ဗြဝတဳ၊ မာတ် ၁၇
အပ္ဍဲပေါဲဗ္တိုက်သီဗ္ဒိုပ်ဖလူ ဗ္ဒါဲဍုၚ်ဗြဝတဳ တွဵုရးကရေၚ် ပယျဵုသေံ−ဗၟာဂှ် ကောန်ဒပ်ကံၚ်ဇြဳပၞာန်တံသီုဖအိုတ် တတ်ကၠောံပယျဵုတုဲ ဂြိပ်ဗၠးအာ လ္ပာ်ဍုၚ်သေံဂှ် ပ္ဍဲဂိတုမာတ် ၁၅ တေံ KNU ဗဟဵု လလောၚ်ပ္တိတ်လဝ်ရ။
ဗ္ဒိုပ်ဖလူကံၚ်ဇြဳပၞာန်ဂှ် ဒပ်ပံၚ်ကောံ ဇြဟတ်ပၠန်ဂတးညးဍုၚ်ကွာန်တံကဵု ဒပ်ပၞာန်ဗၠးၜးကောန်ဂကူကရေၚ် KNLA တံ စဗ္တိုက်လဝ် ပ္ဍဲဂိတုမာတ် ၁၁ အခိၚ်ဇိုၚ်သဝ်တ္ၚဲ ၅ နာဍဳ ၂၀ မိနေတ်ဂှ်တုဲ ဇိုၚ်သဝ်တ္ၚဲ ၅ နာဍဳ ၂၅ မိနေတ်ဂှ် သီဂွံလဝ် အတိုၚ်ဗ္ဒိုပ်မွဲရ။
အပ္ဍဲပေါဲဗ္တိုက်သီဗ္ဒိုပ်ဖလူ သီဂွံလဝ် အပ္ဍဲပွိုၚ် ၅ မိနေတ်ဂှ် သီဂွံလဝ် နူကဵုကံၚ်ဇြဳပၞာန်တံ လွဟ်လက်နက်မကမ်ဗွဲမဂၠိုၚ်ဂၠေၚ် ကေုာံ ဇွောံမဟကှ် သီုကဵုသ္ၚုတံဂှ် ထ္မံက်ထ္ၜးလဝ် ပ္ဍဲတၚ်လလောၚ်တြး KNU ရ။
အပ္ဍဲပေါဲဗ္တိုက်သီဗ္ဒိုပ်ဂှ် အကြာဒပ်ပၞာန်ဗၠးၜးကောန်ဂကူကရေၚ် ကဵု ဒပ်ပံၚ်ကောံပၠန်ဂတးညးဍုၚ်ကွာန်တံဂှ် ဒၟါနူညးဍုၚ်ကွာန်တံ ရာဒနာဖျေံကဵုမေတ္တာတုဲ ဇီုကပိုက်ကလိဂွံဘဲ ဟွံမွဲပုဟ်ဂှ် ကဵုလဝ်သမ္တီရ။
ဒပ်ပံၚ်ကောံပၠန်ဂတး KNLA ဝွံ အပ္ဍဲပေါဲဗ္တိုက်တေန်ဂါန်ညဳနံၚ်ဂှ် သီဂွံလဝ် ဗ္ဒိုပ်တမ်ဒပ်ကံၚ်ဇြဳပၞာန် ခမရ ၃၅၅၊ ဗ္ဒိုပ်ဗၠာဲသၟိၚ်တိဍာ် ကေုာံ ဗ္ဒိုပ်ဖလူတံရ။
အခိၚ်လၟုဟ်ဂှ်လေဝ် ဆက်ထ္ပက်ဒၟံၚ်ပၞာန် ဗ္တိုက်ဒၟံၚ် တမ်ဒပ်ကံၚ်ဇြဳပၞာန် ဖျေံသ္ဇိုၚ်တေန်ဂါန်ညဳနံၚ် ခမရ ၃၅၇ ဂှ်ကဵု ဗျူဟာတံဂှ်တုဲ ပေါဲဗ္တိုက်ၜါလ္ပာ် က္တဵုဒှ်ဒၟံၚ်ဂှ် ဂွံတီကေတ် အတိုၚ်ပရိုၚ်တမ်ရိုဟ်ဗလးတိတံရ။
ပရိုၚ်−သြၚ်လောန်တိုၚ်(မ်)
ဗီု−KNU