လှာဒကှ်၊ မာတ် ၂၀
အပ္ဍဲကဵုပေါဲဗ္တိုက်ၜါလ္ပာ် မက္တဵုဒှ်လဝ် ပ္ဍဲကွာန်ပိုၚ်ခလိုၚ်တြေံ ပွိုၚ်ဍုၚ်လှာဒကှ် တွဵုရးကရေၚ် ဗ္ဒါဲပယျဵုသေံ−ဗၟာဂှ် ကောန်ဒပ်ကံၚ်ဇြဳပၞာန် ဗွဲမဂၠိုၚ်ဂၠေုၚ် ဂြိပ်လုပ်အာ လ္ပာ်ဍုၚ်သေံဂှ် ဂွံတီကေတ် အတိုၚ်တမ်ရိုဟ်ပရိုၚ်ဗလးတိရ။
တ္ၚဲဏံ ပ္ဍဲဂိတုမာတ် ၁၉ အခိၚ်လဒေါဝ်တ္ၚဲ အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံ KNLA တံ က္တဵုဒှ်လဝ်ပေါဲဗ္တိုက်ဆေၚ်မုက်တုဲ ကောန်ဒပ်ကံၚ်ဇြဳပၞာန် ၄၈ တၠဝွံ ဂြိပ်လုပ်ကၠုၚ် ကွာန်ပိုၚ်ခလိုၚ် ပွိုၚ်ဍုၚ်အုန်ဖါန် ဍုၚ်သေံ သီုကဵုလွဟ်လက်နက်မကမ်တံဂှ် ပရိုၚ်တမ်ရိုဟ်ဗလးတိတံ ဟီုရ။
ကောန်ဒပ်ကံၚ်ဇြဳပၞာန် ဂြိပ်လုပ်ကၠုၚ် လ္ပာ်ဍုၚ်သေံတံဂှ်ဝွံ ဒှ်နူကဵုဗ္ဒိုပ်ဒပ်ကံၚ်ဇြဳပၞာန် ဖျေံလဝ်ဒပ် ဗ္ဒါဲပယျဵုသေံ−ဗၟာတံတုဲ ကောန်ဒပ်ကံၚ်ဇြဳပၞာန် ဂြိပ်စိုပ်ကၠုၚ်တံဂှ် ကောန်ပၞာန်သေံတံ ထိၚ်ဒဝ်ကဵုလဝ် အပ္ဍဲကၠအ်ဂူမွဲဂှ်တုဲ လွဟ်လက်နက်မကမ် ကပေါတ်အရပ်စပ်တံဂှ်လေဝ် သီဂိုၚ်လဝ်ဂှ် ဂွံတီကေတ်ရ။
တုဲကၠုၚ် ပ္ဍဲဂိတုမာတ် ၁၄ တေံ ဒပ်ပံၚ်ကောံ KNLA တံ ဗ္တိုက်သီလဝ် ကုန်ဗျူဟာကံၚ်ဇြဳပၞာန် ဍုၚ်ကျာ်ဍုၚ် ပွိုၚ်ဍုၚ်လှာဒကှ်ဂှ်တုဲ ထိၚ်ဒက်လဝ် ဍုၚ်ဂှ်ရ။
ကြဴနူဂှ်တုဲ လ္ပာ်ကွာန်ပိုၚ်ခလိုၚ်တြေံ ဗ္ဒါဲပယျဵု လ္ပာ်ဍုၚ်ကျာ်ဍုၚ်သ္ကုတ်လ္တူဂှ် ပေါဲဗ္တိုက်ပရေၚ်ပၞာန်တံ ဆက်သ္ကာတ်မြဟ်လဝ်တုဲ ဒပ်ကံၚ်ဇြဳပၞာန် ဆက်ဗ္တိုက်ဒၟံၚ် နကဵုပၞာန်ကျာ ကေုာံ လွဟ်ဇၞော်တံရ။
ဟိုတ်နူပရေၚ်ဗ္တိုက်တရဴကျာ ဒပ်ကံၚ်ဇြဳပၞာန်တံတုဲ တုဲကၠုၚ်ပ္ဍဲဂိတုမာတ် ၁၆ တေံ ပ္ဍဲကဵုကွာန်အစေန် ဍုၚ်ကျာ်ဍုၚ်သ္ကုတ်လ္တူဂှ် ညးဍုၚ်ကွာန်ပါဲဒဴဘဲပၞာန် ၂ တၠ ချိုတ်အာလဝ်တုဲ ၃ တၠ ကလိဂွံလဝ်ဝပ်တုဲ သ္ၚိမၞိဟ်ဒၟံၚ် ကေုာံ ဘာဗ္တောန်လိက်တံလေဝ် ဇီုကပိုက်လီုလာ်အာလဝ်ရ။
ပ္ဍဲတိဍာ်ဒပ်မဟာ ၆ ခရိုၚ်ဒူပလာယာ KNU ဂှ် ဗ္တိုက်ဒၟံၚ် ဗ္ဒိုပ်ဒပ်ကံၚ်ဇြဳပၞာန်တံ နဒဒှ်ပေါဲဗ္တိုက်သီဗ္ဒိုပ်တံကဵု ပေါဲဗ္တိုက်သီဍုၚ်တံဂှ် ဒပ်မဟာ ၆ လလောၚ်ပ္တိတ်ကဵုကၠုၚ်သတိ ပ္ဍဲတ္ၚဲအကြာတုဲကၠုၚ်တေံရ။
ပရိုၚ်−သြၚ်လောန်တိုၚ်(မ်)