မတ်မလီု၊ မာတ် ၁၇
သွက်သၞောတ်တၠအဝဵုပၞာန် ရိုဟ်ကၞက်ဂွံပိုတ်အာဂှ် ကရောံပေါဲဗ္တိုက်သီဗ္ဒိုပ်သီဍုၚ် အလုံဍုၚ်မွဲဂှ် ပ္ဍဲတွဵုရးဍုၚ်မန်ဂှ်လေဝ် ပေါဲဗ္တိုက်တံ သာသ္ကာတ်မြဟ်ကၠုၚ်မာန်တုဲ နကဵုညးဍုၚ်ကွာန်တံ သွက်ဂွံစွံသတိပရေၚ်ဂီုကၠီုအိုတ်ဂှ် ဂကောံပၠန်ဂတးတံ အာတ်မိက်လဝ်ရ။
အခိၚ်လၟုဟ်ဂှ် ဒပ်ကံၚ်ဇြဳပၞာန်ဝွံ ဟိုတ်နူပၞာန်ထ္ပက် ဒပ်ပံၚ်ကောံပၠန်ဂတးရပ်လွဟ်ကောန်ဍုၚ်အရၚ် အပ္ဍဲဒေသကရေၚ်၊ ကချေၚ်၊ ကရေၚ်ဍာဲ ကေုာံ အပ္ဍဲရခေၚ်တံဂှ်တုဲ ဗ္ဒိုပ်ဒပ်ဟွံဆုတ်ကလေၚ်တံ၊ ဌာန်ဂအုပ်တမ်ဒပ်တံ၊ ကုန်ဗျူဟာတံဂှ် ဆက်ဒးဒုၚ်သီဂိုၚ်ဒၟံၚ်ရ။
ပ္ဍဲအကာဲအရာဏံ ပ္ဍဲဒေသမန်ဂှ်လေဝ် စပ်ကဵုဇြဟတ်ရပ်လွဟ်ပၠန်ဂတးတံ ဒစးဒုၚ်ပလေဝ်ပလေတ်ဒၟံၚ် သွက်ဂွံလုပ်ပေါဲဗ္တိုက် လအာတုပ်သာ်ဂှ်တုဲ နူကဵုသြၚ်လောန်တိုၚ်(မ်) သၟာန်လဝ် ဂကောံလ္ၚဵုတံဂှ် ပလေဝ်ပလေတ်ဒၟံၚ်တံ နွံရောၚ် ညးမၞုံအခေါၚ်ဟီုဂး ကေုာံ ညးတာလျိုၚ်တံ ဟီုလဝ်ရ။
ဆ္ဂး လၟေၚ်ကမၠောန်ဒစးဒုၚ်ပလေဝ်ပလေတ် စပ်ကဵုပရေၚ်ပၞာန်တံဂှ် လ္ပာ်ဇြဟတ်ရပ်လွဟ်ပၠန်ဂတးတံ ထ္မံက်ပ္တိတ်ဟီုပ္တိတ်လဝ်ဟွံမွဲရ။
ညးဒုၚ်တာလျိုၚ် PDF ခရိုၚ်သဓီု ကိုဝ်အေမေန်ထောန်ဂှ် ပေါဲဗ္တိုက်တံ အာဂတနူဏံ ဂွံဆက်သ္ကာတ်မြဟ်ကၠုၚ် နွံမာန်ဂှ်ရ မိမညးဍုၚ်ကွာန်တံ သွက်ဂွံစွံသတိပရေၚ်ဂီုကၠီု ကေုာံ သွက်ဂွံပကောံလဝ်ဇွောံမစၞစတံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပေါဲဗ္တိုက်ဂှ်တှ်ေ ဂွံဆက်သ္ကာတ်မြဟ်ကၠုၚ်ရနွံဏောၚ်။ ဟိုတ်ဂှ်ရ မိမညးဍုၚ်ကွာန်တံ အရာရာအိုဿီု စွံသတိကဵုပရေၚ်ဂီုကၠီုတုဲ လ္ၚဵုတံဂှ်တှ်ေ သွက်ဂွံပ္ကောံပ္ကေဝ်လဝ် သွက်ပရေၚ်စသုၚ်မံၚ်စံၚ်တံဂှ်လေဝ် မိက်ဂွံအာတ်မိက်ညးဍုၚ်ကွာန်တံရ။ တုဲပၠန် ညံၚ်ဂွိုအ်မံၚ်ကြပ်ကဵုဒပ်ကံၚ်ဇြဳပၞာန် ညံၚ်ဂွိုအ်အာကၠုၚ်ဂှ်လေဝ် ပိုယ်တံ မိက်ဂွံအာတ်မိက်ဏာရ” သာ်ဝွံ သ္ဂးရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF မဒှ်ဒပ်ပၠန်ဂတးရပ်လွဟ်မန် မံက်တိတ်ကၠုၚ် အပ္ဍဲပၞာန်သီအဝဵုဏံဂှ်လေဝ် သွက်ဂွံထ္ပက်ပၞာန် ဌာန်ဂအုပ်တမ်ဒပ် ဗ္ဒိုပ်ဒပ်ကံၚ်ဇြဳပၞာန်တံမာန်ဂှ် ပလေဝ်ပလေတ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲတွဵုရးဍုၚ်မန် အပ္ဍဲကာလသီအဝဵု ပွိုၚ်ပိသၞာံဏံ ပ္ဍဲကဵုပွိုၚ်ဍုၚ် ဇြဟတ်ပၠန်ဂတးရပ်လွဟ် ဇြဟတ်ချဳဒရာၚ်ခိုဟ်တံဂှ် လုပ်စိုပ်ဗ္တိုက် ဗ္ဒိုပ်သၞေဟ်ကၚ် ဗ္ဒိုပ်ဗၠာဲသၟိၚ် ဗ္ဒိုပ်မုက်ပၞာန် သၟဝ်တဲကံၚ်ဇြဳပၞာန်တံဂှ်တုဲ ပေါဲဗ္တိုက်ဆေၚ်မုက်ၜါလ္ပာ်တံ သ္ကာတ်မြဟ်ဒၟံၚ်တံလေဝ် နွံလဝ်ရ။
မွဲလ္ပာ်ဂှ်ပၠန် သီုကဵုဌာန်ဂအုပ်ပၞာန်ရးအဂၞဲ ဖျေံသ္ဇိုၚ်မတ်မလီု ကေတ်လဝ်တာလျိုၚ် စပ်ကဵုပရေၚ်ဂီုကၠီု၊ ပရေၚ်စဵုဒၞါ သွက်ကံၚ်ဇြဳပၞာန် ပ္ဍဲကဵုဒေသမန်ကဵု ကရေၚ်ဂှ်ကီု၊ ဌာန်ဂအုပ်ကောပ်ကာဲပရေၚ်ပၞာန်တံ၊ တမ်ဒပ်တံဂှ် ဗ္တိုက်ဂြာတ်ဒၟံၚ်မခတိုဟ် နကဵုဒရုၚ်တံလေဝ် နွံလဝ်ရ။
ဆ္ဂး ဒဵုကဵုအခိၚ်လၟုဟ် ကုန်ဗျူဟာ ကံၚ်ဇြဳပၞာန် အပ္ဍဲဒေသမန်တံ၊ ဌာန်ဂအုပ်တမ်ဒပ်တံ၊ ဌာန်ဂအုပ်ကောပ်ကာဲပရေၚ်ပၞာန်တံ၊ ဒပ်အမၠံက်တံဂှ်တှ်ေ အကာဲအရာလုပ်စိုပ်ဗ္တိုက် ထ္ပက်ပၞာန်တံဂှ် ဟွံဂွံဆဵုကေတ်ဏီရ။
ဗိုလ်ယာန်နာၚ် သ္ကိုပ်ပြုပြေၚ်ပၞာန် ကရောၚ်ပၞာန်ဒဝ်န ဖျေံသ္ဇိုၚ်ပွိုၚ်ဍုၚ်ရေဝ် ဒေသပၞာန်သ္ကုတ်သၠုၚ်ကျာဂှ် ဂွံသၠုၚ်ပ္တိုန်အသိၚ်ပၞာန် အရာမၞုံပၟိက်တံ ဂၠိုၚ်ဒၟံၚ်ကွေံကွေံဂှ်တုဲ ကေတ်အခိၚ်တုဲ ပလေဝ်ပလေတ်ကၠုၚ်ဒၟံၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“သၠုၚ်ပ္တိုန်အသိၚ်ပၞာန်ဂှ်တှ်ေ ပလေဝ်ကၠုၚ်ဒၟံၚ်လၟိုန်ရဏောၚ်။ ဆ္ဂး တၚ်နွံပၟိက်ဂှ်တှ်ေ ဂၠိုၚ်ဒၟံၚ်ကွေံကွေံတုဲ ပိုယ်တံလေဝ် ကေတ်အခိၚ်တုဲ ပလေဝ်ဒၟံၚ်ရဏောၚ်။ သၞဇီုကပိုက်ပြဟ်လလုဲဂှ်တှ်ေ သရောပ် ၆ ဂိတုတှ်ေ နကဵုဗီုပြၚ် ၆ ဂိတုဂှ် ဂွံပ္တိတ်အာနွံ။ နကဵုညးဍုၚ်ကွာန်တံ တၚ်ဒးဒ္ဂေတ်ဗက်၊ တၚ်ဒးဝေၚ်ပါဲတံဂှ် နူကဵု Page ကရောၚ်ပၞာန်ပိုယ်တံ ပ္တိုန်ကဵုဒၟံၚ်တံ နွံရ၊ မၚ်ကျောဝ်ဗဵုအိုတ်ညိ” သာ်ဝွံ သ္ဂးရ။
အခိၚ်လၟုဟ် နကဵုကောန်ဒပ်ကံၚ်ဇြဳပၞာန်ဂမၠိုၚ် လ္ပာ်ဒေသ ကရောၚ်ပၞာန်ဒဝ်န ချဳဒရာၚ်ဒၟံၚ်ဂှ် ဟွံထ္ပက်ကရောၚ်ပၞာန်မွဲသာ် ဒှ်ဒၟံၚ်ဗီုပြၚ် ပလေတ်ကၠုၚ်ဒၟံၚ်ပၞာန်ဒုၚ် ဗွဲမခိုၚ်ဗိုန် နွံဂှ် ညးလဴထ္ၜးရ။
ကရောၚ်ပၞာန်ဒဝ်နဝွံ ဒှ်ကရောၚ်ပၞာန် ဒပ်ပၞာန်စဵုဒၞါညးဍုၚ်ကွာန် PDF ၊ အလဵုအသဳညဳသၟဟ်ဂကူ NUG ချဳဒရာၚ်ဒၟံၚ် ပ္ဍဲဒေသသ္ကုတ်သၠုၚ်ကျာဍုၚ် ဒေသမန်၊ ကရေၚ်၊ တၞၚ်သဳတံမွဲရ။
သၞာံတုဲကၠုၚ်တေံ ပ္ဍဲဂိတုဒဳဇြေမ်ဗာဂှ် ဒုဝန်ဇၞော် ကာစဵုဒၞါ NUG နာဲကဴရတ်ဂှ် ညးတာလျိုၚ် ဒေသပၞာန်ရးသၠုၚ်ကျာ၊ ဒပ်ပၠန်ဂတးဍုၚ်မန် MSRF ကေုာံ ကရောၚ်ပၞာန်ဒဝ်န ဒပ်ပၠန်ဂတး ၜိုတ် ၁၀ ဂကောံ ကၠုၚ်စိုပ်ဆဵုဂဗလဝ်တုဲ သဳကၠဳလဝ်ပရေၚ်ပၞာန်ရ။
ဒပ်လကိုဟ်ဍုၚ်ရေဝ် ဖျေံသ္ဇိုၚ်ပွိုၚ်ဍုၚ်ရေဝ်ဂှ်လေဝ် ထ္မံက်အာရုပ်ရဴ ပရေၚ်ပၞာန် ဂၠံၚ်လကိုဟ်လိုန်ဂှ်ဏောၚ်တုဲ အပ္ဍဲတွဵုရးဍုၚ်မန် အခိၚ်ဒၞါဲဟွံရုဲ ပေါဲဗ္တိုက်ဒှ်ကၠုၚ်မာန်ဂှ်ရ ညးဍုၚ်ကွာန်တံ ပသတိကဵုအာကၠုၚ်ဂှ် ပ္ဍဲဂိတုမာတ် ၁၀ တေံ ကဵုလဝ်သမ္တီရ။
ပရိုၚ်−သြၚ်လောန်တိုၚ်(မ်)