တၞၚ်သဳ၊ မာတ် ၁၄
ပ္ဍဲရးတၞၚ်သဳ အပ္ဍဲဂိတုဖေဖဝ်ဝါရဳတုဲကၠုၚ် ပွိုၚ်မွဲဂိတုတေံ ဟိုတ်နူဒပ်ကံၚ်ဇြဳပၞာန်ရပ်ဒပ် ထ္ၜးဟိုတ်နာနာတံဂှ်တုဲ ကောန်အရာပ် ဗ္ဒါဲ ၂၄၀ ဒးဒုၚ်ရပ်လဝ်ဂှ် ဂွံတီကေတ် အတိုၚ်တၚ်လလောၚ်တြး ဂကောံသုတေသန FE5 Tanintharyi ရ။
ပ္ဍဲကဵုညးဒးဒုၚ်ရပ်ဒက်တံဂှ် နူကဵုပွိုၚ်ဍုၚ်ထဝါဲ၊ တယိတ်ချံၚ်၊ လံၚ်လုၚ် ကေုာံ ပွိုၚ်ဍုၚ်ဍာ်ဗုဂှ် ၂၂၂ တၠ၊ ပွိုၚ်ဍုၚ်ဗိက်ဂှ် ၇ တၠ၊ ပွိုၚ်ဍုၚ်ကအ်သံၚ်ဂှ် ၆ တၠ၊ အပံၚ်ဖအိုတ် ၂၃၅ တၠ ဒးဒုၚ်ရပ်လဝ်ရ။
ညးဒးဒုၚ်ရပ်ဂမၠိုၚ်ဝွံ အခိၚ်ဒပ်ကံၚ်ဇြဳပၞာန် ထ္ပက်ကရောၚ်ပၞာန်ဂှ် ရပ်ဒက်ညးဒေသတံ နဒဒှ်ဇွောံစဵုဒၞါပၞာန်ကီု၊ ရပ်ကော်ဏာ ကရောံကရောၚ်ပၞာန်တံကီု၊ အ္စာၝောံ CDM ဂမၠိုၚ် ဒးဒုၚ်ရပ် ကေုာံ အခိၚ်ဒးဒုၚ်ရပ် ချိုတ်အာတံ နွံဒၟံၚ်ရောၚ် သ္ဂးရ။
ပ္ဍဲကဵုဒပ်ကံၚ်ဇြဳပၞာန် ရပ်ဒက်လဝ် ၂၃၅ တၠဂှ် ၂၀၆ ကလေၚ်ဗၠးကၠုၚ်ကီုလေဝ် သှ်ေ ၂၉ တၠဂှ်ဝွံ ထ္ၜးဟိုတ်နာနာတုဲ ဒးဒုၚ်ပံက်လဝ်ဂဗုတ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
အပ္ဍဲဂိတုဖေဖဝ်ဝါရဳ ဟိုတ်နူပရေၚ်ဂစိုတ်ဂယိုၚ် နူကဵုဒပ်ကံၚ်ဇြဳပၞာန် ကေုာံ နူကဵုဒပ်သၟဝ်တဲညးတံဂှ်ကီု၊ ဟိုတ်နူမာၚ်တိုပ်တိ ဒပ်ကံၚ်ဇြဳပၞာန် ပစူလဝ်တံ ဗ္တိုဟ်ထ္ကးဂှ်ကီု၊ ဟိုတ်နူပရေၚ်ဗ္တိုက်တရဴကျာ ကေုာံ ပန်ပှော်လွဟ်ဇၞော်တံဂှ်တုဲ ကောန်အရာပ် ၈ တၠ ဒးချိုတ်အာလဝ်ရ။
သ္အာၚ်နူဂှ်ပၠန် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ညးသၟတ်ဂမၠိုၚ်ဝွံ လုပ်စိုပ်အပ္ဍဲဒပ်ပၠန်ဂတးတံကီု၊ တိတ်အာဍုၚ်သ္အာၚ်တံဂှ်တုဲ အပ္ဍဲဒေသ ဒးဆေၚ်မုက်ဂဗဒၟံၚ် ပြသၞာကောန်ကလောန်အောန်တံရောၚ်ဂှ် သ္ဂးရ။
အတိုၚ်လိက်ဒုၚ်စဳရေၚ် FE5 Tanintharyi ဂှ်မ္ဂး ပ္ဍဲရးတၞၚ်သဳ ပေါဲဗ္တိုက်တံ သာသ္ကာတ်မြဟ်ကၠုၚ်ဒၟံၚ်ဂှ် အပ္ဍဲဂိတုဖေဖဝ်ဝါရဳတေံ ညးထောံလသာသ္ၚိဌာန် ဒးဂြိပ်ဒဴပါဲဒလေတ်တံ နွံလဝ် စဵုကဵု ၄၈၈၀၀ ပြၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−Social Media