မတ်မလီု၊ မာတ် ၂၀
ပ္ဍဲအသေအဟာန်တ္ၚဲတွဵုရးဍုၚ်မန် သ္ဘၚ်ရတုထဝ် ပေၚ် ၅၀ သၞာံဂှ် ကံၚ်ဇြဳပၞာန် ကဵုအခေါၚ်တုဲ ပံက်ဗဒှ်စုတ်ဒၟံၚ် သီုကဵုဝိုၚ်ဝေၚ်တံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ထ္ၜးဟိုတ်ကဵု အသေအဟာန်တ္ၚဲတွဵုရးဍုၚ်မန် သ္ဘၚ်ရတုထဝ် ပ္ဍဲဂိတုမာတ် ၁၉ သၞာံဏံဂှ်တုဲ ကံၚ်ဇြဳပၞာန်ဝွံ စနူကဵုဂိတုမာတ် ၁၇ တုဲကၠုၚ်တေံတုဲ ကဵုအခေါၚ်ဗဒှ်စုတ်ဒၟံၚ် ဝိုၚ်ဝေၚ်ဟွံလုပ်သၞောဝ်တံရ။
နဒဒှ်စၟတ်သမ္တီ အသေအဟာန်တ္ၚဲတွဵုရးဍုၚ်မန်ဂှ်တုဲ အခန်ဗ္ဒမ်ထ္ၜးပျးတံဂှ် လးထ္ၜးလဝ် ပ္ဍဲကဵုခဠာတ်သၟိၚ်ဗရာံ ဗ္ဒါဲကၠတ်ထဝ်တွဵုရးဍုၚ်မန် လ္တူဍုၚ်မတ်မလီုဂှ်တုဲ ပေါဲသ္ဘၚ်ကဵု ဝိုၚ်ဝေၚ်တံဂှ် ကဵုလဝ်အခေါၚ်ကၠောန် အပ္ဍဲဥဂျာန်သၚ်လောန်ရ။
ပ္ဍဲကဵုဝိုၚ်ဝေၚ် ဟွံလုပ်သၞောဝ် ကံၚ်ဇြဳပၞာန် ကဵုလဝ်အခေါၚ်တံဂှ် ဝိုၚ်(နီဒေါၚ်) ၊ ဝိုၚ်ဒဵုလိုက်တံကီု ဝိုၚ်ဝေၚ်တၞဟ်ဟ်တံလေဝ် ပါလုပ်ဂှ် ဂွံတီကေတ်ရ။
ညးလ္တူဍုၚ်မတ်မလီုမွဲတၠဂှ် ပ္ဍဲကဵုအသေအဟာန်တ္ၚဲတွဵုရးဍုၚ်မန်ဂှ် ဗဒှ်စုတ်ဝိုၚ်ဝေၚ်တံဂှ်ဝွံ မွဲလှ်ေမှဟွံကေၚ်မိၚ်ဂှ်ကီု၊ ပြဝဏံဝွံ လုပ်အာစၟတ်သမ္တီ ဝၚ်ပရေံပရေံယျဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ကိစ္စကဵုဝိုၚ်ဝေၚ် ပ္ဍဲတ္ၚဲအသေအဟာန်တွဵုရးဍုၚ်မန်ဂှ်တှ်ေ ပြာကတ်အာပ္ဍဲဝၚ်ယျဏောၚ်၊ မွဲအာယုက် ဟွံကေၚ်မိၚ်မွဲလှ်ေပုဟ်၊ ဒးဟီုမ္ဂး ဒှ်ဟွံထေက်လးလးရ၊ အခိၚ်ကြေပ်ဂြတ်ဒၟံၚ်သာ်ဏံဂှ်တှ်ေလေဝ်၊ အဓိက ဆေၚ်စပ်ကဵု ဝိုၚ်ဝေၚ်မ္ဂး ဒ္ဂေတ်ပဋိပတ်မၞိဟ်တံ ဟွံခိုဟ်ရပုဟ်၊ ပရေၚ်ကၠတ်ဂၠံက်တံ ဒှ်ကၠုၚ်ဏောၚ်၊ ဒးဂွိၚ်အရၚ်တံဏံရ၊ တုဲပၠန် ပ္ဍဲဝၚ်ဍုၚ်ဂှ်လေဝ် မွဲလှ်ေမှ ဟွံမွဲလေဝ်ပုဟ်၊ ဒှ်ဟွံထေက်ပုဟ်” သာ်ဝွံ သ္ဂးရ။
အတိုၚ်ဂလာန် ညးမစုက်လုက်ကဵု ကံၚ်ဇြဳပၞာန်တံဂှ်မ္ဂး ဝိုၚ်ဝေၚ်တံဂှ် အလဵုသ္ကိုပ်ဝန်ဇၞော်တွဵုရးဍုၚ်မန် ကံၚ်ဇြဳပၞာန်ခါန်ကၞက် ဥူအံၚ်ကျဳတုၚ် ကဵုလဝ်အခေါၚ်တုဲ ပပ္တံနူကဵုကောန်ဒပ်ဗၠာဲသၟိၚ်တံ ဒးကေတ်ကဵုဒၟံၚ်ဂီုကၠီုရောၚ် ဂွံတီကေတ်ရ။
ကၠောန်ဗဒှ်စုတ်ဒၟံၚ် ဝိုၚ်ဝေၚ် ပ္ဍဲတ္ၚဲတွဵုရးဍုၚ်မန်ဂှ်ဝွံ နကဵုစိုတ်ဓာတ်ကံၚ်ဇြဳပၞာန် မယုတ်သဝ်ဂှ် ကၠောန်ၜိုတ်ဒၟံၚ် ညံၚ်ညးဍုၚ်ကွာန်တံ ဂွံဒှ်ဒဒိုက်ဏောၚ်ဂှ် ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF နာဲနဂါ ပါ်ပါဲလဝ်ရ။
“ပ္ဍဲအသေအဟာန် တ္ၚဲတွဵုရးဍုၚ်မန် မရနုက်ကဵု ၅၀ သၞာံဂှ် ပံက်စုတ်လဝ် ဝိုၚ်ဝေၚ်ဟွံလုပ်သၞောဝ်တံဂှ်ဝွံ စိုတ်ဓာတ်ဍေံတံဂှ် ပိုယ်တံ ချိၚ်ကေတ်ဂွံရ။ ၜိုတ်ကဆံၚ်လဵုယုတ်သဝ်မံၚ်ဂှ်ရော၊ ၜိုတ်လဵုယုတ်မာဒၟံၚ်ဂှ်ရော၊ ညံၚ်ညးဍုၚ်ကွာန်တံ ဂွံဒှ်ဒဒိုက် ကၠောန်ဒၟံၚ်နကဵုဗီုပြၚ်သာ်လဵုရောဟီုဂှ် မံက်ကၠးဖ္ဍးဒၟံၚ်ရ” သာ်ဝွံ ညးသ္ဂးရ။
ညးဒုၚ်တာလျိုၚ် ဒပ်စဵုဒၞါညးဍုၚ်ကွာန်ခရိုၚ်သဓီု PDF ကိုဝ်အေမေန်ထောန်ဂှ်လေဝ် ပြဝကံၚ်ဇြဳပၞာန်ဂှ်ဝွံ ညးဍုၚ်ကွာန်တံ ညံၚ်စိုတ်ဂွိုအ်လုပ်စ ပ္ဍဲပၠန်ဂတးဂှ် ကဵုလဝ်အခေါၚ် ဝိုၚ်ဝေၚ်တံတုဲ နဒဒှ်ဖဵုအဆက်လက္ကရဴမ္ဂး ပရေၚ်ကၠတ်ဂၠံက်တံ ဂၠိုၚ်ကၠုၚ်မာန်ဏောၚ်ဂှ် ဟီုရ။
“အဓိကဂှ်တှ်ေ စိုတ်ဓာတ်ညးဍုၚ်ကွာန်တံရဏောၚ်၊ ညံၚ်ဂွံပြံၚ်လှာဲ ဍေံတံကၠောန်ဒၟံၚ်ရ၊ ညံၚ်စိုတ်ဂွိုအ်လုပ်စ ပ္ဍဲပၠန်ဂတးဂှ် နကဵုနဲကဲနာနာ ကဵုလဝ်အခေါၚ်ဝိုၚ်ဝေၚ်တံ ဗွဲမလုပ်သၞောဝ်ရ၊ ဍာံဍာံဂှ် ဖဵုအဆက်လက္ကရဴဍေံ ပရေံပရေံဖအိုတ်ဏောၚ်၊ အေ ဂှ်တှ်ေ တၚ်ဍိုန်လျဝိုၚ်ဝေၚ်တံဂှ် ကွဳလိုန်ဓာတ်တံ ကၠေံဏောၚ်၊ တုဲတှ်ေ ပရေၚ်ပၠံၚ်ၜးတံ ဒှ်ဏောၚ်၊ အရာတံဏံ သာဂၠိုၚ်ကၠုၚ်ရ၊ မတံဏံ အရၚ်ဂွံဒှ်ကၠုၚ်ရနွံ၊ ခိုဟ်ဟ်ဂှ် မုဟွံမွဲပုဟ်” သာ်ဝွံ သ္ဂးရ။
သ္အာၚ်နူဂှ်ပၠန် ကံၚ်ဇြဳပၞာန်ဝွံ ညံၚ်ရဴအသေအဟာန်တ္ၚဲတွဵုရးဍုၚ်မန် ကၠောန်ဗဒှ်ဒၟံၚ် လ္တူဍုၚ်ရဂှ် ကဵုလဝ်အခေါၚ်ဝိုၚ်ဝေၚ်တံ ဗွဲမလုပ်သၞောဝ် သာ်ဏံဂှ်ရ အကြာသ္ကိုပ်ဝန်ဇၞော် ကံၚ်ဇြဳပၞာန်ခါန်ကၞက်ဂှ်ကဵု တၠဝိုၚ်ဝေၚ်တံဂှ် ပရေၚ်ကဵုကေတ်ဇၞော်ဇၞော်နွံမာန်ရောၚ် ညးသ္ၚဳဂၠိပ်လဝ်ရ။
ကၠာတေံဂှ်တှ်ေ ဝိုၚ်ဝေၚ်တံဂှ် ဟွံဂွံအခေါၚ်ကၠောန် ပ္ဍဲကဵုအသေအဟာန်ပေါဲသ္ဘၚ် လ္တူဍုၚ်မတ်မလီုတံဂှ်မွဲသာ် ရပ်ဒက်ဒၟံၚ်တံ နွံလဝ်တုဲ ကြဴနူဒပ်ပၞာန်သီအဝဵုတုဲ ကဵုကၠုၚ်အခေါၚ်ဝိုၚ်ဝေၚ်တံ လှဲလှဲတြးတြးရ။
ဒၟါနူဝိုၚ်ဝေၚ်တုဲ ကြပ်အရိုဟ်ဒဒှ်တ္ၚဲ ဒးဒုၚ်ကၠတ်ဂၠံက်ကွဳလိုန်ဓာတ်ကီု၊ ဒးဒုၚ်ပၠံၚ်ၜးကွဳလိုန်ဓာတ်တံသၟးဟွံက အပ္ဍဲသ္ၚိလေဝ် ဒးဒုၚ်ကၠတ်ဏာတံ နွံကီုလေဝ် မၞိဟ်ကၠတ်ဂၠံက်တံဂှ် နကဵုကံၚ်ဇြဳပၞာန် ရပ်ဂွံလဝ်ဂှ် ဟွံမွဲရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF ဂှ်မ္ဂး အပ္ဍဲကာလသီအဝဵုဏံ သ္ကိုပ်အုပ်ဓုပ်ဂမၠိုၚ်ဝွံ ရပ်စပ်စကာအဝဵု ဟွံဒးကဵုဒၞါဲတုဲ ပံၚ်ကဵုညးဟီုဂးတုဲ ဒၞါဲမဆေၚ်စပ်တံဂှ်တုဲ ပလဳပလန်ကၠုၚ်သၞောဝ်ဥပဒေတံတုဲ ပ္ဍဲကဵုကွာန်အရာပ်ညးတံဂှ်လေဝ် ပံက်ဝိုၚ်ဝေၚ်တံတုဲ ကၠောန်ကၠုၚ်ညံၚ်ကဵုသ္ဘၚ်တံဂှ် သ္ဂးရ။
သ္အာၚ်နူဂှ်ပၠန် စပ်ကဵုဗဒှ်ကၠုၚ်ဝိုၚ်ဝေၚ်တံဂှ်တုဲ ယဝ်ရအာတေၚ်မ္ဂးလေဝ် ကဵုလာပ်ဗဇဴတုဲ ကေတ်ဇၞးဂဗုတ်တံလေပ်တုဲ မၞိဟ်အာတေၚ်ဂှ်ဟေၚ် ဒှ်ဒဒိုက်တုဲ ဒးဒုၚ်အုပ်ဓုပ်ဒၟံၚ် နကဵုဓဝ်ဖေက်တုဲ ပါဲနူကဵုအေၚ်ဒုၚ်တုဲ ဂွံကလေၚ်ခၠေဝ်ပလန် ဟွံသၟဟ်အစောံပုဟ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)