ထဝါဲ၊ မာတ် ၂၀
ပ္ဍဲထံၚ်ထဝါဲ ပွိုၚ်ဍုၚ်ထဝါဲ ရးတၞၚ်သဳဂှ် ပါလုပ်သီုကဵုကောန်ထံၚ်ပရေၚ်ဍုၚ်ကွာန်တံဂှ် ကောန်ထံၚ် ၂၀ ပြၚ် ဒးဒုၚ်ၜုၚ်တက်ကၟာတ်လဝ်တိုက်ဂှ် ဇာဇၞိက်ကောန်ထံၚ်ပရေၚ်ဍုၚ်ကွာန် DPPN လလောင်ပ္တိတ်လဝ် ပ္ဍဲဂိတုမာတ် ၁၉ တေံရ။
တုဲကၠုၚ် ပ္ဍဲဂိတုမာတ် ၁၃ ကဵု ၁၅ တေံ အပ္ဍဲထံၚ်ထဝါဲ ဒပ်ပံၚ်ကောံ ဒပ်ဂီုကၠီုလ္ပာ်ပၞာန် (စရဖ) ၊ ဒပ်ဗၠာဲသၟိၚ် ကေုာံ ဒပ်ကံၚ်ဇြဳပၞာန်တံ လုပ်စိုပ်ကၠောန်သ္ပလဝ် ပရေၚ်စၟဳတ်ဗွဲတၟေၚ်ရ။
အပ္ဍဲပရေၚ်စၟဳတ်ဏံ ပါလုပ်သီုကဵုကောန်ထံၚ်ပရေၚ်ဍုၚ်ကွာန်ဂမၠိုၚ် ပ္ဍဲကောန်ထံၚ်လ္ၚဵုတံဂှ် ဂွံဆဵုကေတ်ဖုၚ်ဂးတုဲ စၟဳတ်ၜုၚ်တက်လဝ် ဗွဲမသ္ကာတ်မြဟ်ဂှ် ဂွံတီကေတ် အတိုၚ်တၚ်လလောၚ်တြးရ။
ပ္ဍဲကဵုညးဒးဒုၚ်ၜုၚ်တက်ပျဲပျာံတံဂှ် ကောန်ထံၚ်ပရေၚ်ဍုၚ်ကွာန်လ္ၚဵု က္ဍိုပ်ထ္ကး၊ ဇိုၚ်ကဝ်၊ မုက်ဂုဟ် ကေုာံ ခန္ဓကာယပဍူဗ္စံက် ကလိဂွံလဝ်ဝပ်ရ။
ကောန်ထံၚ်ဒးဒုၚ်ၜုၚ်တက်ကၟာတ်တိုက်တံဂှ်ဝွံ ဒဵုကဵုအခိၚ်လၟုဟ် ဟွံဂွံကလေၚ်တိတ်ကၠုၚ်ဏီတုဲ ဒးဂွိၚ်ဒၟံၚ်ကဵု ပရေၚ်ဂီုကၠီုညးတံဏောၚ်ဂှ် ညးဒုၚ်တာလျိုၚ်ကောန်ထံၚ်ပရေၚ်ဍုၚ်ကွာန် ခရိုၚ်သဓီု DPPN မွဲတၠ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမာတ် ၁၇ အခိၚ်ဇိုၚ်သဝ်တ္ၚဲဂှ်လေဝ် ကောန်ထံၚ်ၜါတၠ နူထံၚ်ထဝါဲဂှ် ဒပ်ကံၚ်ဇြဳပၞာန် ဂြောပ်ဏာလဝ်ယာတ်ဓလီုက္ဍိုပ်အရံၚ်ဗ္စံက်ဗ္စံက်တုဲ ကော်ပ္တိတ်ဏာ မ္ၚးထံၚ်တုဲ ဒဵုကဵုအခိၚ်လၟုဟ် ဟွံဂွံကလေၚ်စိုပ်ပ္ဍဲထံၚ်ဏီပုဟ်ဂှ် DPPN သ္ဂးရ။
အတိုၚ်တၚ်လလောၚ်တြး DPPN ဂှ်မ္ဂး ကောန်ထံၚ် ဒးဒုၚ်ကၟာတ်တိုက်တံဂှ် ကံၚ်ဇြဳပၞာန် သွက်ဂွံထပ်ပပဵုပ္တိုန်အာ ဒဏ်ထံၚ် ၆ ဂိတု နကဵုၝောံပိုဒ်သၞောဝ်ဆက်စၠောံဂှ် နွံဒၟံၚ်ရောၚ် ဂွံတီကေတ်ရ။
သၞာံတုဲကၠုၚ် ပ္ဍဲဂိတုအဝ်ဂါတ်တေံဂှ်လေဝ် ပ္ဍဲထံၚ်ထဝါဲ အခိၚ်ဒပ်ပံၚ်ကောံကံၚ်ဇြဳပၞာန်တံ လုပ်စိုပ်စၟဳတ်ဂှ် ရပ်ဂွံဂဥုဲၜူမာဲ ကေုာံ ဖုၚ်တဲတံဂးတုဲ ၜုၚ်တက်စၟဳတ် ကောန်ထံၚ်တံကီု၊ ခါတ်လဝ်ကဵုဇုက်ဇရှ်ေကီု ကေုာံ ကၟာတ်တိုက်တံဂှ် ကေၚ်ကၠောန်သ္ပလဝ်ရ။
အပ္ဍဲထံၚ်ထဝါဲဂှ် ကောန်ထံၚ် မွဲလ္ၚီပြၚ်နွံတုဲ ပ္ဍဲကဵုဏံ ကောန်ထံၚ် ၄၀၀ ပြၚ်ဝွံ အပ္ဍဲကာလသီအဝဵုဏံ ကံၚ်ဇြဳပၞာန် ထ္ၜးဟိုတ်နာနာတုဲ ဒှ်ကောန်ထံၚ်ပရေၚ်ဍုၚ်ကွာန် ဒးဒုၚ်ရပ်ဒက်ဖျေံလဝ်ထံၚ်တံရောၚ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)