တၞၚ်သဳ၊ မာတ် ၂၂
ရးတၞၚ်သဳ ပ္ဍဲပွိုၚ်ဍုၚ်တၞၚ်သဳ ကွာန်ရာမ်ဖိုဝ်ဂှ် ပ္ဍဲဂိတုမာတ် ၂၁ အခိၚ်နူဂယး ၜိုတ် ၈ နာဍဳ ကံၚ်ဇြဳပၞာန် ဟိုတ်နူပန်ပှော်လဝ်လွဟ်ဇၞော်တုဲ မၞိဟ်တြုံပါဲဒဴဘဲပၞာန်ၜါတၠ ကလိဂွံလဝ်ဝပ်သ္ကာတ်မြဟ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
နူကဵုတမ်ဒပ်ကံၚ်ဇြဳပၞာန် ခမရ ၅၅၆ ဖျေံသ္ဇိုၚ်ကွာန်ဇြဝါ ပန်ပှော်ဏာလဝ်လွဟ်ဇၞော်ကြာန်န် လ္ပာ်ကွာန်ရာမ်ဖိုဝ် ၜိုတ်ပိမိုၚ်ခြာဒၟံၚ်ဂှ် ဟွံအောန်နူကဵု ၁၀ မတုဲ ဒတုံဗ္တိုဟ်ထ္ကးအာလဝ် ပ္ဍဲဂြိုပ်ဒၞါဲညးပါဲဒဴဘဲပၞာန်တံ မံၚ်တန်တဴဒၟံၚ်တံဂှ်ရ။
ဟိုတ်နူလွဟ်ဇၞော် ဒတုံဗ္တိုဟ်ထ္ကးတုဲ ဥူယှိုဲဝေန် ကေုာံ ဥူဝေန်ဨ ညးပါဲဒဴဘဲပၞာန် အာယုက်ပွဳပွူ ၆၀ သၞာံတံ ပ္ဍဲကဵုက္ဍိုပ်၊ ထကေၚ် ကေုာံ ဇကုဇကောဝ်တံဂှ် ကလိဂွံလဝ်ဝပ်လွဟ်ဇၞော်ရ။
မၞိဟ်တြုံၜါတၠ ဒးလွဟ်ဇၞော် ဇီုကပိုက်ကလိဂွံလဝ်ဝပ်ဂှ်ဝွံ ဟိုတ်နူအကာဲအရာ ဒးဂွိၚ်ကဵုအန္တရာယ်လမျီုဂှ်တုဲ နကဵုအရီုဗၚ် ညးဍုၚ်ကွာန်ဒေသတံဂှ် ပလံၚ်ဗစိုပ်ကဵုလဝ် ဇရေၚ်ဒၞါဲလွဳယဲ မကြပ်တံရောၚ်ဂှ် ဂွံတီကေတ်ရ။
အတိုၚ်ဂလာန် ညးဒေသတံဂှ်မ္ဂး ပ္ဍဲကွာန်ရာမ်ဖိုဝ် အကြာဒပ်ကံၚ်ဇြဳပၞာန်ကဵု ဒပ်ပံၚ်ကောံစဵုဒၞါညးဍုၚ်ကွာန်တံဂှ် ပေါဲဗ္တိုက်က္တဵုဒှ်လဝ်ဟွံမွဲတုဲ ကလိလောန်လဝ် ပရေၚ်ပန်ပှော်လွဟ်ဇၞော် လ္တူကောန်အရာပ်တံ မသက္ကုဟိုတ်ဏောၚ်ဂှ် သ္ဂးရ။
တုဲကၠုၚ် ပ္ဍဲဂိတုမာတ် ၁၄ တေံဂှ်လေဝ် ဟိုတ်နူဒပ်ကံၚ်ဇြဳပၞာန် ပန်ပှော်လွဟ်ဇၞော် ပ္ဍဲကွာန်(လယ်ယာတောၚ်) ပွိုၚ်ဍုၚ်တၞၚ်သဳတုဲ သၞာဲဒဴမြိမြန်ယဲ တြုံဗြဴၜါတၠ Non CDM ဂှ် ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
အတိုၚ်လိက်ဒုၚ်စဳရေၚ် ဂကောံသုတေသန FE5 Taninthari ဂှ်မ္ဂး ပ္ဍဲရးတၞၚ်သဳ အပ္ဍဲဂိတုဖေဖဝ်ဝါရဳ တုဲကၠုၚ်တေံ ဟိုတ်နူပရေၚ်ဗ္တိုက်တရဴကျာ ကေုာံ လွဟ်ဇၞော် နူဒပ်ကံၚ်ဇြဳပၞာန်တံဂှ်တုဲ ကောန်အရာပ် ၈ တၠ ချိုတ်အာလဝ်ဂှ် ပ္ဍဲဂိတုမာတ် ၁၂ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ