ရေဝ်၊ မာတ် ၂၀
တွဵုရးဍုၚ်မန် ပွိုၚ်ဍုၚ်ရေဝ် ပ္ဍဲဗလးဍာ်ၜဳ ဗွဲဒိုဟ်နေရတိ ကအ်ဂုတ်ဂှ် ဒပ်ဍာ်ကံၚ်ဇြဳပၞာန် ရပ်ဂွံလဝ် ရိုဝ်ဟေန်ဂျာ ၇၈ တၠဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲဂိတုမာတ် ၁၉ အခိၚ်နူဂယး ၜိုတ် ၆ နာဍဳဝိုက်ဂှ် ဒပ်ဍာ်ကံၚ်ဇြဳပၞာန် တာဒၞါစၟဳတ် ဂၠုၚ်စက်မၞုံယၟု (ဇွဲခေတ်ဆန်း) ဂှ် လ္တူဂၠုၚ် ဂွံဆဵုကေတ်လဝ် ရိုဝ်ဟေန်ဂျာတံတုဲ ရပ်စပ်လဝ်ရ။
ပ္ဍဲကဵုရိုဝ်ဟေန်ဂျာ ဒးဒုၚ်ရပ်တံဂှ် မၞိဟ်တြုံ ၄၄ တၠ၊ မၞိဟ်ဗြဴ ၃၄ တၠ ပါလုပ်တုဲ ပြဟ်ဟ်ဏံ ဆက်ထိၚ်ဒက်လဝ် ပ္ဍဲကအ်ဂုတ်ဂှ်ရဂှ် ဂွံတီကေတ်ရ။
အတိုၚ်ဂလာန် ညးဒေသတံဂှ်မ္ဂး ရိုဝ်ဟေန်ဂျာ ဒးဒုၚ်ရပ်တံဝွံ နူဗ္ဒိုပ်ညးဒဒိုက် ဗေန်ဂလာန်ဒေတ် ဒှ်ညးအာဍုၚ်မလေဝ်ယှာတံဏောၚ်ဂှ် ဂွံတီကေတ်ရ။
ရိုဝ်ဟေန်ဂျာ ဒးဒုၚ်ရပ်တံဂှ် ကံၚ်ဇြဳပၞာန် ပလံၚ်ဏာလဝ် ဍုၚ်ရေဝ်တုဲ သွက်ဂွံကေတ်အရေဝ် နကဵုသၞောဝ်အက်ဥပဒေ လဝကဂှ် စဳဇန်ဒၟံၚ်ရောၚ် ဂွံတီကေတ် ဇရေၚ်ညးမစုက်လုက်ကဵု ကံၚ်ဇြဳပၞာန်တံရ။
တုဲကၠုၚ် ပ္ဍဲဂိတုဂျာန္နဝါရဳ ၂၄ တေံဂှ်လေဝ် ကောန်ၚာ်ရိုဝ်ဟေန်ဂျာ အောပ်မာဒၟံၚ် ပ္ဍဲကၠအ်ထၜိုတ် ကွာန်ဝါခရု ၉ တၠ မပါလုပ် အပံၚ်ဖအိုတ် ၁၁၇ တၠဂှ် လ္ပာ်ကံၚ်ဇြဳပၞာန် ရပ်ဒက်လဝ်ဏီရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ သွက်ဂွံရပ်စပ် ရိုဝ်ဟေန်ဂျာ မၞုံအပ္ဍဲတွဵုရးရခေၚ်တံဂှ်ကဵု ကံက်စရၚ်ယၟုတံဂှ် ကၠောန်ၜိုတ်ဒၟံၚ်ရောၚ် ညးမရီုဗၚ်ရေၚ်တၠုၚ်ကဵုဒၟံၚ်ပရေၚ်ရိုဝ်ဟေန်ဂျာတံ ဟီုရ။
တုဲကၠုၚ် ပ္ဍဲဂိတုမာတ် ၁၃ တေံဂှ်လေဝ် ပ္ဍဲကဵုပေါဲဗ္တိုက် ( ရသေ့တောင်) တွဵုရးရခေၚ်ဂှ် ဟိုတ်နူဒးဒုၚ်ရပ်စပ်စကာ နဒဒှ်ဇွောံစဵုဒၞါပၞာန်တုဲ ရိုဝ်ဟေန်ဂျာ ၇၉ တၠ ချိုတ်အာတံဂှ် သွက်ဂွံကၠုၚ်ယိုက်ဖျဴဇွဂှ် ကံၚ်ဇြဳပၞာန် ကဵုလဝ်ပရိုၚ်သ္ၚိကၟိန်တံရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−SBM