မတ်မလီု၊ မာတ် ၁၉
ပ္ဍဲကဵုပွိုၚ်ဍုၚ် တွဵုရးဍုၚ်မန် ဗွဲမဂၠိုၚ်ဂှ် ဂကောံအုပ်ဓုပ်ကွာန်၊ အရာပ် ကံၚ်ဇြဳပၞာန်တံ ထ္ၜးဟိုတ်ကဵုသၞောဝ်ယိုက်ဂၠေၚ်လျိုၚ်ပၞာန်တုဲ အာတ်မိက်ဒၟံၚ်သြန် ဂၠိုၚ်ကဵုဆတံ နွံဒၟံၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဂကောံအုပ်ဓုပ်ကံၚ်ဇြဳပၞာန်ဝွံ စနူဂိတုမာတ် သတ္တာဟဒုတိယတုဲကၠုၚ်တေံတုဲ သ္ဂောံယိုက်ဂၠေၚ်လျိုၚ်ပၞာန်ဂှ် ဂကောံကွာန်မွဲမွဲဂကောံမ္ဂး ညးသၟတ် ၁၀ တၠ ကံက်စရၚ်ယၟု ကေုာံ ကၠုၚ်ကော်စိုပ်တံဂှ် ကၠောန်သ္ပဒၟံၚ်ရ။
ပ္ဍဲကဵုဏံ နကဵုဟိုတ် ဒးထံက်ပၚ်သြန် ညးသၟတ်ဒးဒုၚ်ကော်စိုပ်တံဂှ်ဏောၚ်ဂှ် မွဲကွာန်မ္ဂး အာတ်မိက်ဒၟံၚ် နူ ၁၀ ကိုဋ်ဒ္ကေဝ် စဵုကဵု ၃၀ ကိုဋ်တံ နွံဒၟံၚ်တုဲ ဒးထံက်ပၚ်ကဵုလၟေၚ်ဂိတုဏောၚ်ဂှ် ဟီုဒၟံၚ်တံလေဝ် နွံဒၟံၚ်ရ။
ပ္ဍဲကဵုအရာပ်၊ ကွာန်လ္ၚဵုတံဂှ် ညးသၟတ်ဟွံမိက်ယိုက်ဂၠေၚ်လျိုၚ်ပၞာန်တံဂှ် ပ္တိတ်ကဵုစၟတ်တဲ အခေါၚ်ဗၠးၜးတံဏောၚ်ဂးတုဲ စၟတ်တဲမွဲတၞးမ္ဂး စအာတ်ဒၟံၚ်သြန် နူကဵု ၅ ကိုဋ်ဒ္ကေဝ်ရ။
“ဍေံတံ (သ္ကိုပ်အုပ်ဓုပ်) တံ ဂွံစၟတ်တဲ အခေါၚ်ဗၠးၜးဏောၚ်ဂးတုဲ စၟတ်တဲမွဲတၞးဂှ် စနူ ၅ ကိုဋ် နူကဵုဗွိုၚ်ရဲသြန်နွံတံ ဗြုဒၟံၚ်ရ။ စၟတ်တဲ အခေါၚ်ဗၠးၜးသေၚ်၊ ဟွံသေၚ်ဂှ် ဟွံတီပုဟ်၊ ဍေံတံလေဝ် လီဠာန်စဒၟံၚ် နကဵုနဲကဲစုၚ်ဇဳဏောၚ်ဟီုတှ်ေ ဂွံပတှ်ေမၞိဟ်လဵုလေဝ် ဟွံတီပုဟ်၊ ဂွံဂွံစၟတ်တဲ အခေါၚ်ဗၠးၜးဏံဂှ် ဒးကဵုသ္ကိုပ်အုပ်ဓုပ် ၜိုတ်လဵုဏောၚ်၊ ဒးကဵုသ္ကိုပ်သ္ၚိကၠံတံ ၜိုတ်ဏံဏောၚ်၊ အောန်အိုတ်ဂှ်တှ်ေ ၅ ကိုဋ်ဂှ် ဂွံမိၚ်ကေတ်ရ” သာ်ဝွံ ညးဒေသမွဲတၠ ဟီုရ။
သ္ကိုပ်အုပ်ဓုပ်သၟဝ်ကံၚ်ဇြဳပၞာန်တံဂှ် နကဵုဗီုပြၚ်သာ်လဵု ပ္တိတ်အာကဵု စၟတ်တဲအခေါၚ်ဗၠးၜးတံဏောၚ်ဟီုဂှ် ဟီုဂးလဝ် ချိုတ်တ်ပၠိုတ်တ်ဟွံမွဲတုဲ အာတ်မိက်ဒၟံၚ်လှုဲကၠာသၟးဂှ် ဂွံတီကေတ်ရ။
လ္ဂောံကဵုသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်မ္ဂး ညးယိုက်ဝန်သာသနာ၊ ညးဗြဴ မၞုံကဵုအိန်ထံၚ် ကေုာံ ညးအဝဲဟွံခိုၚ်ကၠိုက် မၞုံမွဲမွဲသာ်တံဂှ်ဟေၚ် ကဵုလဝ်အခေါၚ်ဗၠးၜးနူ ပွမယိုက်ဂၠေၚ်လျိုၚ်ပၞာန်ဂှ် စၞောန်ပျးလဝ်ရ။
သ္အာၚ်နူဂှ်ပၠန် နူကဵုဂကောံစၟဳတ် ဒပ်ဂဥုဲဒပ်ပၞာန်တံ စၟတ်လဝ် ညးယိုက်ဝန်ပၞာန်ဟွံဂွံတံကီု၊ နူကဵုဂကောံကော်စိုပ်သ္ဂောံလုပ်ပၞာန်ဗဟဵုတေံ လလောၚ်ပ္တိတ်လဝ်အမိၚ် ညးဂွံအခေါၚ်ဗၠးၜးတံဂှ်လေဝ် ကလိဂွံအခေါၚ် ဟွံဒးလုပ်ပၞာန်ဂှ် နွံဒၟံၚ်ရ။
ညးဒေသမွဲတၠဂှ်လေဝ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ညးဍုၚ်ကွာန် ဒးဒှ်ဒဒိုက်စိုတ်သၟးဟွံက ညးသၟဝ်တဲကံၚ်ဇြဳပၞာန်တံဂှ် ထ္ၜးဟိုတ်ကဵုသၞောဝ်တုဲ ဟိုတ်နူအာတ်ဒၟံၚ်သြန်သၟးဂှ် မိမဂမၠိုၚ် ဒးဒှ်ဒၟံၚ်ဒဒိုက်စိုတ်ရောၚ် ဟီုရ။
“ကံၚ်ဇြဳပၞာန်ဂှ်တှ်ေ လညာတ်ပိုယ်တှ်ေ ဍေံတံဇြဟတ်ဟွံမွဲရပုဟ်ဂှ် ထေၚ်ကေတ်ရ၊ ဇြဟတ်မၞိဟ်ဟွံမွဲတုဲ ဒှ်ဒၟံၚ်ဗီုပြၚ် ကဵုဒၟံၚ်ဒဒိုက်စိုတ် ကုညးဍုၚ်ကွာန်တံရ၊ ညံၚ်မိမဂမၠိုၚ် ဟွံဂွံတသိုက်စိုတ် ကၠောန်ဒၟံၚ်ဏောၚ်၊ ပ္တိတ်သၞောဝ်ဏံဂှ် အာတ်သြန်မးမးတုဲ ဍေံတံရပ်စပ်ဏောၚ် သာ်ဏံရ၊ ရပ်စပ်သၟတ်တံဏောၚ် စွံထောံရ ရပ်ၜိုတ် ၂၀ တၠမ္ဂး ၁၀ တၠဂှ် စုတ်ပ္ဍဲတေံတုဲ သှ်ေ ၁၀ တၠဂှ် ကဵုကၠုၚ်နုက် နကဵုသြန်တုဲ ကၠောန်စဒၟံၚ် သွက်သြန်ဏောၚ်၊ အရာမဇီုကပိုက်ဂှ်တှ်ေ တၟာဂလိုၚ်ဏောၚ်၊ မိမတံလေဝ် ဒှ်ဒဒိုက်စိုတ်၊ ကောန်ၚာ်တံလေဝ် မံၚ်ဝါတ်” သာ်ဝွံ သ္ဂးရ။
အတိုၚ်သၞောဝ်ယိုက်ဂၠေၚ်လျိုၚ်ပၞာန်ဂှ်မ္ဂး စၟအ်ကောန်ဍုၚ်အာယုက်ပေၚ်တုဲတံ ဒးယိုက်ဂၠေၚ်လျိုၚ်ပၞာန်ဏောၚ်တုဲ ဟိုတ်ဟွံခိုၚ်ကၠိုက်မွဲသာ် ယဝ်ရပါဲဒလေတ် ညံၚ်ဂွိုအ်ဒးလုပ်ပၞာန်ဂှ်မ္ဂး ကေတ်အာအရေဝ် နဒဒှ်ညးဂြိပ်ဝါရာန်ဏောၚ်ဂှ် ဂကောံကော်စိုပ်ဂွံလုပ်ယိုက်ပၞာန်ဗဟဵုတံ ဘပဠလဝ်ရ။
အခိၚ်လၟုဟ် ကံၚ်ဇြဳပၞာန်ဝွံ ကၠာနဲဥပဒေ သၞောဝ်ယိုက်ဂၠေၚ်လျိုၚ်ပၞာန် ကေုာံ လၟေၚ်ကမၠောန်တံ ဂွိုအ်တိတ်ဏီဂှ် ပ္ဍဲကဵုလ္ဂုၚ်၊ မာန္တလေဝ်တံကီု ပ္ဍဲကဵုရးဒေသဇၞော် ကေုာံ တွဵုရးတံဂှ် ကော်စိုပ်ညးသၟတ်ဒေသတံ သွက်ဂွံယိုက်ဂၠေၚ်လျိုၚ်ပၞာန်ကီု၊ ကဵုကံက်မာဲ ဂွံလုပ်ပၞာန်တံဂှ် ကၠောန်သ္ပဒၟံၚ် အဆက်က်ရ။
ပ္ဍဲကဵုတွဵုရးဍုၚ်မန် ၁၀ ပွိုၚ်ဍုၚ်နွံဂှ် အရာပ် ကေုာံ ဂကောံကွာန်ဂှ် ၄၆၈ ဂကောံနွံဂှ်ရ အတိုၚ်ဂလာန်ကံၚ်ဇြဳပၞာန်တံ ဟီုလဝ်ဂှ်မ္ဂး မွဲဂိတု ညးသၟတ် ဗ္ဒါဲ ၅၀၀ ဒးဒုၚ်ကော်စိုပ် သ္ဂောံလုပ်ယိုက်ဂၠေၚ်လျိုၚ်ပၞာန်တံ နွံဒၟံၚ်ရ။
အတိုၚ်လိက်ဒုၚ်စဳရေၚ် ဂကောံသုတေသန ISP-Myanmar ဂှ်မ္ဂး ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ပွမဗက်စအဂတိတံ က္တဵုဒှ်ကၠုၚ် သၠဲသၠဲလးလးမာန်တုဲ ဂၠံၚ်တရဴတောတက်ဖောအ်ဗြေဝ်ကၟိန်ဍုၚ်မွဲ ဂၠိုၚ်ကဵုတၞောဝ်ဒတောဝ် ဒှ်အာလ္ပာ်လဟုတ်မာန်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)