ရေဝ်၊ မာတ် ၁၉
တွဵုရးဍုၚ်မန် ပွိုၚ်ဍုၚ်ရေဝ် ဗ္ဒါဲကွာန်ဒဒန်ဇုက်ကဵု ကွာန်စဳပျးဂှ် မွဲတ္ၚဲဓဝ် မၞိဟ်တြုံ ၂ တၠ ဒးဒုၚ်ဂစိုတ်လဝ်ရောၚ် ဂွံတီကေတ် အတိုၚ်ဂလာန် ညးတာလျိုၚ် ဂကောံရီုဗၚ်ဟံၚ်ပြာ်မှာဇန်တံကဵု ညးဒေသတံရ။
ပ္ဍဲဂိတုမာတ် ၁၇ အခိၚ်နူဂယး ၜိုတ် ၉ နာဍဳ အကြာကွာန်စဳပျးကဵု ကွာန်ဒဒန်ဇုက် လ္တူဂၠံၚ်ရေဝ်−ဇြပ်ဗုဂှ် မၞိဟ်တြုံအာယုက် ၅၀ သၞာံပြၚ်မွဲတၠ ကၠေၚ်ဒက်လဝ်တဲတုဲ ချိုတ်ဒၟံၚ် နကဵုဝပ်ဗာ်လဝ်ကအ်ကဵုမြဂှ် ဂွံကလေၚ်ဆဵုကေတ်ရ။
ပ္ဍဲကဵုတ္ၚဲဂှ် အခိၚ်နူဂယး ၜိုတ် ၁၁ နာဍဳဂှ်လေဝ် ပ္ဍဲကဵုသၞေဟ်ကၚ်စၟဳတ်ကံၚ်ဇြဳပၞာန်တြေံ မၞုံလ္တူဒဒန်ဇုက်ဂှ် မၞိဟ်တြုံ အာယုက် ၃၅ သၞာံမွဲတၠ ချိုတ်ဒၟံၚ် နကဵုဝပ်သေနာတ်ဂှ် ဂွံဆဵုကေတ်လဝ်ကီုရ။
မၞိဟ်တြုံချိုတ်အာလဝ် ၂ တၠဂှ် ဂကောံရီုဗၚ်ဟံၚ်ပြာ်မှာဇန်တံ ပလံၚ်ဗစိုပ်လဝ် ရုၚ်ဂဥုဲလၟိုၚ်တုဲ ဒးစံၚ်လဝ်ကဵု နဒဒှ်မသက္ကုတၠဂှ် ဂွံတီကေတ်ရ။
ပွိုၚ်ဍုၚ်ရေဝ် လလောၚ်တြးလဝ် ပရေၚ်အုပ်ဓုပ်ပၞာန်ဂှ်ဝွံ အပ္ဍဲကာလသီအဝဵုဏံ လၟေၚ်ဒဒှ် ညးဍုၚ်ကွာန်ကောန်အရာပ်တံ ဒးဒုၚ်ပြိုက်ဂစိုတ်ဂှ်ကီု လၟေၚ်ဒဒှ်ပၠံၚ်ၜးကပေါတ် ဂစိုတ်မၞိဟ်တံဂှ်လေဝ် က္တဵုဒှ်ဒၟံၚ် လၟိုန်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) တံ ၜိုတ်က္ဍစိုပ် ပ္ကောံပ္ကေဝ်ဂွံလဝ်ဂှ်မ္ဂး ပ္ဍဲပွိုၚ်ဍုၚ်ရေဝ် အပ္ဍဲကာလသီအဝဵုဏံ ညးကလိလောန်ဒုဟ်ဟွံမံက်မွဲသာ် ဂဗုတ်ဒးဒုၚ်ပြိုက်ဂစိုတ်လဝ်တံ ဟွံအောန်နူကဵု ၃၀ နွံဒၟံၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)