မတ်မလီု၊ မာတ် ၁၇
နကဵုသၟတ် ပါလုပ်ဒၟံၚ် အပ္ဍဲအာယုက်အပိုၚ်အခြာလုပ်ပၞာန်ဂွံတံဂှ် ဟိုတ်ဟွံခိုၚ်ကၠိုက်မွဲသာ် ယဝ်ရပါဲဒလေတ် သ္ဂောံယိုက်ဂၠေၚ်လျိုၚ်ပၞာန်ဂှ်မ္ဂး စၟတ်သမ္တီကေတ်အာရေဝ် နဒဒှ်ရဲဂြိပ်ဝါရာန်တံဏောၚ်ဂှ် လ္ပာ်ကံၚ်ဇြဳပၞာန် ဘပဠကၠုၚ်ရ။
အတိုၚ်စရၚ်သ္ၚိကၟိန် ညးပါလုပ်ဒၟံၚ် ဂွံယိုက်ဂၠေၚ်လျိုၚ်ပၞာန်မွဲတၠဝွံ ယဝ်ဟွံမွဲပ္ဍဲသ္ၚိမ္ဂး ညးအုပ်လဒံမိမသှ်ေဒၟံၚ် ဟွံသေၚ် မသကလောကောဒေံမွဲမွဲတၠဂှ် ဒးကဵုဟိုတ်ခိုၚ်ၚ်ကၠိုက်က်ဏောၚ် သ္ဂးရ။
ယဝ်ရဟိုတ်ဟွံခိုၚ်ကၠိုက်မ္ဂး စၟတ်အာ နဒဒှ်ရဲဂြိပ်ဝါရာန်ဏောၚ်ဂှ် ညးတာလျိုၚ် ဂကောံကော်ပကောန်ပၞာန်ကဆံၚ်ဗဟဵုမွဲတၠ သှ်ကဵုလဝ် ဌာန်ပရိုၚ် Myanmar Now ရ။
စပ်ကဵုညးပါဲဒလေတ်အာ ဟွံမိက်ယိုက်ဂၠေၚ်လျိုၚ်ပၞာန် သၟဝ်တဲကံၚ်ဇြဳပၞာန်တံဂှ်တုဲ ကေတ်အရေဝ် ကုမၞိဟ်အုပ်လဒံတံဟာ၊ ဟွံကေတ်ဂှ်ဟာဂှ် စုတ်လဝ် ပ္ဍဲကဵုနဲဥပဒေဂွံယိုက်ဂၠေၚ်လျိုၚ်ပၞာန် တိတ်ကၠုၚ်ခြာဟွံလအ်ဏံဏောၚ်ဂှ် သ္ဂးရ။
ညးရေၚ်တၠုၚ်ဂဗုတ် ကၠတ်ထဝ်သၞောဝ်ဓဝ်ဝှ်ကြံၚ် ဥူကျဳမျေတ်ဂှ် ဂွံလုပ်ပၞာန်ဂှ် အာယုက်ပေၚ်ကီုလေဝ် ကုညးဟွံမွဲ အပ္ဍဲဍုၚ်တံဂှ် ဂွံလလောၚ်တြး နဒဒှ်မၞိဟ်ဂြိပ်ဝါရာန် လွာဲဂှ်ဂှ် ပဟွံဂွံတုဲ စၟဳတ်အဆံၚ်ၚ်တုဲ ရုၚ်သၞောဝ်ဓဝ် ဖျေံအမိၚ်မှဟေၚ် စၟတ်အာ နဒဒှ်ရဲဂြိပ်ဝါရာန်ဂွံဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“စၟတ်အာ နဒဒှ်ရဲဂြိပ်ဝါရာန်ဟီုမ္ဂး ဒးစၟဳတ်ဒၟံၚ်ဏီဏောၚ်၊ ဒးစၟဳတ်ဒၟံၚ်ဂဗုတ်ဏီဏောၚ် လလောၚ်တြး နဒဒှ်ညးဂြိပ်ဝါရာန် အတိုၚ်ဏံ ဟွံဂွံပုဟ်၊ ဂြိပ်တိတ်ဟာ ကၠေံအာဗီုလဵုရောဟီုဂှ် လဝက ဒးကော်စၟဳတ်ဏောၚ်၊ ဒးကော်စၟဳတ် မိမတံဏောၚ်၊ ဒးကော်စၟဳတ် သက်သဳ လ္ပာ်အလဵုအသဳတံဏောၚ်၊ တုဲမှ ဒးလောၚ်တြး သာ်ဏံဏောၚ်၊ လလောၚ်တြး အတိုၚ်ဏံဂှ် ဟွံဂွံပုဟ်၊ ဒးပ္တိုန်ဒၟံၚ် ရုၚ်သၞောဝ်ဓဝ်ဏီဏောၚ်၊ ဟွံမွဲပုဟ်ဟီုမှ လိက်ဍေံတံ ကော်စိုပ်လဝ်ဂှ်လေဝ် ဒးပ္တိုန်ဏောၚ်၊ ဒဒှ်ရဍေံတံ ကော်စိုပ်လဝ် တ္ၚဲလဵုအခိၚ်လဵု ကော်လဝ် ညးဂှ်ထ္ပက်လဝ်စၟတ်တဲ အရာတံဏံအိုဿီုဂှ် ဒးပ္တိုန်ရုၚ်သၞောဝ်ဓဝ်ဏောၚ်၊ ရံၚ်ညအ်တုဲမှ နူကဵုရုၚ်သၞောဝ်ဓဝ် စၟဳတ် ရဲဂြိပ်ဝါရာန်တုဲ လလောၚ်တြးဂွံဏောၚ်၊ လလောၚ်တြး အတိုၚ်ဏံ ဟွံဂွံပုဟ်လေဝ်၊ လၟုဟ်ဂှ် မုနဲဥပဒေ လၟေၚ်ကမၠောန်တံမှ ဟွံဂွံတိတ်ဏီမွဲသာ် လလောၚ်တြး နဒဒှ်ညးဂြိပ်ဝါရာန်ဂှ် ဟွံဂွံပုဟ်၊ ဒစဵုဒစးသၞောဝ်တုဲ ဗီုမိက်ဂွံလလောၚ်တြးဂှ် လလောၚ်ဟွံဂွံပုဟ်လေဝ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ နဲဥပဒေ ကေုာံ လၟေၚ်ကမၠောန် ဂွံယိုက်ဂၠေၚ်လျိုၚ်ပၞာန်တံဂှ် ဍေံတံချူခၞံဒၟံၚ် ဗီုမၞုံပၟိက်ဂှ်တုဲ ဗီုဍေံတံ မိက်ဂွံကၠောန် ကၠောန်ကၠုၚ်မာန်ဂှ်ရ နကဵုညးဍုၚ်ကွာန်တံ နွံပၟိက်ဒးစွံသတိဂှ် ဥူကျဳမျေတ် ကဵုလဝ်သတိရ။
ညးလ္ၚတ်သ္ၚဳဂၠိပ် ပရေၚ်ဍုၚ်ကွာန် ဝှ်ကြံၚ် ဥူတာန်သဵုနာၚ်ဂှ်လေဝ် နကဵုညးသၟတ်တံ မ္ၚးနူကဵုဟွံဒးဒုၚ်စောဲလဝ်ဂဗုတ်ဂှ် ဒးဒုၚ်ဖျေံလဝ်ဒုဟ်ဒဏ်မွဲမွဲသာ်လေဝ် ဟွံမွဲမွဲသာ် စၟတ်ကေတ်အာ နဒဒှ်ရဲဂြိပ်ဝါရာန်ဟီုဂှ် ရံၚ်ကဵုသၞောဝ်မ္ဂး ဒှ်တၚ်သ္ဂုတ်သွာတ် ဟွံဗဗွဲဓဝ်ဏောၚ်ဂှ် ပါ်ပါဲလဝ်ရ။
“ ရဲဂြိပ်ဝါရာန်ဟီုတှ်ေ နကဵုညးတံ ဟွံဒးစိုတ်အစဳအဇန်ဏံတုဲ ပါဲဒလေတ်ဂှ် မူဟိုတ် ဂွံဒှ်ညးကလိလောန်ဒုဟ်ရောဟီုဂှ် ထေက်ကဵုဒးဗ္စာရဏောၚ်၊ ရံၚ်ကဵုသၞောဝ်မ္ဂး ဍေံတံဂှ် ဒှ်မၞိဟ်ဒးဒုၚ်စောဲလဝ်ဂဗုတ်လေဝ် ဟွံသေၚ်ပုဟ်။ တုဲပၠန် စပ်ကဵုပရူဏံတုဲ ဒှ်မၞိဟ်ဒးဒုၚ်ဖျေံစၟတ်လဝ် ဒုဟ်ဒဏ်မွဲမွဲသာ်လေဝ် ဟွံသေၚ်မွဲသာ် ယဝ်ရပါဲဒလေတ်ညအ်ဂှ် စၟတ်သမ္တီအာ နဒဒှ်ရဲဂြိပ်ဝါရာန်ဟီုတှ်ေ ရံၚ်ကဵုသၞောဝ်မ္ဂး ဒှ်တၚ်သ္ဂုတ်သွာတ် ဟွံဗဗွဲဓဝ်ကွေံကွေံရဏောၚ်” သာ်ဝွံ သ္ဂးရ။
သ္အာၚ်နူဂှ်ပၠန် ညးဍုၚ်ကွာန်တံဂှ် ဒုဟ်ဒဏ်ဟွံမွဲမွဲသာ် ကုညးဟွံမိက်လုပ်ပၞာန်တံဂှ် ကံၚ်ဇြဳပၞာန် ကၠောန်ကၠုၚ်ဂွံလလောၚ်တြး နဒဒှ်ရဲဂြိပ်ဝါရာန်ဟီုဂှ်ဝွံ လ္ဂောံကဵုသၞောဝ်မ္ဂး ဖံက်ပ္ကဝ်ဒၟံၚ်အခေါၚ်အရာမၞိဟ် မံက်က်ထေၚ်ၚ်ဏောၚ်ဂှ် ပါ်ပါဲလဝ်ရ။
ကံၚ်ဇြဳပၞာန်ဝွံ ပၠောပ်လမျီု သၞောဝ်ယိုက်ဂၠေၚ်လျိုၚ်ပၞာန်ဂှ်တုဲ ဂွိုအ်ပေၚ်မွဲဂိတုဏီ ချူခၞံ နဲဥပဒေ (မူတတိယ) ကဵု လၟေၚ်ကမၠောန်တံ တုဲယျဂှ် ဝန်ဇၞော်ကာစဵုဒၞါ ဟီုပ္တိတ်ကၠုၚ် ပ္ဍဲကဵုကောံဓရီု ကော်ပကောန်ပၞာန်ကဆံၚ်ဗဟဵု မကၠောန်ဗဒှ်လဝ် ပ္ဍဲဂိတုမာတ် ၄ တုဲကၠုၚ်တေံရ။
အခိၚ်လၟုဟ်ဂှ် ကံၚ်ဇြဳပၞာန်ဝွံ ကၠာနဲဥပဒေ ယိုက်ဂၠေၚ်လျိုၚ်ပၞာန်တံကဵု လၟေၚ်ကမၠောန်တံ ဂွိုအ်တိတ်ဏီဂှ် လ္ဂုၚ်၊ မာန္တလေဝ်တံ မပါလုပ် ပ္ဍဲကဵုရးဒေသဇၞော် ကေုာံ တွဵုရးတံဂှ် သွက်ဂွံယိုက်ဂၠေၚ်လျိုၚ်ပၞာန် ကော်ညးသၟတ်ဒေသတံကီု၊ ကံက်မာဲရုဲစှ်ဒၟံၚ် သွက်ဂွံယိုက်ဂၠေၚ်လျိုၚ်ပၞာန်တံ ကၠောန်ၜိုတ်ဒၟံၚ်ရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်မ္ဂး ဇၟာပ်ကောန်ဍုၚ် အာယုက်ပေၚ်တုဲတံ အောန်အိုတ် နူ ၂ သၞာံ စဵုကဵု ၅ သၞာံ ဒးလုပ်ယိုက်ဂၠေၚ်လျိုၚ်ပၞာန်ဏောၚ်တုဲ ဟွံယိုက်ဂၠေၚ်လျိုၚ်ပၞာန်မ္ဂး ဒးဒုၚ်ဖျေံစၟတ်ဒုဟ်ဒဏ် စဵုကဵုဒဏ်ထံၚ် ၅ သၞာံ သၠုၚ်အိုတ်မာန်ဂှ် စၞောန်ပျးလဝ်ရ။
ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ သၟတ်အပ္ဍဲဒေသ ဗွဲမဂၠိုၚ်ဝွံ အရိုဟ်ဟ်တ္ၚဲ တိတ်စ္ဍးအာဒၟံၚ် ဍုၚ်ဇိုၚ်ဝုတ်ဒိုဟ်တံကဵု တိဍာ်ဗၠးၜးတံ နကဵုဇြဟတ်လၟိဟ်ဗွဲမဂၠိုၚ်ဂၠေၚ်ဂှ် ဂွံတီကေတ် အတိုၚ်ဂလာန်ညးဒေသတံရ။
ပရိုၚ်−သြၚ်လောန်တိုၚ်(မ်)