ဗြဝတဳ၊ မာတ် ၂၁
တမ်ဒပ်ခမရ ဒပ်ကံၚ်ဇြဳပၞာန် စၟတ် (၃၅၆) ဖျေံသ္ဇိုၚ်တေန်ဂါန်ညဳနံၚ် မၞုံပွိုၚ်ဍုၚ်ဗြဝတဳ တွဵုရးကရေၚ်ဂှ် ဗ္တိုက်သီဂွံလဝ်ရောၚ် ဗော်သွးကောန်ဂကူကရေၚ် KNU ဗဟဵု လလောၚ်ပ္တိတ်လဝ် ပ္ဍဲဂိတုမာတ် ၂၀ တေံရ။
တမ်ဒပ်ကံၚ်ဇြဳပၞာန် ခမရ ၃၅၆ ဖျေံသ္ဇိုၚ်တေန်ဂါန်ညဳနံၚ်ဂှ် ဒပ်ပံၚ်ကောံပၠန်ဂတး ဒပ်မဟာ ၆ KNLA တံ စဗ္တိုက်လဝ် နူဂိတုမာတ် ၁၅ အခိၚ်ဇိုသဝ်တ္ၚဲ ၃ နာဍဳဂှ်တုဲ ဂွံပွိုၚ် ၄ နာဍဳ ၜိုတ်ဗ္တံ ၇ နာဍဳဂှ် ဗ္တိုက်သီဂွံလဝ် အတိုၚ်ဗ္ဒိုပ်မွဲရ။
အပ္ဍဲပေါဲဗ္တိုက်ဂှ် ကောန်ဒပ်ကံၚ်ဇြဳပၞာန် ၁၁ တၠ ချိုတ်အာလဝ်တုဲ ဗွဲမဂၠိုၚ်ဂၠေၚ် ဇီုကပိုက်ကလိဂွံလဝ်ဝပ်တုဲ လွဟ်လက်နက် ၁၀ ဇကိုအ်၊ မခတိုဟ် ၈၁ မမ ၄၂ မ တံမပါလုပ် သီဂွံလဝ် လွဟ်လက်နက်မကမ် ဗွဲမဂၠိုၚ်ဂၠေၚ်ဂှ် ဂွံတီကေတ် အတိုၚ်တၚ်လလောၚ်တြးရ။
အပ္ဍဲပေါဲဗ္တိုက်သီဗ္ဒိုပ်တမ်ဒပ်ဂှ် လ္ပာ်ဒပ်ပံၚ်ကောံပၠန်ဂတး ဒပ်ပၞာန်ဗၠးၜးကောန်ဂကူကရေၚ် KNLA တံ ၁ တၠ ပြဟ်လလုဲအာလဝ်တုဲ ၅ တၠ ဇီုကပိုက်ကလိဂွံလဝ်ဝပ်ဂှ် KNU ကဵုလဝ်သမ္တီရ။
စနူဂိတုမာတ် ၇ တုဲကၠုၚ်တေံတုဲ တမ်ဒပ်ကံၚ်ဇြဳပၞာန် ခမရ ၃၅၅ မၞုံပ္ဍဲတေန်ဂါန်ညဳနံၚ်ဂှ် ဒပ်ပံၚ်ကောံပၠန်ဂတး KNLA တံ ဗ္တိုက်သီဂွံလဝ်တုဲ ဂွံမွဲအံၚ် ထပ်သီဂွံလဝ် ဌာန်ဂအုပ်တမ်ဒပ်မွဲပၠန်ရ။
တမ်ဒပ်ကံၚ်ဇြဳပၞာန် ၂၅၇ သှ်ေဒၟံၚ် အပ္ဍဲဒေသတေန်ဂါန်ညဳနံၚ်တံကဵု ကုန်ဗျူဟာတံဂှ် လ္ပာ်ဒပ်ပံၚ်ကောံပၠန်ဂတး KNLA တံ ဆက်ထ္ပက်ပၞာန်ဗ္တိုက်ဒၟံၚ်တုဲ ပေါဲဗ္တိုက်ၜါလ္ပာ် သ္ကာတ်မြဟ်ဒၟံၚ်ရောၚ် ဂွံတီကေတ် ပရိုၚ်တမ်ရိုဟ်ဗလးတိတံရ။
အပ္ဍဲပေါဲဗ္တိုက်တေန်ဂါန်ညဳနံၚ်ဂှ် ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် ဒပ်ကံၚ်ဇြဳပၞာန်တုဲ ညးဒေသ ဂၠိုၚ်ကဵုလ္ၚီ ထောံလသာသ္ၚိဌာန် ဒးဂြိပ်ဒဴပါဲဒလေတ်ဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU