(ရှမ်းရွာသစ်) ၊ ဨပရဴ ၁၀
သ္ဇိုၚ်ဝန်သၟဝ်တဲကံၚ်ဇြဳပၞာန် ဒးဒၟံၚ်တာလျိုၚ် ပ္ဍဲဍုၚ် (ရှမ်းရွာသစ်) ပွိုၚ်ဍုၚ်လိုၚ်ဗၠဲ တွဵုရးကရေၚ်တံဝွံ နူဂိတုမာတ်တုဲကၠုၚ်တေံ ပြံၚ်ဆုဲတိတ်အာ နူကဵုဍုၚ်ဂှ်အိုတ်ယျဂှ် ဂွံတီကေတ် အတိုၚ်ဂလာန်သ္ဇိုၚ်ဝန် မတိတ်စ္ဍးကၠုၚ်တံကဵု တမ်ရိုဟ်ပရိုၚ်နူညးဒေသတံရ။
ပ္ဍဲကဵုကွာန်ခလယ်ဒေ ဍုင်(ရှမ်းရွာသစ်) နွံပ္ဍဲတိဍာ်ဒပ်မဟာ ၇ ခရိုၚ်ဘာအၚ် KNU ဂှ် တုဲကၠုၚ်ပ္ဍဲဂိတုမာတ် ၂၂ တေံ ဒပ်မဟာ ၇ ဒပ်ပၞာန်ဗၠးၜးကောန်ဂကူကရေၚ် KNLA တံ ထ္ပက်ကၠုၚ်ပၞာန် ကုဗ္ဒိုပ်ဒပ်ကံၚ်ဇြဳပၞာန်တုဲ ဂွံပန်တ္ၚဲ ပ္ဍဲဂိတုမာတ် ၂၅ ဂှ် သီဂွံလဝ်ဗ္ဒိုပ်ဂှ်ဖအိုတ်ရ။
ဒပ်ကံၚ်ဇြဳပၞာန်ဂှ်လေဝ် နူကဵုဗျူဟာပၞာန် ဖျေံသ္ဇိုၚ်ဍုၚ် ( ရှမ်းရွာသစ်) မွဲကဆံၚ် ဗလးဗ္တိုက်ဏာဒၟံၚ်ဒရုၚ် ဇရေၚ်ဒၞါဲဌာန်ဂအုပ်ဗဟဵု ဗော်သွးကောန်ဂကူကရေၚ် KNU တံ မွဲဏှမွဲဏှတုဲ ပလံၚ်ဗစိုပ်ဇွောံမ ဇရၚ်ဗ္ဒိုပ်ဗျူဟာ နူကဵုတရဴကျာတုဲ ပလေဝ်ဒၟံၚ်ပၞာန်ဒုၚ်ရ။
ပါဲနူကဵုပရေၚ်ကြံၚ်မ္ၚိုဟ် ပ္ဍဲပရေၚ်ပၞာန်ၜါလ္ပာ် မက္တဵုဒှ်လဝ်သာ်ဏံဂှ် နကဵုသ္ဇိုၚ်ဝန် နွံပ္ဍဲဍုၚ် ( ရှမ်းရွာသစ်) နူကဵုဒပ်မဟာ ၇ KNLA တံ သွက်ဂွံတိတ်စ္ဍးအာအိုတ်ဂှ် ကဵုသမ္တီဟီုလဝ်တုဲ သ္ဇိုၚ်ဝန် နူကဵုဍုၚ် ( ရှမ်းရွာသစ်) ၜိုတ် ၂၀ ဝွံ ဟွံဂံၚ်မံၚ်လ္တူဍုၚ်ရတုဲ တုဲကၠုၚ်ပ္ဍဲဂိတုမာတ်တေံ ပြံၚ်ဆုဲအာ လ္ပာ်ဍုၚ်လိုၚ်ဗၠဲကဵု ဍုၚ်ဘာအၚ်ဂှ် တမ်ရိုဟ်ပရိုၚ်ဒေသဂမၠိုၚ် သ္ဂးရ။
ပ္ဍဲကဵုသ္ဇိုၚ်ဝန် တိတ်အာ နူကဵုဍုၚ် ( ရှမ်းရွာသစ်) ဂမၠိုၚ် လ္ၚဵုတံဂှ်တှ်ေ ကလေၚ်ယိုက်ဂၠေၚ်ဒၟံၚ်တာလျိုၚ် နဒဒှ်ညးဖက်ဆော ပ္ဍဲကဵုဌာနမဆေၚ်စပ်နာနာတံဂှ် နွံတုဲ လ္ၚဵုတံဂှ်တှ်ေ ဟွံယိုက်တာလျိုၚ်ရတုဲ ဂြိပ်တိတ်အာတံလေဝ် နွံဒၟံၚ်ရောၚ် တမ်ရိုဟ်ပရိုၚ်အပ္ဍဲဒေသမွဲတၠ ဟီုရ။
ပ္ဍဲကဵုဍုၚ် ( ရှမ်းရွာသစ်) လၟုဟ်ဂှ် ကောန်ဒပ်ကံၚ်ဇြဳပၞာန်တံသၟးရ သှ်ေဒၟံၚ်တုဲ ဟိုတ်နူအကာဲအရာပရေၚ်ပၞာန်တုဲ အာကၠုၚ်ညးသ္ကအ်လေဝ် အောန်ဒၟံၚ်တုဲ ပရေၚ်ပၞာန်ၜါလ္ပာ်ဝွံ သာတုဲသ္ကာတ်မြဟ်ကၠုၚ် နူဏံမာန်ရောၚ် တမ်ရိုဟ်ပရိုၚ်အပ္ဍဲဒေသတံ သ္ဂးရ။
ဍုၚ် ( ရှမ်းရွာသစ်) ဝွံ နွံဒၟံၚ် ပ္ဍဲတိဍာ်ဒပ်မဟာ ၇ KNU လ္တူဂၠံၚ် လိုၚ်ဗၠဲ−ရှမ်းရွာသစ်−လေးဝါးတုဲ ကဵုဌာန်ဂအုပ်ဗဟဵု KNU ဂှ်လဝ် ဒှ်ဍုၚ်ကြပ်အိုတ်မွဲတုဲ အပ္ဍဲဒေသဂှ် မ္ၚးနူဒပ်ကံၚ်ဇြဳပၞာန်ဂှ် ဒပ်မၚ်ပယျဵုကရေၚ် BGF လေဝ် အာကၠုၚ်ချဳဒရာၚ်ဒၟံၚ်ရ။
မ္ၚးနူဗ္ဒိုပ်ဒပ်ကံၚ်ဇြဳပၞာန် နူကဵုဒေသမာနေဝ်ပဠဝ် မဖျေံလဝ်ဒပ် ပ္ဍဲတိဍာ်ဒပ်မဟာ ၇ KNU ဂှ် ဂကောံပံၚ်ကောံ ဒပ်မဟာ ၇ တံ ဗ္တိုက်သီဂွံလဝ် သီုဗ္ဒိုပ်ခလယ်ဒေး ဗ္ဒိုပ်ပူလူတူဂှ်တုဲ နူဒပ်ကံၚ်ဇြဳပၞာန်လေဝ် ဗ္တိုက်ဒၟံၚ် ပ္ဍဲတိဍာ်ဒပ်မဟာ ၇ နကဵုဒရုၚ်တံရ။
အခိၚ်လၟုဟ် ဒပ်ကံၚ်ဇြဳပၞာန် ဟီုလဝ် ဒေါအ်ပန်ပှော် ပွိုၚ် ၂၀ တ္ၚဲကီုလေဝ် ကၠောန်ဒၟံၚ် ပရေၚ်ဗ္တိုက်ပၞာန်ကျာ ကေုာံ ပန်ပှော်ဒၟံၚ်လွဟ်ဇၞော် ပ္ဍဲတိဍာ်ထိၚ်ဒဝ် KNU လၟေၚ်ဒဒှ်တ္ၚဲတုဲ ညးဍုၚ်ကွာန်ကောန်အရာပ် ဇီုကပိုက်ကလိဂွံဝပ်တံ နွံတုဲ သ္ၚိဒၟံၚ်ဂမၠိုၚ်လေဝ် လီုလာ်အာ နွံရ။
ပရိုၚ်−သြၚ်လောန်တိုၚ်(မ်)
ဗီု−CJ