မတ်မလီု၊ မာတ် ၁၉
ပ္ဍဲတိဍာ်ထိၚ်ဒက် ဂကောံဒေါအ်ပန်ပှော် ၇ ဂကောံတံဂှ် စအုပ်ဓုပ်အာ နကဵုသၞောတ်အုပ်ဓုပ်အပိုၚ် အခေါၚ်စၞောန်ပျးအပိုၚ်တံဏောၚ်ဂှ် သ္ကိုပ်ဗိုလ်ဇၞော် ယောန်သေတ် က္ဍိုပ်သ္ကိုပ်ကံၚ်ဇြဳကလေၚ်ဒက်ပ္တန်ရးသေံ RCSS ဟီုပ္တိတ်ကၠုၚ်ရ။
ကောံဓရီုဇၞော် ဂကောံရပ်လွဟ်ကောန်ဍုၚ်အရၚ်ဒေါအ်လဝ်ပန်ပှော် ၇ ဂကောံ ကၠောန်ဗဒှ်ဒၟံၚ် ပ္ဍဲဍုၚ်ၛၚ်မာဲ ဍုၚ်သေံဂှ် စလဝ် ပ္ဍဲဂိတုမာတ် ၁၇ တေံတုဲ သ္ကိုပ်ဗိုလ်ဇၞော်ယောန်သေတ် မဒှ်သဘာပတိဂှ် ဟီုဂးစုတ်လဝ် နဒဒှ်ဂလာန်သြဝါဒပံက်အသေအဟာန်ရ။
ရေၚ်တၠုၚ်အာ ပရေၚ်အုပ်ဓုပ်၊ ပရေၚ်ဂီုကၠီု၊ ပရေၚ်ပိုန်ဒြပ်၊ ပရေၚ်ပညာ၊ ပရေၚ်ထတ်ယုက်၊ ပရေၚ်စသုၚ်မံၚ်စံၚ် ကေုာံ ကမၠောန်ဒုၚ်ကာတၞဟ်သ္အာၚ် သွက်ညးဍုၚ်ကွာန် မၞုံအပ္ဍဲဒေသတံဂှ်ဏောၚ်တုဲ ဒးဒက်ပ္တန်အာ ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ မွဲကဆံၚ်တုဲမွဲကဆံၚ်ဏောၚ်ဂှ် သ္ကိုပ်ဗိုလ်ဇၞော် ယောန်သေတ် ဟီုလဝ်ရ။
သၟာပရေၚ်ဍုၚ်ကွာန်ဝှ်ကြံၚ် ဥူဖေတာန်ဂှ် အခေါၚ်အုပ်ဓုပ်အပိုၚ် ဂကောံဒေါအ်ပန်ပှော် ၇ ဂကောံဂှ်ဝွံ ဒးအာတ်မိက်ပ္ညဳပ္ညပ်အာ ကုဒပ်ပၞာန်ဏီဏောၚ်တုဲ အခိၚ်ကၠတ်ထဝ်မံက်ကၠုၚ်မှ ဒးသ္ပဒတန်တုဲ ဒပ်ပၞာန်ဂွံဒုၚ်တဲ ဟွံလောဲပုဟ်ဂှ် သ္ၚဳဂၠိပ်လဝ်ရ။
“အခေါၚ်အုပ်ဓုပ်အပိုၚ် အခေါၚ်စၞောန်ပျးအပိုၚ် ညးတံဟီုဒၟံၚ်ဟီုဂှ် ဒှ်ၜိုတ်ညးတံချိၚ်ခယျလဝ်ညိကီု။ နတဲဏံဂှ် ပါ်တိတ်နူ ၂၀၀၈ တုဲ အခေါၚ်အုပ်ဓုပ်တၞဟ်ခြာဂှ် ကဵုအာအခေါၚ်ကၠောန် ကုညးတံ ဟွံသေၚ်ပုဟ်။ ညးတံ ဒးအာတ်မိက် ဒးပ္ညဳပ္ညပ်ဒၟံၚ် ကဵုဒပ်ပၞာန်ဏီဏောၚ်။ တုဲပၠန် အတိုၚ်ကဆံၚ်ညးတံမၞုံပၟိက်ဂှ် ကၠတ်ထဝ်မံက်ကၠုၚ်မှ ဒးသ္ပဒၟံၚ်ဒတန်ဏီဏောၚ်။ ဟွံကၠောန်သာ်ဏံတှ်ေ စိုတ်ဆန္ဒမိက်ဂွံကၠောန် အတိုၚ်ဍေံတံချူဓဇက်လဝ်ဂှ်ရဏောၚ်ဒှ်။ နတဲဏံဂှ် ဒပ်ပၞာန်ဂွံဒုၚ်တဲဂှ် ဝါတ်ဒၟံၚ်” သာ်ဝွံ သ္ဂးရ။
လ္ဂောံကဵုအကာဲအရာပရေၚ်ပၞာန်၊ ပရေၚ်ဍုၚ်ကွာန် က္တဵုဒှ်ဒၟံၚ်လၟုဟ်မ္ဂး နကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် တိဍာ်ထိၚ်ဒဝ် သွက်ဒေသအခေါၚ်အုပ်ဓုပ်အပိုၚ်တံဂှ်ဝွံ ဂွံဒှ်ကၠုၚ်အတိုၚ်ဗီုပြၚ်ထ္ၜုတ်လဝ်ဂှ် ဟွံလောဲတုဲ လောန်ၜက်အာ နူသၞောဝ်သ္ဇိုၚ်ဒက်ပ္တန် ၂၀၀၈ တုဲ ကလိဂွံအာအခေါၚ်ကၠောန်ဟွံသေၚ်ပုဟ်ဂှ် ဥူဖေတာန် ထံက်ထ္ၜးလဝ်ရ။
ညးလ္ၚတ်ပရေၚ်ကောန်ဍုၚ်အရၚ်မွဲတၠဂှ် “သၞောတ်အုပ်ဓုပ်အပိုၚ် သ္ကိုပ်ဗိုလ်ဇၞော်ယောန်သေတ်ဟီုဂှ်လေဝ် ဒှ်သဘဴပရေၚ်ဍုၚ်ကွာန်ရဏောၚ်။ ဒှ်မာန်အိုတ်ဂှ်တှ်ေ ဒေသသၞောတ်အုပ်ဓုပ်ကံၚ်ဇြဳပၞာန်လီုတုဲ အဝဵုဟွံတန်ဒှ်အာတံဂှ် ဂကောံ ၇ ဂကောံဏံ ဂွံလုပ်အုပ်ဓုပ်အာနွံဏောၚ်။ ၜိုတ်ဏံရ။ ဒှ်ထေက်ဂှ်တှ်ေ အခိၚ်လၟုဟ် နကဵုဂကောံဒေါအ်ပန်ပှော်တံ ဗီုလဵုဂွံရပ်စပ်သောၚ်ကလးအာ သၞောဝ်ယိုက်ဂၠေၚ်လျိုၚ်ပၞာန်ကံၚ်ဇြဳပၞာန်ဂှ်ဟီုဂှ် ဒးသဳကၠဳဂၠါဲအာသွဟ် နကဵုမဟာဗျူဟာစှ်ေစှ်ေ ဂှ် နွံပၟိက်ယျ” သာ်ဝွံ ဟီုလဴထ္ၜးလဝ် လညာတ်ညးရ။
သ္ကိုပ်ဗိုလ်ဇၞော် ယောန်သေတ် ဂှ် အခိၚ်လၟုဟ် ပရေၚ်ဍုၚ်ကွာန်ဍန်တုဲ ဗွိုၚ်ပရေၚ်ပၞာန်သၠဲလးဒၟံၚ်ဂှ် နကဵုဂကောံဒေါအ်ပန်ပှော် ၇ ဂကောံ ရပ်စပ်မူဖေဝ်ဒရာ ဂကောံ EAO ၁၂ ဂကောံဒုၚ်လဝ်တဲဂှ်တုဲ ဒးဆက်အာတရဴဏောၚ်ဂှ် သ္ဂးရ။
ကၠာဂွိုအ်သီအဝဵုတေံ လိက်စံၚ်တၚ်တုပ်စိုတ် ၂၄ တၚ် မူသ္ဇိုၚ်ဖေဝ်ဒရာ ဂကောံဒေါအ်ပန်ပှော် EAO ၁၀ ဂကောံ ကေုာံ ဂကောံကချေၚ် KIO၊ ဂကောံကရေၚ်ဍာဲ KNPP တံ သဳကၠဳလဝ် ပွိုၚ် ၂ သၞာံဂှ် ထ္ပက်လဝ်စၟတ်တဲ ပ္ဍဲသၞာံ ၂၀၂၀ ဂိတုဖေဖဝ်ဝါရဳကြပ်အိုတ်တေံရ။
လိက်စံၚ်ဏံဝွံ ဒှ်မူသ္ဇိုၚ်ဖေဝ်ဒရာ သီုကဵုသၞောတ်ဖေဝ်ဒရာ ပါ်ပရအ်အဝဵု ဂကောံရပ်လွဟ်ကောန်ဍုၚ်အရၚ်တံ မၞုံပၟိက်ဂှ်ကီု၊ သၞောတ်အခေါၚ်အုပ်ဓုပ် ကေုာံ အခေါၚ်ချူခၞံ သၞောဝ်သ္ဇိုၚ်ဒက်ပ္တန် ပ္ဍဲတွဵုရးတံရ။
ဆ္ဂး မူသ္ဇိုၚ်ဏံဝွံ အခိၚ်ပ္တိတ်ဒၟံၚ်ဇြဟတ် သွက်သ္ဂောံဂွံတၚ်နၚ်သ္ဇိုၚ် သ္ဂောံဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳ အကြာအလဵုအသဳ ကေုာံ ဂကောံရပ်လွဟ်ကောန်ဍုၚ်အရၚ်တံ သီုၜါလ္ပာ်တုပ်စိုတ်မာန်ဂှ် ဒပ်ပၞာန် သီထောံအဝဵုကလေၚ်မွဲဝါပၠန်တုဲ ဒးတုဲဒှ်အာလဝ်ရ။
ပ္ဍဲကဵုကောံဓရီုဇၞော် ဂကောံရပ်လွဟ် ၇ ဂကောံဂှ် တၚ်ပ္တိုန်ဂလာန် စပ်ကဵုပရေၚ်ဍုၚ်ကွာန် ပလေဝ်ပလေတ်လဝ် သွက်ဗီုပြၚ်ဂကောံတၟိ (မူအပြောံ) ကေုာံ သၞောဝ်ဒက်ပ္တန်ဂကောံတၟိ (မူအပြောံ) တံဂှ် သဳကၠဳလဝ် ဗွဲမဂတးဂတန်တုဲ ဂွံသ္ပဒတန်အာ နွံဒၟံၚ်ရ။
သ္ပဒတန် သၞောဝ်ဒက်ပ္တန် (မူအပြောံ) ဂှ်မာန်မ္ဂး ဒက်ပ္တန်ဗီုပြၚ်ဂကောံတၟိဂှ်တုဲ ကၠောန်ဗက်အာ အတိုၚ်စေဝ်ပၞောန် မစၞောန်ပျးလဝ်ဂှ်မာန်မှဟေၚ် ဒှ်ကလောန်ဏောၚ်ဂှ် သ္ကိုပ်ဗိုလ်ဇၞော်ယောန်သေတ် သ္ဂးရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် ဂကောံဒေါအ်ပန်ပှော် ၇ ဂကောံဝွံ ပ္တိတ်ဒၟံၚ်ဇြဟတ် သွက်ဂွံထ္မံက်ရုပ်ရဴ ဂၠံၚ်တရဴ NCA မလီုဒၟံၚ်ဂှ်ဏောၚ်တုဲ ကၠောန်နတဲမာန် ဟွံမွဲပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ညးတံဂှ်တှ်ေ ဂွံဆက်ထ္မံက်ရုပ်ရဴ လၟေၚ်ကမၠောန်ကံၚ်ဇြဳပၞာန်ဂှ် ဗွဲမဂၠိုၚ်ဂှ် ဒှ်ဂကောံဇြဟတ် နူကဵုတိဍာ်ဇြဟတ်ဟွံမွဲတံဏောၚ်။ မုမှလေဝ် ထ္မံက်ရုပ်ရဴနတဲမာန်ဟွံသေၚ်ပုဟ်။ ညးတံဂှ် ဍာံဍာံတေံ ပ္တိတ်ဒၟံၚ်ဇြဟတ် သွက်ဂွံထ္မံက်ရုပ်ရဴ ဂၠံၚ်တရဴ NCA ကံၚ်ဇြဳပၞာန် မသရိုဟ်ဒၟံၚ်ဂှ်ဏောၚ်တုဲ နတဲဏံ ကမၠောန်ထ္မံက်ရုပ်ရဴမာန်ဂှ် မုမှကၠောန်ဟွံမာန်ပုဟ်” သာ်ဝွံ သ္ဂးရ။
ဂကောံဒေါအ်ပန်ပှော် ၇ ဂကောံဝွံ ကြဴနူသီအဝဵုတုဲ နကဵုဂကောံကဵုဒှ် မွဲဂကောံတုဲမွဲဂကောံကဵုဒှ် တိုန်စိုပ်သဳကၠဳလဝ် ပေါဲသဳကၠဳပရေၚ်ဍုၚ်ကွာန် ကံၚ်ဇြဳပၞာန် ကော်ဘိက်လဝ်တံ ဟွံအောန်နူကဵု ၆ ဝါရ။
အခိၚ်လၟုဟ် ပၞောဝ်ကဵုဂကောံဒေါအ်ပန်ပှော် ၇ ဂကောံဂှ် ဂအုပ်ဂကောံဗၠးၜးကောန်ဂကူပအိုဝ် PNLO ဂှ် ပ္ဍဲသၞာံဏံမံက်တေံ က္တဵုဒှ်လဝ်ပေါဲဗ္တိုက် ကုကံၚ်ဇြဳပၞာန် ပ္ဍဲတွဵုရးသေံသ္ကုတ်သၠုၚ်ကျာ စဵုကဵုဍုၚ်ဇြဳဇြိုၚ် ဒှ်ပတေၚ် သ္ကာတ်မြဟ်လဝ်ရ။
သ္အာၚ်နူဂှ်ပၠန် နူကဵုဗော်ဍုၚ်မန်တၟိ NMSP ဂှ် နဒဒှ်ဗော်ဍုၚ်မန်တၟိ ဗ္တိုက်သရိုဟ်တၠအဝဵုပၞာန် နာဲဇဲယသ္ကိုပ်သ္ကဂှ် ဗ္တိုက်သရိုဟ်အာ ဒပ်ပၞာန်သီအဝဵု ကရောံဂကောံဇြဟတ်ပၠန်ဂတးတံဏောၚ်ဂှ် လလောၚ်တြးလဝ်ပၞာန်ရ။
ပ္ဍဲကဵုဂကောံဒေါအ်ပန်ပှော် ၇ ဂကောံဂှ် ကံၚ်ဇြဳကလေၚ်ဒက်ပ္တန်ရးသေံ၊ ဗော်ဗၠးၜးဍုၚ်ရခေၚ်၊ ဂအုပ်ဂကောံဗၠးၜးကောန်ဂကူပအိုဝ်၊ ကံၚ်ဇြဳၜိုဟ်လလမ်ကရေၚ်၊ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ်၊ ဗော်သွးဒဳမဝ်ကရေတ်တေတ်လာဟူ ကေုာံ ဗော်ဍုၚ်မန်တၟိတံ ပါလုပ်ရ။
ပရိုၚ်−သြၚ်လောန်တိုၚ်(မ်)