မတ်မလီု၊ မာတ် ၁၄
ကရောံၚုဟ်လှုဲဗၟာစှ်ေကၠုၚ်ဂှ် ၚုဟ်လှုဲသေံလေဝ် အပ္ဍဲဂိတုဏံ သၠုၚ်တိုန်ကၠုၚ်တုဲ ၚုဟ်ကပေါတ်ဗၞိက်သေံတံ ထပ်သၠုၚ်တိုန်ကၠုၚ်ရဂှ် သၟာဗၞိက်ပယျဵုတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ဂိတုဖေဖဝ်ဝါရဳ သတ္တာဟလက္ကရဴအိုတ်တေံ ၚုဟ်သြန်ၝာတ် မွဲၝာတ် ၉၈ ဒ္ကေဝ်ဓဝ်နွံလဝ်ဂှ်ဝွံ အခိၚ်လၟုဟ် မွဲၝာတ်ဂှ် ၚုဟ်သၠုၚ်တိုန်ကၠုၚ် စဵုကဵု ၁၀၅ ဒ္ကေဝ်ရ။
ဟိုတ်နူၚုဟ်သြန်ၝာတ်သၠုၚ်တိုန်တုဲ ၚုဟ်ကပေါတ်ဗၞိက်သေံဂှ်လေဝ် တန်တဴကဵုလ္တူဂကူကပေါတ်တံဂှ်တုဲ အောန်အိုတ် နူ ၁၀၀၀ ဒ္ကေဝ် ၚုဟ်သၠုၚ်တိုန်ကၠုၚ် စဵုကဵု ပွဳပွူ ၃၀၀၀ ဒ္ကေဝ်ရ။
ဟိုတ်နူသြန်ဖောဝ်အပ္ဍဲဍုၚ်ကီု သီုကဵုထဝ်၊ ဒဝ်ဠာတံ ၚုဟ်ထပ်တိုန်ကၠုၚ်ဂှ်တုဲ ၚုဟ်သြန်ၝာတ်သေံ သၠုၚ်တိုန်ကၠုၚ်ဂှ် သၟာဗၞိက်တံ သ္ဂးအိုတ်ရ။
သၟာဗၞိက်ပယျဵုမွဲတၠဂှ် ၚုဟ်ကပေါတ်ဗၞိက်သေံတံ သၠုၚ်တိုန်ကၠုၚ်ဂှ်ဝွံ ဟိုတ်နူၚုဟ်သြန်ၝာတ် သၠုၚ်တိုန်ကၠုၚ် ၅ တၟံကၠံ မဒှ်တုဲ ဒှ်ဟိုတ်နူသြန်ဖောဝ်အပ္ဍဲဍုၚ် သၠုၚ်တိုန်ကၠုၚ်တံရောၚ်ဂှ် ဟီုရ။
“သြန်ၝာတ်ဂှ် တိုန်အာ ၜိုတ် ၅ တၟံကၠံ။ လၟုဟ် ၚုဟ်တိုန်ဟီုဂှ် ဟွံဆေၚ်ကဵုပေါဲဗ္တိုက်ပုဟ်။ သြန်ဍုၚ်သ္အာၚ်ဏံ သၠုၚ်တိုန်အာတုဲ ၚုဟ်ကပေါတ်ဒးရာန်တံဂှ်လေဝ် သၠုၚ်တိုန်ကၠုၚ်တုဲ ဍေံလေဝ် ဗက်တိုန်အာကီု။ ဒှ်သြန်ဖောဝ်အပ္ဍဲဍုၚ်ရ။ ဒှ်သဘဴ inflation သၠုၚ်တိုန်ကၠုၚ်ရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် နကဵုကံၚ်ဇြဳပၞာန် ဟွံထိၚ်ဒက်ဗွဝ်ဖျာသြန်ဍုၚ်သ္အာၚ်မွဲသာ် ဒှ်သဘဴဗလးလဝ်တုဲ ယဝ်ရဟွံထိၚ်ဒက် သြန်ဖောဝ်အပ္ဍဲဍုၚ်ဏံ ဗွဲမဂတာပ်အခိၚ်မ္ဂး မ္ၚးနူကဵုသြန်ၝာတ်ဂှ် သြန်တၞဟ်ဟ်တံလေဝ် ဆက်သၠုၚ်တိုန်ကၠုၚ်မာန်ရောၚ် ညးသ္ၚဳဂၠိပ်လဝ်ရ။
သၟာဗၞိက်မွဲတၠပၠန်ဂှ် ကပေါတ်ဗၞိက်သေံတံ ၚုဟ်သၠုၚ်တိုန်ကၠုၚ်ဂှ်ဝွံ ဟွံဆေၚ်စပ်ကဵုပေါဲဗ္တိုက် ဒှ်ဒၟံၚ်လၟုဟ်တံဂှ်တုဲ နကဵုဓဝိၚ် ဂၠံၚ်ကၟာတ်ဟာဟွံတီဂှ် သၠုၚ်ပ္တိုန်ဒၟံၚ် ၚုဟ်ဗၞိက်တံ ညိညဂှ်ကဵု ဟိုတ်နူၚုဟ်သြန်ၝာတ် သၠုၚ်တိုန်တံဏောၚ်ဂှ် ဟီုရ။
“ဟွံဆေၚ်စပ်ကဵုပေါဲဗ္တိုက်ပုဟ်။ ဒှ်ဒၟံၚ်ပ္ဍဲညဳနံၚ်မွဲဍုၚ်ဓဝ်ရဏောၚ်။ ပေါဲဗ္တိုက်ဏံဂှ် ဟွံစိုပ်ကၠုၚ် လ္ပာ်ဍုၚ် ပိုယ်တံဂှ်ပုဟ်။ ဂၠံၚ်ဂှ်တှ်ေ ဟွံဒးဂွိၚ်ပုဟ်။ မုဟွံဆေၚ်စပ်ကဵု ကပေါတ်ဗၞိက်ဂေတ်ဂြိပ်တံဏံပုဟ်။ ဂၠံၚ်ဂှ်တှ်ေ ဒၞါဲဒှ်ဒၟံၚ်ဏံကဵု ဂၠံၚ်လှာဲဂတးဗၞိက်ဂှ် မုဟွံဒှ်ပုဟ်။ ပရေၚ်လှာဲဂတးဗၞိက်ဂှ်တှ်ေ သၠုၚ်ပ္တိုန်ၚုဟ် အတိုၚ်ဏံညိညရ။ ဂၠံၚ်ကၟာတ်ဟာဟွံတီတုဲ ကလေၚ်ပ္တိုန်တိုန်ၚုဟ်ဗၞိက်တံ ညိညရ။ ဝေၚ်ဗွဝ်ဖျာလှုဲတံလေဝ် ပါကီုဏောၚ်” သာ်ဝွံ သ္ဂးရ။
ကပေါတ်ဗၞိက်သေံတံဝွံ ပ္ဍဲသၞာံတုဲကၠုၚ်တေံ ဟိုတ်နူပေါဲဗ္တိုက် က္တဵုဒှ်လဝ်တံဂှ်တုဲ ဂၠံၚ်ဇၞော်အာယှ ပၟိက်ဇၞော် သွက်ပရေၚ်လှာဲဂတးဗၞိက် သေံ−ဗၟာဂှ် ကၟာတ်လဝ်အခေါၚ်ရပ်စပ်စကာတံဂှ်တုဲ ဒးသွံရာန်ဒၟံၚ်ဗၞိက် နူကဵုဂၠံၚ်ထိုအ်ဂဝ်ကိုဝ်သၟးရ။
ပ္ဍဲကဵုဂၠံၚ်ထိုအ်ဂဝ်ကိုဝ်ဂှ် ဂကောံဗော်သွးနာနာ ဟိုတ်နူကံက်ဒၟံၚ်အခေါန်ဂၠံၚ် ဂၠိုၚ်ကဵုဆဂှ်တုဲ စရိတ်ပရေၚ်ပလံၚ်ဗစိုပ် အိုတ်ဂၠိုၚ်တုဲလေဝ် ပရေၚ်ဇီုကပိုက် လ္တူၚုဟ်ကပေါတ်ဗၞိက်တံ နွံဒၟံၚ်ရ။
ကပေါတ်ဗၞိက်သေံတံဝွံ ၚုဟ်သြန်ၝာတ် သၠုၚ်တိုန်ကၠုၚ်ကီု၊ ဒးကဵုၚုဟ်သၞေဟ်ကၚ် ဂၠိုၚ်ဂှ်သၟးဟွံက သီုကဵုအခက်အခုဲ ပရေၚ်အာကၠုၚ်တံဂှ်တုဲ ကၠာဂွိုအ်စိုပ်အတး ၚုဟ်ဆက်သၠုၚ်တိုန် မာန်ဏောၚ်ဂှ် သၟာဗၞိက်ပယျဵုတံ သ္ဂးအိုတ်ရ။
ဍုၚ်ဗၟာဝွံ ဗၞိက်စၞစသုၚ်သ္ဇိုၚ်၊ ဂဥုဲဇဗ၊ ဗၞိက်ပယျေဝ်၊ ဗၞိက်အရပ်စပ်မၞိဟ် ကေုာံ ကပေါတ်ဗၞိက်အရပ်စပ် ပရေၚ်သိုၚ်ခၞံတံ သီုကဵုကပေါတ်ဗၞိက်အရပ်စပ်နာနာတံဂှ် ဒးပၠောပ်ပ္တိုန်နၚ် နူကဵုဍုၚ်သေံ အဓိကရ။
ပရိုၚ်−သြၚ်လောန်တိုၚ်(မ်)
ဗီု−CJ