သဓီု၊ မာတ် ၂၁
ပ္ဍဲကွာန်မိုဝ်ကံၚ် ပွိုၚ်ဍုၚ်သဓီု တွဵုရးဍုၚ်မန် ဟိုတ်နူဒးဒုၚ်ဗ္တိုဟ်မာၚ်တုဲ ဂၠံၚ်ကွဳပၟတ်မ္ဒးလီုအာဂှ် ဂကောံပလေဝ်ဒၟံၚ်ဂၠံၚ် ဒးဒုၚ်ဗ္တိုက်ကဵုဒရုၚ်တုဲ ဒေါအ်ဇူလဝ် ပရေၚ်ပလေဝ်ပလေတ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
တုဲကၠုၚ် ပ္ဍဲဂိတုမာတ် ၁၈ တေံ ကွဳပၟတ်ဖ္ဍိုက်တၟအ် နူပွိုၚ်ဍုၚ်သဓီု တိတ်ကၠုၚ်လ္ပာ်ပွိုၚ်ဍုၚ်ၜဳကလေၚ်ဂှ်ဝွံ ပ္ဍဲစိုပ်လ္တူဒဒန်ကၠောံကြုၚ် ဂၠံၚ်ကွဳပၟတ် အကြာသၞေဟ်ကွဳပၟတ် (သိမ်ဆိပ်) ကဵု သၞေဟ်ကွဳပၟတ် ( ဒုံးဝန်း) တံဂှ် ဟိုတ်နူဒးဒုၚ်ဗ္တိုဟ်လဝ်မာၚ်တုဲ ဂၠံၚ်ကွဳပၟတ် လီုအာလဝ်ရ။
ဂကောံကၠုၚ်စိုပ်ပလေဝ် ဂၠံၚ်ကွဳပၟတ် မလီုအာဂှ်ဝွံ ပ္ဍဲဂိတုမာတ် ၁၉ ဂှ် ဒးဒုၚ်ဗ္တိုက်ကဵုဒရုၚ်တုဲ ဒေါအ်ဇူလဝ် ပရေၚ်ပလေဝ်ပလေတ်ဂှ် ဂွံတီကေတ် ဇရေၚ်ညးဒေသတံရ။
အတိုၚ်ဂလာန်ညးဒေသတံဂှ်မ္ဂး လ္ပာ်ကံၚ်ဇြဳပၞာန် ဟိုတ်နူကဵုဂီုကၠီု ဂကောံပလေဝ်ဂၠံၚ်ကွဳပၟတ်တံ ဟွံမာန်တုဲ ဒးဒေါအ်ဇူလဝ်ပရေၚ်ပလေဝ်ပလေတ် ဒှ်မာန်ဂှ် သ္ၚဳဂၠိပ်ဒၟံၚ်တံလေဝ် နွံဒၟံၚ်ရ။
သၞေဟ်ကွဳပၟတ်မတ်မလီုဂှ်လေဝ် ဟိုတ်နူပလေဝ်ဂၠံၚ်ကွဳပၟတ်ဟွံတုဲဏီတုဲ ၚုဟ်စၟတ်တဲဒုၚ်လဝ် သွက်လၟေၚ်တရဴမတ်မလီု−လ္ဂုၚ် ဂိတုမာတ် ၂၀ တံဂှ် ကလေၚ်ကဵုလှုဲဏောၚ် လလောၚ်ပ္တိတ်ကဵုလဝ်သမ္တီရ။
ပ္ဍဲခရိုၚ်သဓီုဂှ် အပ္ဍဲကာလသီအဝဵုဏံ ကွဳပၟတ်ဖ္ဍိုက်ဗၞိက်တံကဵု ကွဳပၟတ်ဖ္ဍိုက်ဗၞိက်ဇမၠိၚ်တံ ဒးဒုၚ်ဗ္တိုဟ်ဒၟံၚ်မာၚ် ဗ္တိုက်ဒၟံၚ်မွဲဏှမွဲဏှတုဲ ဇီုကပိုက်လီုလာ်တံ နွံဒၟံၚ်ရ။
အတိုၚ်တၚ်လလောၚ်တြး ကံၚ်ဇြဳပၞာန်တံဂှ်မ္ဂး အပ္ဍဲကာလသီအဝဵုဏံ သီုကဵုသၞေဟ်ကွဳပၟတ်တံပါလုပ်ဂှ် ဂၠံၚ်ကွဳပၟတ် ဗ္ဒါဲ ၂၀၀ ပြၚ် ဒးဒုၚ်ဖံက်ဗ္တိုဟ်လဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−CJ