ကျာ်ထဝ်၊ မာတ် ၁၉
ညးမပ္တိတ်ဒၟံၚ်ဇြဟတ် ဂွံထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန် ပ္ဍဲပွိုၚ်ဍုၚ်ကျာ်ထဝ် တွဵုရးဍုၚ်မန်ဂှ် စၟတ်ကေတ် နဒဒှ်ပွန်ပရေၚ်ပၞာန်တုဲ ကေတ်အာအရေဝ် ကဵုအာဒုဟ်ဏောၚ်ဂှ် ဇြဟတ်ပၠန်ဂတးကျာ်ထဝ် KRF လလောင်ပ္တိတ်လဝ် တၚ်ကဵုသတိရ။
ပ္ဍဲကဵုလိက်ကဵုသတိ KRF မလလောၚ်ပ္တိတ်လဝ် နကဵုစၟတ်တ္ၚဲ ဂိတုမာတ် ၁၇ ဂှ် ပ္ဍဲပွိုၚ်ဍုၚ်ကျာ်ထဝ်ဂှ် သ္ကိုပ်အုပ်ဓုပ်ကွာန်အရာပ် သၟဝ်တဲကံၚ်ဇြဳပၞာန်တံ ဗက်ကံက်ဒၟံၚ်စရၚ် မွဲအရာပ်၊ မွဲဂကောံကွာန်မ္ဂး သၟတ် ၁၀ တၠ သွက်ဂွံယိုက်ဂၠေၚ်လျိုၚ်ပၞာန်ဂှ် သ္ဂးရ။
ဟိုတ်ဂှ်ရ သၞာဲဒဴဌာနမဆေၚ်စပ်တံ၊ သ္ကိုပ်အုပ်ဓုပ်ကွာန်အရာပ်တံ၊ က္ဍိုပ်သ္ၚိကၠံ၊ က္ဍိုပ်သ္ၚိစှ် ကေုာံ ဇၟာပ်လေံထံက်ကံၚ်ဇြဳပၞာန် မပါလုပ်ဒၟံၚ် ပ္ဍဲပရေၚ်ထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တံဂှ် ကေတ်အာအရေဝ်ဏောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ညးဒုၚ်တာလျိုၚ် လလောၚ်ပရိုၚ် KRF ဂှ် သဳကၠဳချပ်ဂၞန်ကဵု ကောန်ဂကောံသီုဖအိုတ်တုဲ သွက်ဂွံစၟတ်ကေတ် ကုညးမပ္တိတ်ဒၟံၚ်ဇြဟတ် သွက်ဂွံထ္မံက်ရုပ်ရဴ သၞောဝ်ယိုက်ဂၠေၚ်လျိုၚ်ပၞာန်တံ နဒဒှ်ပွန်ပရေၚ်ပၞာန်တုဲ ဂွံဗ္တိုက်သရိုဟ်အာဂှ် သ္ဂုတ်သွာတ်လဝ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞောဝ်ယိုက်ဂၠေၚ်လျိုၚ်ပၞာန်ဝွံ ကံၚ်ဇြဳပၞာန်ဂှ် ရံၚ်ကဵုဂုဏ်ဖဵုဍေံတံတုဲ ကၞောတ်တဲ ပ္တိတ်ဒၟံၚ်ဇြဟတ် ဂွံလိုန်ပိန်ညးဍုၚ်ကွာန်တံဂှ်ရ နကဵုသၟတ်ဂမၠိုၚ် သွက်ဂွံလုပ်စိုပ်ယိုက်ဂၠေၚ်လျိုၚ်ပၞာန် ဇရေၚ်ဂကောံပၠန်ဂတးတံဂှ် ဖ္တိုက်ဖ္အောဝ်လဝ်ရ။
အတိုၚ်ဂလာန် ညးဒေသတံဂှ်မ္ဂး ပ္ဍဲပွိုၚ်ဍုၚ်ကျာ်ထဝ် စနူဂိတုမာတ် သတ္တာဟဒုတိယတုဲကၠုၚ်တေံတုဲ ဂကောံအုပ်ဓုပ်ကံၚ်ဇြဳပၞာန်တံ စကေတ်ဒၟံၚ်စရၚ် ဂွံယိုက်ဂၠေၚ်လျိုၚ်ပၞာန်ဂှ်တုဲ သၟတ်ဟွံမိက်ယိုက်ဂၠေၚ်လျိုၚ်ပၞာန်တံဂှ် ပါဲဒလေတ်ဒၟံၚ်တံ နွံဒၟံၚ်ရောၚ် ဂွံတီကေတ်ရ။
လအာတုပ်သာ်ဂှ်ကီု ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် NMSP AD ဂှ်လေဝ် နကဵုသ္ကိုပ်အုပ်ဓုပ်ကွာန်၊ အရာပ်တံ ယဝ်ရပလံၚ်ဏာ ညးသၟတ်တံ သွက်ဂွံလုပ်ပၞာန် ဇရေၚ်ကံၚ်ဇြဳပၞာန်ဂှ်မ္ဂး ကေတ်အာအရေဝ် ဗွဲမစိုပ်တရဴဏောၚ်ဂှ် ပ္ဍဲဂိတုမာတ် ၁၅ တေံ လလောၚ်ပ္တိတ်လဝ်အမိၚ်ရ။
ပရိုၚ်−သြၚ်လောန်တိုၚ်(မ်)