မတ်မလီု၊ မာတ် ၂၂
ပ္ဍဲတွဵုရးဍုၚ်မန် ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ညးသၟတ်ဂမၠိုၚ် တိတ်ကၠုၚ်ဍုၚ်မ္ၚး ဂၠိုၚ်ကၠုၚ်တုဲ ကမၠောန် SME တံ ဂွံဆက်ဂေတ်ဂြိပ် ဒှ်ကၠုၚ်အခက်အခုဲဂှ် တၠကမၠောန်တံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ညးသၟတ်ကၠောန်ဒၟံၚ်ကမၠောန် ပ္ဍဲကမၠောန် SME အဇာဒေါဝ်၊ အဇာဍောတ် အပ္ဍဲဒေသ ဗွဲမဂၠိုၚ်တံဂှ်ဝွံ ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ တိတ်နူကလောန်တုဲ အာထောံဍုၚ်မ္ၚး နကဵုလၟိဟ်ဗွဲမဂၠိုၚ်ဂၠေၚ်ဂှ် နွံကၠုၚ်ရ။
ညးသၟတ်တိတ်နူကမၠောန်တံဂှ်ဝွံ ဗွဲမဂၠိုၚ်ဂှ် ဒှ်ညးပါလုပ်ဒၟံၚ် အပ္ဍဲအပိုၚ်အခြာအာယုက် လုပ်ပၞာန်ဂွံ ၁၈ ကဵု ၃၅ တံဂှ်တုဲ ကမၠောန်ဂမၠိုၚ် ဂွံဆက်ဂေတ်ဂြိပ်ဂှ် ပရေၚ်ဇီုကပိုက်တံ နွံကၠုၚ်လဝ်ရ။
ပ္ဍဲကဵုဏံ ကမၠောန်အဇာဒေါဝ်၊ အဇာဍောတ် မပ္တံကဵုပရေၚ်သိုၚ်ခၞံ၊ ပရေၚ်ကၠောန်ပ္တိတ်ဗၞိက်၊ ပရေၚ်ဒုၚ်ကာ၊ ကမၠောန်ဇိၚ်ဂၠိက်ယာတ်၊ ကမၠောန်ပလံၚ်ဗစိုပ်တံဂှ်ဝွံ ကမၠောန်ဂွံဆက်ဂေတ်ဂြိပ် ဒးဆေၚ်ဒၟံၚ်မုက် အကာဲအရာပရေံအိုတ်တံရ။
တၠကမၠောန် SME မွဲတၠဂှ် ဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန်တုဲ ဂွံမွဲဂိတုပြၚ် ကောန်ကလောန် ယအ်စှ်ေအာ ၂၀ တၟံကၠံဂှ်ရ ကမၠောန်ဂမၠိုၚ် ဂွံဂေတ်ဂြိပ် တၟံကၠံပေၚ်ၚ် ဟွံမွဲရပုဟ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒးဟီုနကဵုကမၠောန်တှ်ေ အခိၚ်လၟုဟ် အကာဲအရာရုၚ်စက်ပိုယ်တံဂှ် ကောန်ကလောန်ယအ်စှ်ေအာ ၜိုတ် ၂၀ တၟံကၠံဏောၚ်၊ ဍေံတံ တိတ်အာအိုတ်ရ။ တိတ်တုဲ ဒၞါဲတိတ်ဂှ် ပိုယ်တံဟွံဂွံစၞးဏီပုဟ်။ ရုၚ်စက်ဟီုဂှ် ဒးဂေတ်ဂြိပ်ဒၟံၚ်ကဵု ကောန်ကလောန်တံဏောၚ်၊ ကောန်ကလောန်တံဏံ ဟွံမွဲမွဲသာ် ပိုယ်တံ ဗီုလဵုမှ ဂွံဂေတ်ဂြိပ်ကမၠောန်ဂှ် ကၠောန်ဟွံမာန်ပုဟ်” သာ်ဝွံ သ္ဂးရ။
အတိုၚ်သြၚ်လောန်တိုၚ်(မ်) သၟာန်သၟုက်လဝ် တၠကမၠောန် SME တံဂှ်မ္ဂး ပ္ဍဲကမၠောန်လ္ၚဵုတံဂှ်တှ်ေ ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ကောန်ကလောန်နုက်တိတ်အာနူကမၠောန် အောန်အိုတ် နူ ၂၀ တၟံကၠံ စဵုကဵု ၆၀ တၟံကၠံ နွံဂှ် ဂွံတီကေတ်တုဲ တၠကမၠောန်လ္ၚဵုတံဝွံ ဒးဂဗဒၟံၚ်ကဵု အကာဲအရာဒးဒေါအ်ဇူတံရ။
တၠကမၠောန် SME မွဲတၠဂှ် ဟိုတ်နူသၞောဝ်ယိုက်ဂၠေၚ်လျိုၚ်ပၞာန်တုဲ ကောန်ကလောန်အောန်စှ်ေကၠုၚ်တုဲ ဒးရပ်စပ်စကာဒၟံၚ် ကောန်ၚာ်ဟွံမံၚ်ဘာတံကဵု မၞိဟ်အာယုက်ဇၞော်ဇၞော်တံဂှ်ရ ပရေၚ်ကၠောန်ပ္တိတ် စှ်ေကၠုၚ်ဂှ် ဟီုရ။
“အဓိက ဒးဆေၚ်မုက်ဂှ်တှ်ေ ပြသၞာကောန်ကလောန်အောန်စှ်ေရဏောၚ်။ ကောန်ကလောန်အောန်တုဲ ဒၞါဲကၠောန်ဂှ် လဇုဲလဇ။ သၟတ်တံဟွံမွဲတုဲ ဗွဲကြဴဏံ ကောန်ၚာ်ဟွံဆက်တိုန်ဘာတန်တံ၊ မၞိဟ်ဇၞော်ဇၞော်တံ ၜိုတ်မၞိဟ်နွံဂှ်ရ ညံၚ်ဂွံပြေပြံၚ်ဂှ် ဒးကၠောန်မံၚ်။ မွဲတ္ၚဲ ပ္တိတ်ၜိုတ် ၁၀၀ တှ်ေ အခိၚ်လၟုဟ်ဂှ် ၜိုတ် ၆၀ ရဏောၚ် တိတ်ဒၟံၚ်” သာ်ဝွံ သ္ဂးရ။
သၟတ်ဍောတ်တ်တံ ထောံလသာကမၠောန်အပ္ဍဲဒေသတံတုဲ တိတ်အာဍုၚ်သ္အာၚ်တံဂှ်ရ အပ္ဍဲကာလခြာဟွံလအ်ဏံ ဒးဆေၚ်ကၠုၚ်မုက် ကုပြသၞာ ဂၠါဲကောန်ကလောန်စိုန်သကီုဝါတ်တံ ဇၞော်ကဵုဇြဟတ်မာန်တုဲ တၠပညာကွတ်တံလေဝ် အောန်စှ်ေကၠုၚ်မာန်ဂှ် သ္ၚဳဂၠိပ်ဒၟံၚ်တံ နွံဒၟံၚ်ရ။
အတိုၚ်တၚ်နၚ် ကံၚ်ဇြဳပၞာန်ဂှ်မ္ဂး ပ္ဍဲတွဵုရးဍုၚ်မန် ကမၠောန် SME အဇာဒေါဝ်၊ အဇာဍောတ် ဟွံအောန်နူကဵု ၂၀၀၀၀ နွံဒၟံၚ်တုဲ ကောန်ကလောန် ဒးဒတူလိုၚ်ဒၟံၚ် လ္တူကမၠောန်ဏံ ဂၠိုၚ်ကဵုကိုဋ် နွံဒၟံၚ်ရ။
မွဲလ္ပာ်ဂှ်ပၠန် ကမၠောန် SME တံဝွံ အပ္ဍဲကာလသီအဝဵုဏံ ပၟတ်ဓာတ်လလဳ ပိုတ်ပၠိုတ်ဒၟံၚ်မွဲဏှမွဲဏှကီု၊ ၚုဟ်ကၠေၚ်စက် သၠုၚ်တိုန်ကၠုၚ်ကဵုဆကီု၊ ၚုဟ်ပလံၚ်ဗစိုပ် ကေုာံ ၚုဟ်ကပေါတ်ဗၞိက်အပြောံ ဇၞော်သၠုၚ်ဒၟံၚ်တံတုဲ ကမၠောန်ဂွံဂေတ်ဂြိပ် ဒှ်ဒၟံၚ်အခက်အခုဲရ။
အတိုၚ်လိက်ဒုၚ်စဳရေၚ် ဂကောံသုတေသန ISP-Myanmar ဂှ်မ္ဂး ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန်တုဲ ဂၠံၚ်တရဴဖောအ်ဗြေဝ်တောတက်ကၟိန်ဍုၚ် ဂၠိုၚ်ကဵုတၞောဝ်ဒတောဝ် ဆုတ်ယုတ်အာမာန်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ