ဗြဝတဳ၊ မာတ် ၁၄
ပေါဲဗ္တိုက်ပ္ဍဲကွာန်တေန်ဂါန်ညဳနံၚ် ပွိုၚ်ဍုၚ်ဗြဝတဳ တွဵုရးကရေၚ် ဆက်သ္ကာတ်မြဟ်ဒၟံၚ်တုဲ လ္ပာ်ကံၚ်ဇြဳပၞာန် ထပ်ထောံမခတိုဟ် ဗ္တိုက်ဒၟံၚ်နကဵုပၞာန်ကျာတံဂှ် ဂွံတီကေတ် အတိုၚ်ဂလာန် ညးဒေသတံရ။
ပေါဲဗ္တိုက်တေန်ဂါန်ညဳနံၚ် စက္တဵုဒှ်တုဲ ဂွံပွိုၚ်မွဲသတ္တာဟ ပ္ဍဲဂိတုမာတ် ၁၃ အခိၚ်နူဂယးဂှ် ပ္ဍဲကဵုလ္ပာ်ဂၠံၚ်ပါ် ကွာန်(ဝှေ့ရှမ်း) တေန်ဂါန်ညဳနံၚ်ဂှ် ပေါဲဗ္တိုက်ၜါလ္ပာ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံပၠန်ဂတးတံ ဆက်က္တဵုဒှ်ဒၟံၚ်ရ။
ပေါဲဗ္တိုက်က္တဵုဒှ်ဒၟံၚ် တ္ၚဲဏံ အခိၚ်တ္ၚဲစေၚ် ၜိုတ် ၂ နာဍဳဂှ် ဒပ်ကံၚ်ဇြဳပၞာန် ဗ္တိုက်ထောံဏာမခတိုဟ် နကဵုက္ၜၚ်ကျာ ကုကုန်ဒဵုလက်ခတ် ဗ္ဒါဲဍုၚ်ဗြဝတဳဂှ်တုဲ ပၟတ်တူဒၟံၚ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုမာတ် ၁၁ အခိၚ်နူဂယးပြဟ် ဒပ်ကံၚ်ဇြဳပၞာန် ပန်ပှော်လဝ်လွဟ်ဇၞော် ကုန်ဒဵုလက်ခတ်တုဲ သီုကၠုၚ်ထောံလဝ်မခတိုဟ် ကဵုက္ၜၚ်ကျာတုဲ ပ္ဍဲဂိတုမာတ် ၁၃ အခိၚ်တ္ၚဲစေၚ်ဂှ်လေဝ် ထပ်ထောံဏာလဝ်မခတိုဟ် နကဵုက္ၜၚ်ကျာပၠန်ရ။
ဟိုတ်နူပရေၚ်ဗ္တိုက်ထောံမခတိုဟ် နကဵုက္ၜၚ်ကျာဂှ်တုဲ လ္တူကုန်ဒဵုလက်ခတ်ဂှ် ပၟတ်တူဒၟံၚ်တုဲ ပရေၚ်ဇီုကပိုက်ဂှ်တှ်ေ ဟွံဂွံတီကေတ်ဏီပုဟ်ဂှ် ညးဒေသတံ ဟီုရ။
ကုန်ဒဵုလက်ခတ်ဂှ် အပ္ဍဲဂိတုဂျူလာၚ် သၞာံတုဲကၠုၚ်တေံ ဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ် ဇရေၚ်ဒပ်ကံၚ်ဇြဳပၞာန်တုဲ လ္ဂောံကဵုဗျူဟာပရေၚ်ပၞာန်လေဝ် ဒှ်ဒၞါဲပၟိက်ဇၞော်မွဲရ။
ပေါဲဗ္တိုက်တေန်ဂါန်ညဳနံၚ် ဗ္ဒါဲဍုၚ်ဗြဝတဳ လအ်ကၠုၚ်ပွိုၚ်မွဲသတ္တာဟဂှ် ဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ် ဗ္ဒိုပ်ဒပ်ဖလူ၊ ဗ္ဒိုပ်ဗၠာဲသၟိၚ်တိဍာ်၊ တမ်ဒပ်ကံၚ်ဇြဳပၞာန် ခမရ ၃၅၅ တံရ။
ဌာန်ဂအုပ်တမ်ဒပ် ကေုာံ ကုန်ဗျူဟာကံၚ်ဇြဳပၞာန် သှ်ေဒၟံၚ် အပ္ဍဲကွာန်တေန်ဂါန်ညဳနံၚ်တံဂှ် ဒပ်ပံၚ်ကောံပၠန်ဂတး KNLA တံ ဆက်ထ္ပက်ပၞာန်ဗ္တိုက်ဒၟံၚ်တုဲ လ္ပာ်ကံၚ်ဇြဳပၞာန်ဂှ်လေဝ် ထပ်ဗပေၚ်ဒၟံၚ်ဇြဟတ်တုဲ ပရေၚ်ပန်ပှော်နကဵုလွဟ်ဇၞော် ကေုာံ က္ၜၚ်ကျာတံဂှ်လေဝ် ဆက်ဗ္တိုက်ဒၟံၚ်ဂှ် ဂွံတီကေတ်ရ။
ဟိုတ်နူပေါဲဗ္တိုက်တေန်ဂါန်ညဳနံၚ်တုဲ ညးဒေသဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ်တုဲ ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန် အပ္ဍဲပေါဲဗ္တိုက်ဂှ်တုဲ ကောန်အရာပ်ဟွံအောန်နူကဵု ၄ တၠ ချိုတ်တုဲ ၁၀ တၠ ပြၚ် ကလိဂွံလဝ်ဝပ်ဂှ် ဂွံတီကေတ် နူကဵုညးရေၚ်တၠုၚ်ပရေၚ်ရီုဗၚ်ဟံၚ်ပြာ်တံရ။
ပရိုၚ်−သြၚ်လောန်တိုၚ်(မ်)
ဗီု−Cobra Column