ဇြဳဇြိုၚ်၊ မာတ် ၁၅
ဍုၚ်ဇြဳဇြိုၚ် ဒေသအခေါၚ်အုပ်ဓုပ်အပိုၚ်ပအိုဝ် သၠုၚ်ကျာတွဵုရးသေံဂှ်ဝွံ ဟိုတ်နူကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ က္ၜၚ်ကျာတံတုဲ ကြပ်အလုံဍုၚ်မွဲ လီုလာ်အာယျဂှ် ကောန်သ္ဂံၚ်ဗလးတိတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ကံၚ်ဇြဳပၞာန်ဝွံ မ္ၚးနူကဵုလွဟ်ဇၞော်၊ ထောံဒၟံၚ်မခတိုဟ် (မီးလောၚ်ဗုံး) နကဵုဒရုၚ်တံသၟးဟွံက ဟိုတ်နူကၠုၚ်စိုပ်ထောံမခတိုဟ် နကဵုက္ၜၚ်ကျာတံဂှ်ကဵု စံၚ်ပတူပလီုပလာ် နကဵုတၚ်ရန်တၟံနွံနွံတံဂှ်တုဲ ၉၀ တၟံကၠံပြၚ် ဍုၚ်ဂှ် ပၟတ်တူဒှ်အာပတေၚ်ရ။
အတိုၚ်ဂလာန် ဂကောံသၟတ်ပအိုဝ် PYO ဂှ်မ္ဂး အပ္ဍဲပေါဲဗ္တိုက် လအ်ကၠုၚ် ပွိုၚ် ၅၀ တ္ၚဲပြၚ်ဂှ် ဍုၚ်ဇြဳဇြိုၚ်ဝွံ ဟိုတ်နူဒပ်ကံၚ်ဇြဳပၞာန် ဗ္တိုက်ကဵုလွဟ်ဇၞော် ကေုာံ ကဵုက္ၜၚ်ကျာတံဂှ်တုဲ အရာအိုဿီု ဒးလီုလာ်အာလဝ်ဂှ် သ္ဂးရ။
အပ္ဍဲကာလပေါဲဗ္တိုက်ဂှ် ကံၚ်ဇြဳပၞာန် ပန်ပှော်လဝ်လွဟ်ဇၞော် ကုဍုၚ်ဇြဳဇြိုၚ် ၁၅၀၆ ဝါ၊ ဗ္တိုက်ကဵုပၞာန်ကျာ ဟွံအောန်နူကဵု ၄၀၈ ဝါ ကလိလောန်လဝ်တုဲ မွဲမွဲတ္ၚဲ ကလိလောန်လဝ် ပရေၚ်ဗ္တိုက်တရဴကျာ ၈ ဝါရ။
ဟိုတ်နူပရေၚ်ဗ္တိုက်ဏံတုဲ ညးဍုၚ်ကွာန်ကောန်အရာပ် ဟွံအောန်နူကဵု ၅၀ ချိုတ်အာလဝ်တုဲ ဗွဲမဂၠိုၚ်ဝွံ ကံၚ်ဇြဳပၞာန် ပန်ပှော်ဒးဗၠေတ်အာကီု၊ ဒးဒုၚ်ရပ်တုဲ ဒးဒုၚ်ဂစိုတ်ကီု၊ ဒးလွဟ်ဇၞော်တံသၟးဟွံက ဖေက်လကိုတ်တုဲဂြိပ်ဂှ် ဒပ်ကံၚ်ဇြဳပၞာန်တံ ပန်ဂစိုတ်လဝ်တံလေဝ် ပါလုပ်ရောၚ် ဂွံတီကေတ်ရ။
အခိၚ်လၟုဟ် ကံၚ်ဇြဳပၞာန်ဝွံ ဟိုတ်နူဆက်ဗ္တိုက်ဒၟံၚ် သီုပၞာန်ကျာ သီုကဵုလွဟ်ဇၞော်တံဂှ်တုဲ ကောန်အရာပ်ချိုတ်အာတံ သ္ဇက်ဂွံဆက်သၠုၚ်တိုန်ကၠုၚ်နွံဒၟံၚ်ဂှ်လေဝ် သ္ၚဳဂၠိပ်ဒၟံၚ်တံ နွံဒၟံၚ်ရ။
ညးမၞုံအခေါၚ်ဟီုဂး ဒပ်ပၞာန်ဗၠးၜးကောန်ဂကူပအိုဝ် PNLA ဂှ် ပ္ဍဲဒေသဇြဳဇြိုၚ် ဟိုတ်နူပေါဲဗ္တိုက်တံ ဆက်သ္ကာတ်မြဟ်ဒၟံၚ်တုဲ လၟိဟ်လီုလာ် သောဲဗြောဲဂှ် သ္ပဒတန်ဟွံမာန်ဏီပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
လ္တူဍုၚ်ဇြဳဇြိုၚ်ဂှ် အကြာဒပ်ကံၚ်ဇြဳပၞာန် ကေုာံ ဒပ်ပံၚ်ကောံ PNLA တံ ပေါဲဗ္တိုက်သ္ကာတ်မြဟ်ဒၟံၚ်ကီုလေဝ် ဂကောံ PNO သၟဝ်တဲကံၚ်ဇြဳပၞာန်ဂှ် ဟိုတ်နူကဵုဒၟံၚ်ဇြဟတ်ဂရိုဟ် ကုညးဒေသတံ ဂွံစဴဌာန်ဒၟံၚ်တံ နွံဒၟံၚ်တုဲ ညးဒးကလေၚ်စဴတံလေဝ် နွံဒၟံၚ်ဂှ် PYO ကဵုလဝ်သမ္တီရ။
သွက်ဂွံကလေၚ်ကေတ် ဍုၚ်ဇြဳဇြိုၚ် PNLA ထိၚ်ဒက်လဝ်ဂှ် နူစဂိတုဂျာန္နဝါရဳ ၂၂ တုဲကၠုၚ်တေံ ဒပ်ကံၚ်ဇြဳပၞာန် ကေုာံ ဒပ်ပံၚ်ကောံပၞာန်ပျဳတုသေတ်ပအိုဝ်တံ ကလေၚ်ထ္ပက်ဒၟံၚ်ပၞာန်တုဲ ပေါဲဗ္တိုက်တံ က္တဵုဒှ်ဒၟံၚ်လၟေၚ်ဒဒှ်တ္ၚဲရ။
ဟိုတ်နူပေါဲဗ္တိုက် ဒပ်ပၠန်ဂတးတံကဵု ကံၚ်ဇြဳပၞာန်တံဂှ်တုဲ ညးဒေသ ဒးထောံလသာသ္ၚိဌာန် ဒးဂြိပ်ဒဴပါဲလေတ်တံ နွံကၠုၚ် မွဲကိုဋ်ပြၚ်ယျဂှ် PYO လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−PNLA