မတ်မလီု၊ မာတ် ၁၄
ၜိုတ်ကဆံၚ်တဝ်စၞေဟ်ပၠန်ဂတး ကုကံၚ်ဇြဳပၞာန် နကဵုလွဟ်လက်နက်ဂှ် ပြေဒၟံၚ်စိုတ်ဟွံဂွံတုဲ ညံၚ်သွဟ်ပရေၚ်ပၞာန် ဂွံတိတ် နွံပၟိက်ဒးကၠောန် ဗွဲတၟေၚ်ဏောၚ်ဂှ် သမ္မတယာယဳ အလဵုအသဳညဳသၟဟ်ဂကူ NUG ဒူဝါလယှဳလ ကဵုလဝ်သတိရ။
ပ္ဍဲကဵုကောံဓရီုအလဵုအသဳ အလဵုအသဳညဳသၟဟ်ဂကူ NUG မကၠောန်ဗဒှ်လဝ် ပ္ဍဲဂိတုမာတ် ၁၂ ဂှ် သမ္မတယာယဳ ဟီုလဝ်ဂလာန် ကုဝန်ဇၞော်ကၟိန်ဍုၚ် မပါလုပ် သီုကဵုသ္ကိုပ်ဝန်ဇၞော်ကၟိန်ဍုၚ်တံဂှ်ရ။
သမ္မတယာယဳဂှ် အလဵုအသဳညဳသၟဟ်ဂကူ ကေုာံ ဂကောံမဟာမိတ်ကောန်ဍုၚ်အရၚ်တံသီုဖအိုတ်ဝွံ ပၠန်ဂတးရပ်လွဟ် ကေုာံ ပေါဲဗ္တိုက်ညးဍုၚ်ကွာန်တံဂှ် ပံၚ်ဖျပ်တုဲ ညံၚ်သၞောတ်တၠအဝဵုပၞာန် ရိုဟ်ကၞက်ဂွံပိုတ်အာ ဂ္စါန်ပ္တိတ်ဒၟံၚ်ဇြဟတ်အိုတ်ရောၚ် သ္ဂးရ။
ဟိုတ်ဂှ်ရ ညံၚ်သွဟ်ပရေၚ်ပၞာန်ဂွံတိတ် နွံပၟိက်ဗွဲတၟေၚ်တုဲ လ္ပဟဳဗက်အာ လက္ကရဴကၠေမ်ပရေၚ်ဍုၚ်ကွာန် ကံၚ်ဇြဳပၞာန်ဂှ်တုဲ နကဵုဂမြၚ်ညာန်နွံနွံ ဒးကၠောန်သ္ပ ခၠေဝ်ပလန် ပိုတ်တ်ဏောၚ်ဂှ် ဖ္တိုက်ဖ္အောဝ်လဝ်ရ။
ကံၚ်ဇြဳပၞာန်ဂှ် ပ္ဍဲကိစ္စသၞောဝ်ယိုက်ဂၠေၚ်လျိုၚ်ပၞာန်ဂှ်လေဝ် ပရေၚ်ဍုၚ်ကွာန်ကဝက်၊ ပရေၚ်ပၞာန်ကဝက် နှဴတုဲစဒၟံၚ်လဂါံဇိုၚ်ဂှ်ရ အခိၚ်ကလေၚ်ပၠန်ဂတး ဒးကၠောန်သ္ပ နကဵုပရေၚ်ဍုၚ်ကွာန်တံနွံတုဲ ဒးကၠောန်နကဵု ပရေၚ်ပၞာန်လေဝ် နွံမာန်ဂှ် သမ္မတယာယဳ ဟီုရ။
သ္အာၚ်နူဂှ်ပၠန် ပရေၚ်ပၞာန်ဂှ် ညံၚ်ဂွံတုပ်ကဵုပရေၚ်ပၞာန် ဒးချပ်ဗ္စာကၠောန်သ္ပဏောၚ်တုဲ နဲကဲမဟာဗျူဟာတံဂှ်လေဝ် ဒးကၠိုဟ်လဝ်ခိုဟ်ဟ်ဏောၚ်ဂှ်ရ ကံၚ်ဇြဳပၞာန်ဂှ် ကဵုဇူဒီုဟွံဂွံ အခိၚ်ပသဲတူ ဒးတက်ကဵုဂိဂိဏောၚ်ဂှ် သ္ဂးရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ် သၟဝ်သမ္မတယာယဳဂှ် ဇြဟတ်ပၞာန် ဒက်ပ္တန်လဝ် နကဵုက္ဍိုပ်သ္ကိုပ်ပရေၚ်ပၞာန် ညံၚ်ရဴဂကောံကောန်ဍုၚ်အရၚ်တံဟွံမွဲဂှ်ရ တၚ်စၞောန်သၟးရ ကဵုမာန်တုဲ ပ္ဍဲအရာထ္မံက်ရုပ်ရဴတံဂှ် တၚ်သ္ဂုတ်သွာတ်ညး အဓိကဟွံသေၚ်ပုဟ်ဂှ် သ္ၚဳဂၠိပ်လဝ်ရ။
“နကဵုညး သၟဝ်ညးဂှ် ဇြဟတ်ပၞာန် ဒက်ပ္တန်လဝ် နကဵုက္ဍိုပ်သ္ကိုပ်ပရေၚ်ပၞာန် မၞုံကဵုတၚ်ဆဵုဂဗ ဂကောံရပ်လွဟ် ညံၚ်ရဴဂကောံကောန်ဍုၚ်အရၚ်တံဂှ် ဟွံမွဲပုဟ်။ ဟွံမွဲတုဲ တၚ်စၞောန်သၟးရ ကဵုမာန်ဏောၚ်။ အကာဲအရာဂွံကၠောန် နတဲမာန် ဟွံမွဲဂှ်ရ ကိစ္စညးဟီုဂှ်ဝွံ ၜိုန်ရဒှ်ကိစ္စဒှ်ထေက်တံကီုလေဝ် နတဲဏံ ပ္ဍဲကဵုသၟဝ်အကာဲအရာ မဆက်စပ်ကဵုပရေၚ်ပၞာန် အလဵုညး သ္ကိပ်သ္ကဟွံမာန်ဂှ် ဂကောံဗက်ကၠောန် အတိုၚ်ညးဟီုဂှ်တှ်ေ ဂၠိုၚ်ၚ်ဂှ်ဟွံမွဲပုဟ်ဂှ် ထေၚ်ကေတ်ရ။ ဟိုတ်ဂှ်ရ ပ္ဍဲအရာထ္မံက်ရုပ်ရဴနတဲဂှ် တၚ်သ္ဂုတ်သွာတ် ကေုာံ လစွံစိုတ်ညးတံဂှ် အဓိကဟွံသေၚ်ပုဟ်ဂှ် အဲညာတ်ရ” သာ်ဝွံ သ္ဂးရ။
သမ္မတယာယဳဂှ် လပှ်ပရေၚ်ပၞာန်ပၠန်ဂတးတဝ်စၞေဟ်ကဵု လပှ်ပၠန်ဂတး ဗၠးၜးကောန်ဍုၚ်အရၚ်တံဂှ်ဝွံ စိုပ်ဒၟံၚ်အကာဲအရာ ဆက်စၠောံတိုက်ရိုက်ဂွံယျတုဲ ပၠန်ဂတးက္ညၚ် ကဵု ပၠန်ဂတးဗၠးၜးကောန်ဍုၚ်အရၚ်တံဂှ်ဝွံ ဒှ်ကၠုၚ်မွဲယျဂှ် သ္ဂးရ။
နကဵုအလဵုအသဳညဳသၟဟ်ဂကူ NUG ပ္ဍဲကဵုဂကောံရပ်လွဟ်ကောန်ဍုၚ်အရၚ် လုပ်ဒၟံၚ်ပေါဲဗ္တိုက်ပၠန်ဂတး ကုကံၚ်ဇြဳပၞာန် မပ္တံကဵုဂကောံကချေၚ် KIO, ဂကောံချေၚ် KNPP, ဂကောံကရေၚ် KNU ကေုာံ ဂကောံမန် NMSP-AD တံဂှ် ဒက်လဝ်မဟာမိတ် လ္ဂောံကဵုပရေၚ်ပၞာန်၊ ပရေၚ်ဍုၚ်ကွာန်၊ ပရေၚ်ကလုတ်တမာန်တံရ။
မွဲလ္ပာ်ဂှ်ပၠန် ပ္ဍဲကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် ဂကောံလ္ၚဵုတံကဵု ဒပ်ပၞာန်စဵုဒၞါညးဍုၚ်ကွာန် PDF, NUG တံဝွံ ပ္ဍဲကဵုပရေၚ်ပၞာန်ဗလးတိတံဂှ် ပံၚ်တောဲတုဲ ဗ္တိုက်ဒၟံၚ်ကံၚ်ဇြဳပၞာန်ဂှ်လေဝ် နွံဒၟံၚ်ရ။
ပြဟ်ဟ်ဏံ ပ္ဍဲကဵုကချေၚ် ကေုာံ ကရေၚ်တံဂှ် နကဵုသ္ကိုပ်သ္က ဂကောံရပ်လွဟ်ကောန်ဍုၚ်အရၚ် ဖျေံသ္ဇိုၚ်အပ္ဍဲဒေသတံဂှ် ဒပ်ပံၚ်ကောံတံဝွံ မ္ၚးနူကဵုဗ္ဒိုပ်ဒပ်ဗၠာဲသၟိၚ် ကံၚ်ဇြဳပၞာန်တံဂှ် ထ္ပက်ပၞာန်ဗ္တိုက်ဒၟံၚ် သီုဌာန်ဂအုပ်တမ်ဒပ်တံရ။
ပရိုၚ်−သြၚ်လောန်တိုၚ်(မ်)
ဗီု−NUG