ၛၚ်မာဲ၊ မာတ် ၂၀
နကဵုဂကောံမဆေၚ်စပ်ဂမၠိုၚ် ညံၚ်ဂွံတီအာ ဒဒှ်ရတာလျိုၚ်နွံ သွက်ဂွံစဵုဒၞါ ညးဍုၚ်ကွာန်တံဂှ် သၠုၚ်ပ္တိုန်ရေၚ်တၠုၚ်အာဏောၚ် ဂကောံမဟာမိတ်ရပ်လွဟ်ကောန်ဍုၚ်အရၚ်ဒေါအ်ပန်ပှော် ၇ ဂကောံ (7 EAO Alliance) တံ လလောၚ်တြးလဝ် ပ္ဍဲဂိတုမာတ် ၁၇ တေံရ။
ပ္ဍဲကဵုကောံဓရီုဇၞော် ဂကောံဒေါအ်ပန်ပှော် ၇ ဂကောံ မကၠောန်ဗဒှ်လဝ် ပ္ဍဲဍုၚ်ၛၚ်မာဲ ဍုၚ်သေံဂှ် သ္ၚဳဂၠိပ်အကာဲအရာပရေၚ်ဍုၚ်ကွာန်လၟုဟ်ကီု၊ တၚ်သ္ပဒတန် စပ်ကဵုပရေၚ်ဍုၚ်ကွာန် နူကဵုဂကောံပရေၚ်ပလေဝ်ပလေတ် မပၠောပ်ပ္တိုန်နၚ်တံ ကေုာံ သၞောဝ်စပ်ကဵုပရေၚ်ဒက်ပ္တန် ဂကောံဒေါအ်ပန်ပှော် ၇ ဂကောံတံဂှ် သဳကၠဳလဝ်တုဲ ဒက်လဝ် နဒဒှ်မဟာမိတ်ရ။
ဂကောံမဟာမိတ်ဒေါအ်ပန်ပှော် ၇ ဂကောံဂှ်ဝွံ သဳကၠဳလဝ် အကာဲအရာပရေၚ်ဍုၚ်ကွာန်၊ ပရေၚ်ပၞာန် မပြံၚ်လှာဲက္တဵုဒှ်ဒၟံၚ် မြက်က်ဇက်က်တံဂှ် ဗွဲမဂတးဂတန်တုဲ ဖျေံစၟတ်ဂွံလဝ် လစွံစိုတ်ပရေၚ်ဍုၚ်ကွာန်တံရောၚ်ဂှ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
နူကဵုပရေၚ်သဳကၠဳဆဵုဂဗ ပါလုပ်သီုညးဖအိုတ်ဂှ်မွဲကဆံၚ် သွက်ဂွံထ္မံက်ရုပ်ရဴ သွဟ်စပ်ကဵုပရေၚ်ၜိုဟ်လလမ်တံမာန် ဖန်ဗဒှ်ကဵုအကာဲအရာ ညးဍုၚ်ကွာန်တံ ဂွံထ္မံက်ပ္တိတ်လညာတ်ညးတံမာန်၊ နကဵုဂကောံမဆေၚ်စပ်ဂမၠိုၚ် သ္ဂောံတီကေတ် ဒဒှ်ရတာလျိုၚ်နွံ သွက်ဂွံစဵုဒၞါညးဍုၚ်ကွာန်တံ မဒှ်ရ။
ညးမၞုံအခေါၚ်ဟီုဂး ဂကောံမဟာမိတ်ဒေါအ်ပန်ပှော် ၇ ဂကောံ သ္ကိုပ်ဗိုလ်ဇၞော် သဝ်ကျဝ်ညောအ်ဂှ် နကဵုမၞိဟ်ပူဂဵု ဂကောံဗော်သွး က္တဵုဗဒှ်ကဵုပရေၚ်ဇီုကပိုက်လေၚ်ဒိုက် လ္တူညးဍုၚ်ကွာန်တံ ဒဒှ်ရတာလျိုၚ်နွံ သွက်ဂွံစဵုဒၞါညးဍုၚ်ကွာန်တံ ညံၚ်ဒၞါဲဌာန်ဂွံကဵုသမ္တီမွဲမာန် ဂွံလှဲတြးကၠုၚ် သ္ဂောံကၠောန်အာနွံဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လၟုဟ်ဂှ် စဵုဒၞါညးဍုၚ်ကွာန်တံသၟးဟွံက ဂကောံမဆေၚ်စပ်တံဂမၠိုၚ်၊ ဂကောံလဵုဟီုဂှ် ပိုယ်တံ ဟွံတီပုဟ်၊ အလဵုပိုယ်တံလေဝ် ပါတှ်ေပါဏောၚ်။ နကဵုဂကောံဗော်သွးမၞိဟ်ပူဂဵု မလေပ်က္တဵုဗဒှ်ကဵု ညးဍုၚ်ကွာန်တံ ပရေၚ်ဇီုကပိုက်လီုလာ်ဆောံလေၚ်ဒးပြဟ်လလုဲတံဂှ် သွက်ဂွံစဵုဒၞါညးဍုၚ်ကွာန်တံဂှ် တာလျိုၚ်နွံရ။ အေ ဂှ်တှ်ေ တာလျိုၚ်နွံဒၟံၚ်ဏံဂှ် ပိုယ်တံကဵုသမ္တီမာန် လှာဲဂတးလညာတ်မာန် ဒၞါဲဗီုတဏံ ဂွံလှဲတြးကၠုၚ် သ္ဂောံကၠောန်အာနွံဟီုဂှ် နကဵုပိုယ် လလောၚ်တြးစုတ်လဝ်ရ” သာ်ဝွံ သ္ဂးရ။
ညးဍုၚ်ကွာန် ဟွံမွဲကဵုဒုဟ်ဒဏ်တံဝွံ ဒဵုကဵုအခိၚ်လၟုဟ် ဒးဒုၚ်ရပ်ဒၟံၚ် နကဵုဟိုတ်နာနာဂှ်ကီု၊ ဒးဒုၚ်ဖျေံစၟတ်ဒဏ်ထံၚ်တံဂှ်ကီု၊ ဒးပြဟ်လလုဲအာ အကြာပေါဲဗ္တိုက်တံဂှ်ကီု၊ ဟွံဂီုကၠီုတုဲ ထောံသ္ၚိဌာန် ထောံလသာဌာန်ဒၟံၚ်တံဂှ်ကီု၊ ကမၠောန်ကၟိတ်အောန်တံကဵု ဒးဒုၚ်စသိုၚ်ဒၟံၚ် ဘဲဒဏ်သြန်ဖောဝ်တံ ဇၞော်ကဵုဇြဟတ်ရ။
သ္အာၚ်နူဂှ်ပၠန် ဟိုတ်နူပၞာန်ထ္ပက် ဒပ်ပံၚ်ကောံပၠန်ဂတးကောန်ဍုၚ်အရၚ် မပၠန်ဂတးဒၟံၚ် သၞောတ်တၠအဝဵုပၞာန် အလုံဍုၚ်မွဲဂှ်တုဲ ကံၚ်ဇြဳပၞာန် ကျဗြံကၠုၚ်ဒၟံၚ်ဂှ် သွက်ဂွံဗပေၚ်ဇြဟတ်မာန် ဟိုတ်နူပၠောပ်လဝ်လမျီု သၞောဝ်ယိုက်ဂၠေၚ်လျိုၚ်ပၞာန်တံဂှ်ရ အကြာညးဍုၚ်ကွာန်တံ ပရေၚ်ဇီုကပိုက် သ္ကာတ်မြဟ်ကၠုၚ်ဒၟံၚ်ရ။
စပ်ကဵုသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်ဂှ်တုဲ သွက်ဂွံစဵုဒၞါကဵု ညးဍုၚ်ကွာန် မၞုံအပ္ဍဲဒေသထိၚ်ဒက် ဂကောံဒေါအ်ပန်ပှော် ၇ ဂကောံတံ အစဳဇန်နွံဟွံမွဲ နူကဵုသြၚ်လောန်တိုၚ်(မ်) သၟာန်သၟုက်လဝ်ဂှ် သ္ကိုပ်ဗိုလ်ဇၞော် သဝ်ကျဝ်ညောအ် ဟီုလဝ် သာ်ဏံရ။
“လၟေၚ်ကမၠောန်ဗွဲလစှ်ေ ဂှ်တှ်ေ နကဵုပိုယ်တံ အခိၚ်ဏံ ဂွံဟီုဂှ် ဟွံဒှ်ဒတုဲဏီပုဟ်၊ ပ္ဍဲကဵုဇုတ်ဓရံၚ်ပိုယ်တံမိက်ဂွံအာပိသာ်ဂှ် ပ္ဍဲကဵုကိစ္စစဵုဒၞါကဵုကောန်အရာပ်တံဂှ် ဒၟါနူဘဲဒဏ်ပၞာန် ပဋိပက္ခရပ်လွဟ် ဒၟါနူပၞာန်တုဲ ညံၚ်ညးဍုၚ်ကွာန်တံ ဂွိုအ်ဒးဇီုကပိုက် ဗီုလဵုစဵုဒၞါမာန်ရော၊ ဂကောံလျိုၚ်နွံ ဂွံစဵုဒၞါတံဂှ်လေဝ် ဒဒှ်ရတာလျိုၚ်နွံ သွက်ဂွံစဵုဒၞါဂှ် ပိုယ်တံ ဆက်ဂွံကဵုအာသတိ သွက်ဂွံပံၚ်တောဲကၠောန်ၜိုတ်အာ တၚ်ရန်တၟံတံနွံဂှ်” သ္ဂးရ။
နကဵုမဟာမိတ် ၇ ဂကောံ ပ္ဍဲအရာသောၚ်ကလး ပဋိပက္ခလၟုဟ်တံဂှ် သွက်ဂွံထ္မံက်ပ္တိတ်အာ လစွံစိုတ်ဂကောံဇြဟတ်ပၠန်ဂတး မိက်ဂွံဂၠါဲသွဟ်ဗွဲမၜိုဟ်လလမ်တံမာန်ဂှ် သ္ဂောံထ္မံက်အာရုပ်ရဴ နဲကဲ ကေုာံ အကာဲအရာတံဂှ် ရန်တၟံလဝ်ရ။
သွက်ဂွံထ္မံက်ရုပ်ရဴ အစဳဇန်လၟေၚ်ကမၠောန်ဖျေံစၟတ်လဝ် နူကဵုကောံဓရီုဇၞော်ဂှ် ကဵုလဝ်တာလျိုၚ် ဂကောံက္ဍိုက်ပ် မဟာမိတ် ၇ ဂကောံ သၟဝ်ပၠတရဴ က္ဍိုပ်သ္ကိုပ်ဂကောံ သ္ကိုပ်ဗိုလ်ဇၞော် ယောန်သေတ်ကဵု ဒုက္ဍိုပ်သ္ကိုပ် နာဲအံၚ်မေန်တံရ။
နကဵုဂကောံမဟာမိတ်ဒေါအ်ပန်ပှော် ၇ ဂကောံတံ အကြေပ်အဂြတ်ပရေၚ်ဍုၚ်ကွာန်လၟုဟ်ဂှ် သွက်ဂွံသောၚ်ကလးတတ်ၜက်အာ နကဵုနဲကဲပရေၚ်ဍုၚ်ကွာန်မာန် သဳကၠဳပ္ညဳပ္ညပ်ကဵု ဂကောံဇြဟတ်မဆေၚ်စပ်တံတုဲ စဵုကဵုဒက်ပ္တန်ကၟိန်ဍုၚ်ပံၚ်ကောံဖေဝ်ဒရာဒဳမဝ်ကရေဇြဳမာန် ဆက်ပ္တိတ်အာဇြဟတ်ဏောၚ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)