မတ်မလီု၊ မာတ် ၂၁
တွဵုရးဍုၚ်မန် လ္တူဍုၚ်မတ်မလီု ကောန်ဒပ်ကံၚ်ဇြဳပၞာန်တံ စၟဳတ်ဖုၚ်ညးသၟတ်အာကၠုၚ်တံ နကဵုဟိုတ်ပရေၚ်ဂီုကၠီုတုဲ ရပ်ဒက်ဒၟံၚ်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ကံၚ်ဇြဳပၞာန်တံဝွံ နကဵုဟိုတ်ပရေၚ်ဂီုကၠီုဂှ် လဒေါဝ်ဍုၚ် ဒၞါဲမၞိဟ်ဂၠိုၚ်တံ၊ ဒၞါဲလုပ်တိတ်ဍုၚ်တံသၟးဟွံက ပ္ဍဲကဵုဂၠံၚ်ပိသွာၚ်ပန်သွာၚ်တံဂှ်လေဝ် ရပ်စပ်ဇြဟတ်ဗွဲမဂၠိုၚ်ဂၠေၚ်တုဲ သီုဗ္တံသီုတ္ၚဲ သၠုၚ်ပ္တိုန်အသိၚ်စၟဳတ်ဒၟံၚ်ရ။
ပ္ဍဲကဵုစၟဳတ်သာ်ဏံဂှ် စၟဳတ်ကၠုၚ် သီုကဵုဖုၚ်တံတုဲ ကံၚ်ဇြဳပၞာန်ဂှ် ယဝ်ဂွံဆဵုကေတ် ပါ်ပရအ်လဝ်၊ ချူလဝ်လညာတ် သၟဝ်ပရိုၚ် ဌာန်ပရိုၚ်ဒးဒုၚ်ကၟာတ်လဝ်လာၚ်ဇြေန်တံဂှ်မ္ဂး ရပ်ဒက်ကေတ်အရေဝ်တံ ကၠောန်သ္ပဒၟံၚ်ရ။
တုဲကၠုၚ် ပ္ဍဲဂိတုမာတ် ၁၈ တေံဂှ်လေဝ် နကဵုတၚ်စောဲစပ် ကလေၚ်ပါ်ပရအ်လဝ်ပရိုၚ် နူကဵုဌာန်ပရိုၚ်ခေတ်သစ် ကဵု မဇ္စျိမတံ အပ္ဍဲဖုၚ် ကိုဝ်ထောန်လေန် ဒၟံၚ်အရာပ်(မြေနီကုန်း) ဍုၚ်မတ်မလီုဂှ်တုဲ ရပ်ဒက်ပံက်လဝ်ဂဗုတ် နကဵုၝောံပိုဒ် သၞောဝ်ရာဇသာတ်ဇၞော် ၅၀၅ (က) ဂှ် ဂွံတီကေတ်ရ။
ညးဒေသမတ်မလီုမွဲတၠဂှ် ကံၚ်ဇြဳပၞာန်ဝွံ ဂးတိုန်စၟဳတ်ယာန်တံတုဲ မ္ၚးနူကဵုစၟဳတ်ကွဳလိုန်ဓာတ် ညးဍုၚ်ကွာန်ဒေသတံဂှ် စၟဳတ်ဒၟံၚ်သီုကဵုဖုၚ်တံဂှ်တုဲ ထ္ၜးဟိုတ်နာနာတုဲ အာတ်မိက်ဒၟံၚ်သီုကဵုလှုဲတံရောၚ်ဂှ် ဟီုရ။
“လၟုဟ်ဂှ် ဆဵုကွဳလိုန်ဓာတ်တှ်ေ သွက်ဂွံစၟဳတ်ယာန် ဟီုဒၟံၚ်ရ။ စၟဳတ်ယာန်ဟီုတှ်ေ ရဲဒဳကွဳလိုန်ဓာတ်တံဂှ် ဒေါအ်ကဵုရ။ ဒေါအ်ကဵုတုဲ ပံက်ကဵုဍုတ်ကွဳဂှ်မ္ဂး ပ္ဍဲကဵုဗုၚ်ကွဳဂှ် မုဟွံဆဵုပုဟ်။ ဟွံဆဵုတှ်ေ ဗလးကဵုဟာဂှ် ဟွံသေၚ်ပုဟ်။ လၟုဟ်ဂှ် ဗက်ရံၚ်သီုကဵုပရေၚ်ပူဂဵု တၚ်နၚ်ပ္ဍဲဖုၚ်တံဂှ်တုဲ လက္ကရဴမုဟွံဆဵုမှ ထ္ၜးဟိုတ်နာနာတုဲ ကၠောန်စဒၟံၚ် နကဵုၚုဟ် မၞုံတၞုၚ်ပါၚ်ဍေံတံရ” သာ်ဝွံ သ္ဂးရ။
ကောန်ဒပ်ကံၚ်ဇြဳပၞာန်တံဝွံ ထ္ၜးဟိုတ်နာနာတုဲ ကြဴနူစၟဳတ်ဖုၚ်တံတုဲဂှ် အာတ်မိက်သြန်လှုဲ ဂၠိုၚ်ကဵုဆတံ နွံဒၟံၚ်တုဲ ယဝ်ရဟွံကဵုလှုဲမ္ဂး ရပ်ဒက်ပံက်အမှုတံ ကၠောန်ၜိုတ်ဒၟံၚ်ရ။
ညးလ္တူဍုၚ်မတ်မလီုမွဲတၠဂှ်လေဝ် ကံၚ်ဇြဳပၞာန်ဝွံ စၟဳတ်ဖုၚ်ညးသၟတ်တံတုဲ ယဝ်ရဟွံကဵုလှုဲမ္ဂး မပ္တံနူကဵုသီဖုၚ်တံဂှ် ကၠောန်ဒၟံၚ်တုဲ ဂွံတိတ်မ္ၚးရဂှ် ဒးဂွိၚ်ဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“တိတ်မ္ၚးမ္ဂး ကောန်ပၞာန် ကေုာံ ဗၠာဲသၟိၚ်တံဂှ် မုကၠောန်စရောဟီုတှ်ေ ယဝ်ဖုၚ်ပါအာတှ်ေ ဖုၚ် Andriod မ္ဂး ကော်စၟဳတ်။ ပ္ဍဲကဵုဖုၚ် မုဟွံမွဲလေဝ် ဗှ်ေဂှ် ဝးပ္ကဝ်ဒၟံၚ် မတေံဏောၚ်၊ မဏံဏောၚ်တုဲ ဒးကဵုၜိုတ်ဗၞတ်ဏံဏောၚ်၊ အာတ်လှုဲ၊ ကဵုလှုဲဟွံမာန်တှ်ေ သီဖုၚ်။ ဖုၚ်တံဏံဂှ် တုဲတှ်ေ ကလေၚ်သွံပ္ဍဲဆေၚ် Second တံဂှ်ရဏောၚ်။ လၟုဟ်တှ်ေ မၞိဟ်ဂမၠိုၚ် ဒှ်ကၠုၚ်သာ်လဵုရောဟီုတှ်ေ အခိၚ်တိတ်မ္ၚးလေဝ် ဒးဒှ်ဒၟံၚ်ဓဝိၚ်ဏောၚ်” သာ်ဝွံ သ္ဂးရ။
ကောန်ဒပ်ကံၚ်ဇြဳပၞာန်တံဝွံ နကဵုဟိုတ်ပရေၚ်ဂီုကၠီုဂှ် အခိၚ်ဗ္တံ အခိၚ်စၟဳတ်ဂှ်လေဝ် သုၚ်စလဝ်အရက်သုရာတံတုဲ ကညာၚ်လက်တံဂှ်ကီု၊ ဟီုဆေတ်ဗၠေတ်ဒၟံၚ် ညးဗြဴတံကီုဂှ် ဂွံတီကေတ် အတိုၚ်ဂလာန် ညးဒေသတံရ။
သ္အာၚ်နူဂှ်ပၠန် ကောန်ဒပ်ကံၚ်ဇြဳပၞာန်တံဝွံ ပ္ဍဲဒၞါဲစၟဳတ်ညးဒေသတံဂှ် စၟဳတ်လာၚ်ဇြေန် ကွဳစက်၊ ကွဳလိုန်ဓာတ်၊ စၟဳတ်လာၚ်ဇြေန်ဒဳယာန်၊ စၟဳတ်တၞးလာၚ်ဇြေန် အရာဟွံဆက်စပ်ကဵုပရေၚ်ဂီုကၠီုတံဂှ်သၟးဟွံက သီုကဵုစၟဳတ်ဒၟံၚ် ပ္ဍဲကဵုခန္ဓမၞိဟ်တံရ။
ကံၚ်ဇြဳပၞာန် ထ္ၜးဟိုတ်ပရေၚ်ဂီုကၠီုတုဲ စၟဳတ်ဒၟံၚ် စနူကဵုဖုၚ်တံတုဲ ရပ်ဒက်ကၠုၚ်ဂှ်ရ ဂီုကၠီုဟွံမွဲရတုဲ ဂွံအာကၠုၚ်ရဂှ် ဒှ်ကၠုၚ်အခက်အခုဲဂှ် ညးလ္တူဍုၚ်တံ ဟီုဂးကၠုၚ်အိုတ်ရ။
အတိုၚ်လိက်ဒုၚ်စဳရေၚ် ဇြဟတ်ရာမညဖေဝ်ဒရာခေတ်တၟိ NRFF သီအဝဵုပေၚ်ပိသၞာံဂှ်မ္ဂး ပ္ဍဲတွဵုရးဍုၚ်မန် ကောန်အရာပ် ၉၀၀ ပြၚ် ဒးဒုၚ်ရပ်ဒက်လဝ်တုဲ ၁၀၀ ပြၚ် ဒးဒုၚ်ဂစိုတ်လဝ်ဂှ် လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−TLT