နေဗျဳဒဝ်၊ မာတ် ၁၅
ဟိုတ်နူပရေၚ်ပၞာန်သီအဝဵုတုဲ ၚုဟ်ဗၞိက်တိုန်ကၠုၚ်ဒၟံၚ်သိုက်က်ဂှ် ညံၚ်ၚုဟ်ဂွံညိၚ်၊ ၚုဟ်ဂွံစှ်ေအာဂှ် ဝန်ဇၞော်ကၟိန်ဍုၚ် ပရေၚ်ဘဏ္ဍာ ကေုာံ ကိုန်စဳမာန်ကံၚ်ဇြဳပၞာန် ဥူဝေန်ယှုၚ် စၞောန်ပ္ညုၚ်ကၠုၚ် ဌာနမဆေၚ်စပ်တံရ။
အပ္ဍဲဍုၚ် ညံၚ်ၚုဟ်ဗၞိက်ဟွံဂွံတိုန် ဂွံညိၚ်ဝတ်ဒၟံၚ်ဂးတုဲ အပ္ဍဲကောံဓရီုကမ္မတဳ ၚုဟ်ဗၞိက်ဂွံညိၚ်ဝတ် ကဆံၚ်ကၟိန်ဍုၚ် မကၠောန်ဗဒှ်လဝ် ပ္ဍဲနေဗျဳဒဝ် ပ္ဍဲဂိတုမာတ် ၁၃ ဂှ် စၞောန်ပ္ညၚ်ကၠုၚ်လဝ်ရ။
ဥူဝေန်ယှုၚ်ဂှ် အခိၚ်လၟုဟ် ၜိုန်ဒှ်အခိၚ်သြောံကသီုတိတ်ကီုလေဝ် စပ်ကဵုကိစ္စ ၚုဟ်သြောံ၊ ၚုဟ်သ္ၚု သၠုၚ်တိုန်ဒၟံၚ်ဂှ်တုဲ သွက်ဂွံရေၚ်တၠုၚ် ညံၚ်ဂွံညိၚ်ဝတ်ဂှ်ကဵု ၚုဟ်ကပေါတ်ဗၞိက် ဂွံစှ်ေကၠုၚ်မာန်ဂှ် နွံပၟိက်ဒးဖျေံလၟေၚ်ကမၠောန်တံရောၚ်ဂှ် ဟီုဂးကၠုၚ်လဝ်ရ။
ညးဗြဴပ္ဍဲသ္ၚိမွဲတၠဂှ် ၜိုန်ရကၠောန်ဒၟံၚ် ညံၚ်ၚုဟ်ဗၞိက်ဂွံညိၚ်ကီုလေဝ် နတဲဏံ ၚုဟ်ဗၞိက်တံ ထပ်သၠုၚ်တိုန်ကၠုၚ်ဂှ်ရ ဒှ်ဒၟံၚ်အခက်အခုဲ လ္တူနူကဵုကၠာတေံဏီဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ၜိုတ်မွဲသတ္တာဟဏံဂှ်တှ်ေ ကသိုန်ဂှ် ၚုဟ် ၂၀၀၀၊ လၟုဟ်ဂှ် ၄၅၀၀၊ ၅၀၀၀ ညအ်ရဂှ် မဍောတ်တ်တံဂှ်ဏောၚ်။ သတ်ဇၞော်ဇၞော်ဂှ်တှ်ေ ၚုဟ်ဍေံ ၆၀၀၀ နွံဏောၚ်။ ကၠာတေံ သ္ၚုဂှ်တှ်ေ ၃၈၀၀၊ ၃၉၀၀၊ လၟုဟ်ဂှ် ၈၄၀၀ ဒှ်ဒၟံၚ်ဏောၚ်။ အဓိကဂှ်တှ်ေ လ္တူၚုဟ်ဗၞိက်ဏံ တိုန်ကၠုၚ်ဂှ် သာတုဲဒှ်တိုန်အခက်အခုဲရ။ အကြာပရေၚ်ပိုန်ဒြပ်ဟွံပြေပြံၚ်ဒၟံၚ်ဂှ် လှုဲလှာ်ဂှ်လေဝ်ဟွံရုမ်ဂပ် ၚုဟ်ဂှ်လေဝ် ထ္ပာ်တိုန်ဒၟံၚ်။ ရပ်မတေံလေဝ် လ္ၚီပြၚ်၊ ရပ်မဏံလေဝ် လ္ၚီပြၚ်၊ လှုဲ ၁၀၀၀၀ ဂှ် ဒှ်ဒၟံၚ်ဗီုပြၚ် ရာန်သ္ၚုမွဲကဠတ်ရဂွံ” သာ်ဝွံ သ္ဂးရ။
ကံၚ်ဇြဳပၞာန်ဂှ် ညံၚ်ၚုဟ်ဗၞိက်ဂွံညိၚ်ဝတ် ပ္ဍဲကဵုရးဒေသဇၞော် ကေုာံ တွဵုရးလ္ၚဵုတံဂှ် ဗၞိက်စၞစသုၚ်သ္ဇိုၚ် ပါလုပ်သီုကဵုသ္ၚု၊ ကၠေၚ်သတ်ဗြဴတံဂှ် ဂေတ်ကဵုကွဳစက်ဖျာတုဲ ဗက်သွံတြးဒၟံၚ် ပ္ဍဲကဵုရုၚ်ဌာနတံ၊ ဒၞါဲဒတန်သၞာဲဒဴမံၚ်တံကဵု ဘာတက္ကသိုလ်တံဂှ် စၞောန်ပ္ညုၚ်လဝ်ရ။
တၠဆေၚ်ဖျာဗၞိက်နာနာမွဲတၠဂှ်လေဝ် ဟိုတ်နူၚုဟ်ဗၞိက်တံ သၠုၚ်တိုန်ကၠုၚ်ဂှ်ရ ဗီုကဵုကၠာတေံ ကပေါတ်ဗၞိက်တံ သွံဟွံတိတ်ရတုဲ ညးဍုၚ်ကွာန်တံဂှ်တှ်ေ သာတုဲကြေပ်ဂြတ်ကၠုၚ်ဂှ် ဂွံဆဵုကေတ်ရောၚ် ဟီုရ။
“ၜိုန်ရၚုဟ်ဗၞိက် က္ဍၚ်ကၠုၚ်ကီုလေဝ် ညးဍုၚ်ကွာန်တံဂှ် ဂွံကၠောန်ၜိုတ်စဂှ် ကမၠောန်ဟွံမွဲဒၟံၚ်ပုဟ်။ တုဲပၠန် ဍေံတံကဵုကလောန်မ္ဂးလေဝ် ကမၠောန်ဏံဂှ် ဗီုလဵုဂွံဟီုရောဟီုတှ်ေ ယဝ်သွံတှ်ေ ဒှ်ဗၞိက်သွံဏောၚ်။ စတှ်ေ ဒးဗၞိက်စဏောၚ်။ ဂၠိက်ယာတ်ဂှ်ပၠန်လေဝ် ဗၞိက်ဂၠိက်ယာတ်။ ၚုဟ်ဂှ်က္ဍၚ်ဒၟံၚ်တုဲ ကပေါတ်ဂှ်ဟွံတိတ်လောဲလောဲပုဟ်။ အေ ဂှ်တှ်ေ ၚုဟ်ဗၞိက်တံ က္ဍၚ်ကၠုၚ်ခ္ဍၚ် ဂွံရာန်စသုၚ်ဂှ်လေဝ် ဟွံမွဲရပုဟ်။ ပြသၞာဏံဂှ်လေဝ် ဗီုလဵုဂွံသောၚ်ကလးရောဟီုဂှ် ဟွံတီပုဟ်။ မၞိဟ်တံဂှ် ကြေပ်ဂြတ်ကၠုၚ်သိုက်က်တုဲ ဒှ်ကၠုၚ်ဒၟံၚ်ဗီုပြၚ် ဒးဘဲကၞောဝ်ကၠောဝ်ဗျဵုတံဏောၚ်” သာ်ဝွံ သ္ဂးရ။
ၚုဟ်ဗၞိက်ဖျာက္ဍၚ်ဂှ်ဝွံ ဒၟါနူသြန်ဗၟာ ၚုဟ်မးစှ်ေကၠုၚ်ကီု၊ ကပေါတ်ဗၞိက် ဒးပၠောပ်နၚ် နူကဵုဍုၚ်သ္အာၚ်တံ ၚုဟ်တိုန်ကၠုၚ်ကီု၊ ခရိတ်ပရေၚ်ပလံၚ်ဗစိုပ်တံ သၠုၚ်ဒၟံၚ်သၟးဟွံက ဟိုတ်နူပေါဲဗ္တိုက်တုဲ ဂွံအာကၠုၚ် ဒှ်အခက်အခုဲဂှ် တၠကမၠောန်တံ ထံက်ထ္ၜးလဝ်ရ။
က္ဍိုပ်သ္ကိုပ်ပၞာန်ဂှ် ၚုဟ်ဗၞိက်ဖျာတံ ဂွံသၠုၚ်တိုန်ဂှ်ဝွံ ဒၟါနူရဲဝေၚ်ဗွဝ်ဖျာသြန် ကေုာံ ဟိုတ်နူမိက်ဂွံပ္တိတ်ပရဲ ပရေၚ်ဍုၚ်ကွာန်တံဂှ်တုဲ ၚုဟ်ဒးသၠုၚ်ဒၟံၚ် လ္တူနူကဵုၚုဟ်ဒှ်ထေက်တံဏောၚ်ဂှ် စောတ်စောဲလဝ်ရ။
အတိုၚ်လိက်ဒုၚ်စဳရေၚ် တိုက်သြန်ဂၠးတိဂှ်မ္ဂး ကြဴနူဒပ်ပၞာန်သီအဝဵုတုဲ အကာဲအရာပရေၚ်ပိုန်ဒြပ်ဍုၚ်ဗၟာဝွံ ဒမြိပ်တောတက် သ္ဇက်ဂွံဂွံဇြဟတ်ဟွံမွဲတုဲ ဆက်စှ်ေဒၟံၚ်ဏီဏောၚ်တုဲ စဵုကဵုသၞာံ ၂၀၂၅ ကၠုၚ်စိုပ်ဏံ ဟွံချိုတ်ပၠိုတ်ဏီပုဟ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI