်တှ်ေ သာတုဲခိုဟ်ဏောၚ်ဂှ် အဲညာတ်ရ” သာ်ဝွံ သ္ဂးရ။
ဗော်ဍုၚ်မန်တၟိ AD ဂှ်ဝွံ တုဲကၠုၚ်ပ္ဍဲဂိတုဖေဖဝ်ဝါရဳ ၁၄ တေံ ပံၚ်တောဲကဵုဇြဟတ်ပၠန်ဂတးက္ညၚ်၊ ဂကောံပၠန်ဂတးကောန်ဍုၚ်အရၚ် လုပ်ဒၟံၚ်ပေါဲဗ္တိုက် ဒစဵုဒစးဒၟံၚ် ကုကံၚ်ဇြဳပၞာန်တံဂှ်တုဲ ဗ္တိုက်အာဒပ်ပၞာန်သီအဝဵုဏောၚ်ဂှ် လလောၚ်တြးလဝ်ရ။
ပ္ဍဲဂိတုမာတ်မံက်ဂှ် ရပ်ဒက်က္ဍိုပ်သ္ကိုပ်ပၞာန်ပျဳတုသေတ် သၟဝ်တဲကံၚ်ဇြဳပၞာန် ပ္ဍဲကွာန် ပွိုၚ်ဍုၚ်မုဟ်ဍုၚ်၊ တွဵုရးဍုၚ်မန်ဂှ်တုဲ ပရိုၚ်သီဂွံလဝ် လွဟ်လက်နက်မကမ်တံဂှ်လေဝ် မံက်တိတ်လဝ်ကီုရ။
ဆ္ဂး ကြဴနူလလောၚ်တြး ဗ္တိုက်သရိုဟ်အာ ဒပ်ပၞာန်သီအဝဵုဏောၚ်တုဲ စဵုကဵုဂွံမွဲဂိတု ပ္ဍဲတိဍာ်ချဳဒရာၚ် မၞုံအပ္ဍဲဒေသမန် NMSP-AD မပ္တံကဵုပွိုၚ်ဍုၚ်ကျာ်မြဟ်၊ မုဟ်ဍုၚ်၊ ဇြပ်ဗု ကေုာံ ပွိုၚ်ဍုၚ်ရေဝ်တံဂှ် ထ္မံက်လဝ်ပေါဲဗ္တိုက်ဂှ် ဟွံဂွံဆဵုကေတ်ဏီရ။
ပ္ဍဲကဵုဂကောံက္ဍိုက်ပ်ပရေၚ်ပၞာန် ပရေၚ်ဍုၚ်ကွာန် ဗော်ဍုၚ်မန်တၟိ AD ဂှ် ပ္ဍဲဂိတုမာတ် ၁ ဂှ် ကရောံက္ဍိုပ်သ္ကိုပ်ဂကောံ နာဲဇဲယ၊ ဒုက္ဍိုပ်သ္ကိုပ်−၁ နာဲဗညာလဴ၊ ဒုက္ဍိုပ်သ္ကိုပ်−၂ နာဲလျးဂကူတံဂှ် ဒက်ပ္တန်လဝ် ကောန်ဂကောံ စဵုကဵု ၁၂ တၠရ။
ပရိုၚ်−သြၚ်လောန်တိုၚ်(မ်)
ဗီု−CJ