တာတ်ကေန်၊ ဨပရဴ ၁၀
ကမ္မတဳသ္ပစၞးကၠတ်ထဝ်ကၟိန်ဍုၚ် CRPH မဒက်ပ္တန်လဝ် နကဵုအမာတ်ကၠတ်ထဝ်ဒုၚ်ရုဲစှ်ဂမၠိုၚ်ဂှ် ဂကောံပါလဳမာန်ဍုၚ်သ္အာၚ် IPU ဆက်သ္ပအာစၟတ်သမ္တီရောၚ် ပ္ဍဲဂိတုဨပရဴ ၉ တေံ လလောၚ်ပ္တိတ်လဝ်ပရိုၚ်ရ။
နူဂိတုဨပရဴ ၅ စဵုကဵုဂိတုဨပရဴ ၉ နူကောံဓရီုကံၚ်ဇြဳကေၚ်ကာကမၠောန် ကောံဓရီုပါလဳမာန်ဍုၚ်သ္အာၚ် မရနုက်ကဵု ၁၅၀ ဝါ မကၠောန်ဗဒှ်ဒၟံၚ် ပ္ဍဲဍုၚ်တာတ်ကေန် ဍုၚ်ဥဇဘက်ကေဿတာန်ဂှ် သ္ဂုတ်သွာတ်သ္ပဒတန်လဝ် ဒဒှ်ရဆက်သ္ပစၟတ်သမ္တီ CRPH ရ။
ပပ္တံနူကောံဓရီု မရနုက်ကဵု ၁၄၂ ဝါ မကၠောန်ဗဒှ်လဝ် ပ္ဍဲသၞာံ ၂၀၂၁ ဂိတုမာတ် အခိၚ်ပၞာန်သီအဝဵုတုဲဂှ် နဒဒှ်ဂကောံသ္ပစၞး ဍုၚ်ဗၟာကဵု ညးဍုၚ်ကွာန်ဍုၚ်ဗၟာ ဗွဲမလုပ်သၞောဝ်ဂှ် ဂကောံပါလဳမာန်ဍုၚ်သ္အာၚ် IPU သ္ဂုတ်သွာတ်လဝ် သွက်ဂွံကဵုအခေါၚ်တိုန်စိုပ် ကု CRPH နဒဒှ်ညးလ္ၚတ် ပ္ဍဲကောံဓရီုပါလဳမာန်ဍုၚ်သ္အာၚ်ရ။
ကြဴနူဂှ်တုဲ ပ္ဍဲကောံဓရီု ကေုာံ ပေါဲသဳကၠဳ မကၠောန်ဗဒှ်လဝ် အပ္ဍဲသၞာံ ၂၀၂၂ တံဂှ် နကဵုညးစၞးကၠတ်ထဝ်ဍုၚ်ဗၟာ ပါလုပ်တိုန်စိုပ်လဝ် နူကဵုအောန်လာၚ်မွဲကဆံၚ်ရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြးဂှ်ရ။
ဂကောံပါလဳမာန်ဍုၚ်သ္အာၚ်တံ သ္ပကၠုၚ်စၟတ်သမ္တီ ကု CRPH သာ်ဏံဂှ်ဝွံ ဒှ်ဟိုတ်နူစွံတဴၚုဟ်မးရှ်ေသှ်ေ ကုဆန္ဒအလုံညးဍုၚ်ကွာန်ဍုၚ်ဗၟာ မနွံပၟိက်ကဵုဒဳမဝ်ကရေဇြဳ မဒစဵုဒစးပၠန်ဂတးဒၟံၚ် ဒပ်ပၞာန် ဒဵုကဵုတ္ၚဲဏံတံဂှ်ဏောၚ် သ္ဂးရ။
ကောံဓရီုပါလဳမာန်ဍုၚ်သ္အာၚ် မရနုက်ကဵု ၁၅၀ ဝါ ကေုာံ ကောံဓရီုမဆက်စပ်ဂမၠိုၚ်ဂှ် နကဵုညးစၞးကၠတ်ထဝ်ဍုၚ်ဗၟာ ဆဵုဂဗသဳကၠဳလဝ် ကုညးစၞးကၠတ်ထဝ်ဍုၚ်ဂမၠိုၚ် မတိုန်စိုပ်ကၠုၚ် ကောံဓရီုတံ ဗွဲတၞဟ်ခြာရ။
ဂကောံပါလဳမာန်ဍုၚ်သ္အာၚ် IPU ဝွံ ဒှ်ဂကောံကၠတ်ထဝ်အလုံဂၠးမွဲ မဒက်ပ္တန်လဝ် နကဵုကၠတ်ထဝ်ကဆံၚ်ကၟိန်ဍုၚ် နူကဵုဍုၚ် ၁၈၀ ပြၚ်မွဲရောၚ် ထ္မံက်ထ္ၜးလဝ် ပ္ဍဲတၚ်လလောၚ်တြး CRPH ရ။
ပရိုၚ်−သြၚ်လောန်တိုၚ်(မ်)
ဗီု− CRPH