ဗြဝတဳ၊ မာတ် ၁၅
အပ္ဍဲပေါဲဗ္တိုက်တေန်ဂါန်ညဳနံၚ် တွဵုရးကရေၚ်ဂှ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ကေုာံ ဗ္တိုက်ကဵုပၞာန်ကျာတံဂှ်တုဲ ကောန်အရာပ် ပွဳပွူ ၁၀ တၠ ဒးချိုတ်အာလဝ်တုဲ ဗွဲမဂၠိုၚ် ကလိဂွံလဝ်ဝပ်ဂှ် ခရိုၚ်ဒူပလာယာ KNU လလောၚ်ပ္တိတ်လဝ်ရ။
စနူဂိတုမာတ် ၇ အခိၚ်နူဂယး ၁၀ နာဍဳ ၁၉ မိနေတ်ဂှ် ဒပ်ပံၚ်ကောံပၠန်ဂတး ဒပ်မဟာ ၆ KNLA တံ လုပ်စိုပ်ဗ္တိုက်လဝ် တမ်ဒပ်ခမရ ၃၅၅ ဖျေံသ္ဇိုၚ်တေန်ဂါန်ညဳနံၚ် ပွိုၚ်ဍုၚ်ဗြဝတဳဂှ်တုဲ ပ္ဍဲအခိၚ်ဗ္တံ ၆ နာဍဳ ၄၅ မိနေတ်ဂှ် ဗ္တိုက်သီဂွံလဝ် အတိုၚ်ဗ္ဒိုပ်မွဲရ။
အပ္ဍဲပေါဲဗ္တိုက်သီဗ္ဒိုပ်ဂှ် ဒပ်ကံၚ်ဇြဳပၞာန် ၁၉ တၠ ချိုတ်လဝ်တုဲ လၟိဟ်မၞိဟ်ထပ်ပြဟ်လလုဲအာလဝ်တံဂှ် စၟဳတ်ဒၟံၚ်ဖိုဟ်တုဲ ဗွဲမဂၠိုၚ်ဂၠေၚ် ကလိဂွံလဝ်ဝပ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
သ္အာၚ်နူဂှ်ပၠန် သီဂွံလဝ် နူကဵုဒပ်ကံၚ်ဇြဳပၞာန်ဂှ် ကွဳစက်အရပ်စပ်ပၞာန်၊ ကပေါတ်အရပ်စပ်ပၞာန် ကေုာံ လွဟ်ဇၞော်လွဟ်ဍောတ် ၁၄၀ လကိုအ်ပြၚ်တုဲ အပ္ဍဲပေါဲဗ္တိုက်ဂှ် လ္ပာ်ဒပ်ပံၚ်ကောံ KNLA တံ ကောန်သ္ဂံၚ် ၆ တၠ ပြဟ်လလုဲအာလဝ်တုဲ ၈ တၠ ကလိဂွံလဝ်ဝပ်ဂှ် ထ္မံက်ထ္ၜးလဝ်ရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဒပ်ကံၚ်ဇြဳပၞာန် ဟိုတ်နူဘိုၚ်ပန်ပှော်ကဵုဒၟံၚ် သီုလွဟ်ဇၞော် ကေုာံ သီုက္ၜၚ်ကျာရီုတံဂှ်တုဲ ကောန်အရာပ် ပွဳပွူ ၁၀ တၠ ဒးချိုတ်အာလဝ်တုဲ ဗွဲမဂၠိုၚ်ဂၠေၚ် ကလိဂွံလဝ်ဝပ်တုဲ ဟိုတ်နူထောံမခတိုဟ် နကဵုက္ၜၚ်ကျာတုဲ သ္ၚိဒၟံၚ်ညးဍုၚ်ကွာန်ဒေသ ပွဳပွူ ၂၀ မ ပၟတ်တူလီုလာ်အာလဝ်ဂှ် ဂွံတီကေတ် အတိုၚ်တၚ်လလောၚ်တြးရ။
ပ္ဍဲကဵုညးဍုၚ်ကွာန်ကောန်အရာပ် ချိုတ်အာတံဂှ် ညးအာယုက်ဇၞော်ဇၞော်တံကဵု ညးဗြဴတံ ပါလုပ်တုဲ ဟိုတ်နူပေါဲဗ္တိုက်တုဲ ညးဍုၚ်ကွာန်ဒေသ နူကဵုကွာန်တေန်ဂါန်ညဳနံၚ်၊ ရွာသစ်၊ မြို့သစ်၊ ဖားချောင်း၊ ပေါလော သံပုရာ၊ ဝှေ့ရှမ်း ဂၠိုၚ်ကဵုလ္ၚီ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲဂှ် ဂွံတီကေတ် ဇရေၚ်ညးဒေသတံရ။
ပေါဲဗ္တိုက်တေန်ဂါန်ညဳနံၚ် မရနုက်ကဵု ၈ တ္ၚဲ တ္ၚဲဏံဂှ်လေဝ် အကာဲအရာပရေၚ်ပၞာန်ၜါလ္ပာ် ဆက်ကြံၚ်မ္ၚိုဟ်ဒၟံၚ်ဖိုဟ်တုဲ ဒပ်ကံၚ်ဇြဳပၞာန်တံ ထပ်ကၠောန်သ္ပဗ္တိုက်ဒၟံၚ် ကဵုလွဟ်ဇၞော် ကေုာံ ဗ္တိုက်ဂြာတ်ဒၟံၚ်မခတိုဟ် နကဵုက္ၜၚ်ကျာ အရိုဟ်တ္ၚဲဂှ် ညးဒေသတံ ဟီုရ။
ထ္မံက်ဒၟံၚ်ပေါဲဗ္တိုက် သီဍုၚ် ကေုာံ သီဗ္ဒိုပ် ကုဗ္ဒိုပ်ဒပ်ကံၚ်ဇြဳပၞာန် အပ္ဍဲတိဍာ် ဒပ်မဟာ ၆ ခရိုၚ်ဒူပလာယာ KNU ဂှ် ဂွံတီကေတ် အတိုၚ်တၚ်လလောၚ်တြးဂှ်တုဲ အခိၚ်လၟုဟ် တမ်ဒပ် ကေုာံ ဗျူဟာ သှ်ေဒၟံၚ်ပ္ဍဲတေန်ဂါန်ညဳနံၚ်တံဂှ် ဆက်ဗ္တိုက်ဒၟံၚ်ဖိုဟ်ရ။
ကံၚ်ဇြဳပၞာန်ဂှ် ညံၚ်ဍုၚ်လှာဲဂတးဗၞိက်ပယျဵု ဍုၚ်ဗြဝတဳကဵု တေန်ဂါန်ညဳနံၚ် ဂွိုအ်စှ်ေအာဂှ် ရပ်စပ်စကာ ပၞာန်ကျာ ကေုာံ လွဟ်ဇၞော်အရီုဗၚ်တံဂှ်တုဲ ဗ္တိုက်ဒၟံၚ်ရောၚ် ဂွံတီကေတ် လ္ဂောံကဵုပရိုၚ်ဗလးတိတံရ။
ပရိုၚ်−သြၚ်လောန်တိုၚ်(မ်)
ဗီု−KNU