ဘာပန်၊ မာတ် ၂၂
ဒပ်ကံၚ်ဇြဳပၞာန် ထောံမခတိုဟ်ဗ္တိုက်ဒၟံၚ် လ္တူကွာန်ညးဍုၚ်ကွာန်ကောန်အရာပ် ပ္ဍဲတိဍာ်အုပ်ဓုပ် ဒပ်မဟာ ၅ ခရိုၚ်ဘာပန် ဗော်သွးကောန်ဂကူကရေၚ် KNU အပ္ဍဲပွိုၚ်ၜါတ္ၚဲ နကဵုမခတိုဟ်ဒရုၚ် ၂၀၀ ပြၚ်ဂှ် ဂွံတီကေတ် အတိုၚ်တၚ်လလောၚ်တြး ဒပ်မဟာ ၅ ရ။
ပ္ဍဲဂိတုမာတ် ၂၀ ဂှ် ဒပ်ကံၚ်ဇြဳပၞာန် ဂေတ်ကဵုဒရုၚ် ၃ ဝါတုဲ ထောံဏာလဝ်မခတိုဟ် နကဵုဒရုၚ်ဗုမ် ၂၇ မ အပ္ဍဲကွာန်၊ မ္ၚးကွာန် ဗအ်ထာ ကဵု ဂၠံၚ်မၞိဟ်ကွာ် မၞုံအပ္ဍဲဂကောံကွာန်မေဝ်ကလဝ် ပွိုၚ်ဍုၚ်ဘူဒိုဝ် ခရိုၚ်ဘာပန်ဂှ်တုဲ ပ္ဍဲကွာန်သဝ်ခလဳ ဂကောံကွာန်မထဝ် ပွိုၚ်ဍုၚ်ဒွါလိုဝ်ဂှ်လေဝ် ထောံဂြာတ်ဏာလဝ်မခတိုဟ် ၈ မ နကဵုဒရုၚ်ရ။
ပ္ဍဲကဵုဏံ ကွာန်ထူမဝ်ဒါ၊ တာဒိုဝ်ထာ ကေုာံ ကွာန်နဳဒိုအ်ထာ မၞုံအပ္ဍဲဂကောံကွာန်ဗဝ်တေထာ ပွိုၚ်ဍုၚ်လူတဝ် ခရိုၚ်ဘာပန်ဂှ် ဒပ်ကံၚ်ဇြဳပၞာန် ထောံဏာလဝ်မခတိုဟ် ၁၃၇ မ နကဵုဒရုၚ်ဂှ် ဂွံတီကေတ် အတိုၚ်တၚ်လလောၚ်တြးရ။
သ္အာၚ်နူဂှ်ပၠန် ပ္ဍဲဂိတုမာတ် ၁၉ ဂှ်လေဝ် ပ္ဍဲကွာန်ထူမဝ်ဒါ၊ တာဒိုဝ်ထာ ကေုာံ နဳဒိုအ်ထာ မၞုံအပ္ဍဲဂကောံကွာန်ဗဝ်တေထာ ပွိုၚ်ဍုၚ်လူတဝ်ဂှ် ဒပ်ကံၚ်ဇြဳပၞာန် ဗ္တိုက်ဂြာတ်ဏာလဝ်မခတိုဟ် ၅၀ မ နကဵုဒရုၚ်ဂှ် ပါလုပ် ပ္ဍဲတၚ်လလောၚ်တြးဂှ်ရ။
ဒပ်ကံၚ်ဇြဳပၞာန် ထောံလဝ်မခတိုဟ် ပ္ဍဲခရိုၚ်ဘာပန် ပွိုၚ်ၜါတ္ၚဲဂှ် ၂၂၂ မတုဲ ပ္ဍဲကွာန်ထူမဝ်ဒါ၊ တာဒိုဝ်ထာ ကေုာံ ကွာန်နဳဒိုဝ်ထာဂှ် သ္ၚိ ၁၀၀ ပြၚ်၊ ညးဍုၚ်ကွာန် ဗ္ဒါဲ ၁၃၀၀ ဒးဂြိပ်ဒဴပါဲဒလေတ်ဒၟံၚ် ဒၞါဲဗၠးဘဲတံရ။
သ္အာၚ်နူဂှ်ပၠန် နူဂိတုမာတ် ၁၃ စဵုကဵု ၁၉ ဒပ်ကံၚ်ဇြဳပၞာန် ပန်ပှော်လွဟ်ဇၞော် အပ္ဍဲကွာန် မၞုံအပ္ဍဲခရိုၚ်ဘာပန် အရိုဟ်တ္ၚဲတုဲ ညးဍုၚ်ကွာန်ဒေသ နူကဵုကွာန် ပိကွာန်တံဝွံ ဒးဂြိပ်ဒဴပါဲဒလေတ်ဒၟံၚ်တုဲ ညးပါဲဒဴဘဲပၞာန်တံဝွံ ဇွောံမစၞစပိုတ် ကေုာံ က္တဵုဒှ်ဒၟံၚ်ယဲကၠောံထၞာန်တံရောၚ်ဂှ် သ္ဂးရ။
တုဲကၠုၚ် ပ္ဍဲဂိတုမာတ် ၁၉ တေံ ဒပ်ပံၚ်ကောံ KNLA တံ လုပ်စိုပ်ဗ္တိုက်လဝ် တမ်ဒပ်ကံၚ်ဇြဳပၞာန် မၞုံအပ္ဍဲဍုၚ်ဘာပန်တံဂှ်တုဲ ကောန်ဒပ်ကံၚ်ဇြဳပၞာန် ၁ တၠ ချိုတ်တုဲ ၅ တၠ ကလိဂွံလဝ်ဝပ်ဂှ် ဒပ်မဟာ (၅) လလောၚ်ပ္တိတ်လဝ်ပရိုၚ်ရ။
ပရိုၚ်−သြၚ်လောန်တိုၚ်(မ်)
ဗီု−KNU