မတ်မလီု၊ မာတ် ၁၅
သၟတ်လုပ်ပၞာန်ဂွံ အပ္ဍဲတွဵုရးဍုၚ်မန်တံဂှ် ဂိတုမာတ်အိုတ် စွံလက္ကရဴအိုတ်တုဲ သွက်ဂွံပလံၚ်ဗစိုပ်ယၟုဂှ် စၞောန်ပ္ညုၚ်လဝ် ဇရေၚ်သ္ကိုပ်အုပ်ဓုပ်ကွာန်အရာပ်တံရောၚ် ညးမစုက်လုက်ကဵု ကံၚ်ဇြဳပၞာန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးသၟတ် ပါလုပ်ဒၟံၚ် ပ္ဍဲအာယုက်အပိုၚ်အခြာ ယိုက်ဂၠေၚ်လျိုၚ်ပၞာန်ဂွံတံဂှ် ဂကောံကွာန်မွဲမွဲမ္ဂး သွက်ဂွံကဵုစရၚ် ၁၀ တၠဂှ်ကီု၊ ပ္ဍဲအရာပလံၚ်ဗစိုပ်စရၚ်တံဂှ်လေဝ် အပ္ဍဲဂိတုမာတ်သတ္တာဟလက္ကရဴအိုတ် သွက်ဂွံကဵုစရၚ်အိုတ်ဂှ် စၞောန်ပ္ညုၚ်လဝ်ရ။
အတိုၚ်ဂလာန် သ္ကိုပ်အုပ်ဓုပ်ကံၚ်ဇြဳပၞာန် ဟွံမိက်ထ္မံက်ယၟုမွဲတၠဂှ်မ္ဂး ဂကောံကွာန်မွဲမွဲ ဒးကဵုအာစရၚ် ၁၀ တၠဏောၚ်တုဲ သွက်ဂွံယိုက်ဂၠေၚ်လျိုၚ်ပၞာန်ဂှ် ရုဲစှ်အာ ပ္ဍဲကဵုဏံ မွဲတၠဏောၚ်ဂှ် ဂွံတီကေတ်ရ။
ညးဒးဒုၚ်ရုဲစှ် သွက်ဂွံယိုက်ဂၠေၚ်လျိုၚ်ပၞာန်တံဂှ်ဝွံ ပ္ဍဲကဵုဘာတန်ဗ္တောန်ပၞာန် ကံၚ်ဇြဳပၞာန် စၟတ်လဝ်တံဂှ် ဒးတိုန်စိုပ်ဘာပၞာန် ၃ ဂိတုဏောၚ်တုဲ စှ်ေနူဘာဂှ်မ္ဂး ဒးယိုက်ဂၠေၚ်လျိုၚ် ပ္ဍဲဒပ်မဆေၚ်စပ်တံဏောၚ်ဂှ် သ္ဂးရ။
ညးသၟတ်ဒေသမွဲတၠဂှ် သွက်ဂွံယိုက်ဂၠေၚ်လျိုၚ်ပၞာန် လ္ပာ်ကံၚ်ဇြဳပၞာန် ဟိုတ်နူဗက်ကံက်ဒၟံၚ်စရၚ်ယၟု အပ္ဍဲဒေသတံဂှ်တုဲ အကြာညးဍုၚ်ကွာန်တံဂှ် ပရေၚ်ဒှ်ဓဝိၚ်ဂွိၚ်ဂွါဲတံ သၠုၚ်တိုန်ကၠုၚ်ဂှ် ဟီုရ။
“ဒးဟီုတပ်ပ်တှ်ေ ညးဍုၚ်ကွာန်တံဂှ် သၞောတ်ဏံဂှ် ဟွံဒးစိုတ်အိုတ်ပုဟ်။ သာတုဲဒးဒှ်ကၠုၚ်ဓဝိၚ်တံ ဂၠိုၚ်ကၠုၚ်ရ။ စပ္တံနူကဵုမိမကောန်ဇာတ်နွံတံ စဵုစိုပ်ရဲအုပ်ဓုပ်တံရဏောၚ်။ ပြသၞာတံဂှ်တှ်ေ သာဂၠိုၚ်ကၠုၚ်ရ” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ပ္ဍဲကဵုနေဗျဳဒဝ် ကေုာံ လ္ဂုၚ်တံဂှ် သွက်ဂွံယိုက်ဂၠေၚ်လျိုၚ်ပၞာန်ဂှ် ကော်ဒၟံၚ် မၞိဟ်အာယုက်ပေၚ်တုဲတံ နွံဒၟံၚ်တုဲ ပ္ဍဲကဵုတွဵုရး ကေုာံ ရးတၞဟ်ဟ်တံဂှ်တှ်ေ စကံက်ဒၟံၚ်စရၚ်လၟိဟ်မၞိဟ်တံရ။
အတိုၚ်ဂလာန်သ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန် ခါန်ကၞက်လဝ်ဂှ်မ္ဂး ပ္ဍဲကဵုတွဵုရးဍုၚ်မန် ဂကောံကွာန် ကေုာံ အရာပ် ၄၆၈ နွံဒၟံၚ်ဂှ် သွက်လၟေၚ် (၁) ယိုက်ဂၠေၚ်လျိုၚ်ပၞာန်ဂှ် ဗွဲတွဵုမအောန် သွက်ဂွံကော်အာသၟတ်တံ ဗ္ဒါဲ ၅၀၀ စဳဇန်လဝ်ဂှ် ဂွံတီကေတ်ရ။
လ္ဂောံကဵုသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး မၞိဟ်တြုံ နူအာယုက် ၁၈ စဵုကဵု ၄၅ သၞာံ၊ မၞိဟ်ဗြဴ နူအာယုက် ၁၈ စဵုကဵု ၃၅ သၞာံ၊ အောန်အိုတ် နူ ၂ သၞာံ စဵုကဵု ၅ သၞာံ ဒးယိုက်ဂၠေၚ်လျိုၚ်ပၞာန်ဏောၚ်ဂှ် စၞောန်ပျးလဝ်ရ။
ကံၚ်ဇြဳပၞာန်ဂှ် လၟေၚ်(၁) ယိုက်ဂၠေၚ်လျိုၚ်ပၞာန်ဂှ် အတးလောန်မ္ဂး စအာဏောၚ်တုဲ မွဲဂိတုမ္ဂး ညးသၟတ် ၅၀၀၀၊ မွဲသၞာံ ၆၀၀၀၀ ကော်အာဏောၚ်ဂှ် လလောၚ်တြးလဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI