မတ်မလီု၊ ဨပရဴ ၁၀
ပ္ဍဲတွဵုရးဍုၚ်မန် လ္တူဍုၚ်မတ်မလီုဂှ် သ္ဘၚ်အတးဏံ သွက်ဂွံကၠောန်ဗဒှ်အာ သ္ဘၚ်အတးကွာ်ဂၠံၚ်ဂှ် လ္ပာ်ကံၚ်ဇြဳပၞာန်တွဵုရး ပလေဝ်ပလေတ်သိုၚ်ခၞံဒၟံၚ်ရောၚ် ညးဒေသဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကံၚ်ဇြဳပၞာန်တွဵုရးဝွံ ညံၚ်သ္ဘၚ်အတး ဂွံမိပ် အခိၚ်သိုၚ်ခၞံဒၟံၚ် ကၞာထးဗဟဵု၊ ကၞာထးနူဌာနအလဵုအသဳ မဆေၚ်စပ်တံဂှ် ဟိုတ်နူဘဲဒဏ်တိချဳတုဲ ပရေၚ်ပါ်ပါဲဂမၠိုၚ် သၠုၚ်တိုန်ကၠုၚ်ဒၟံၚ်ဂှ်ရ ဒးဒေါအ်ဇူလဝ် ပရေၚ်သိုၚ်ခၞံကၞာထးတံဂှ်ရ။
အခိၚ်လၟုဟ် ပ္ဍဲကဵုဒၞါဲပြေလၟောၚ် (မြစ်ကန်သာ) ပ္ဍဲဂၠံၚ်ဇိုၚ်ၜဳမတ်မလီု ကၠောန်ဒၟံၚ်တၟိဂှ် ပလေဝ်ပလေတ်ဒၟံၚ် သွက်ဂွံကၠောန်သ္ဘၚ်အတးကွာ်ဂၠံၚ် သွက်ဂွံဗ္စဖျုၚ်ကဵုဒါန်ကုကၟုဲတံရ။
ညးဒေသမတ်မလီု ဟွံမိက်ထ္မံက်ယၟုမွဲတၠဂှ်တှ်ေ နကဵုကံၚ်ဇြဳပၞာန်တွဵုရး ဟီုကၠုၚ် ရိုဟ်ပလီုအာကၞာထးဏောၚ်တုဲ ပလေဝ်ပလေတ်ဒၟံၚ်သ္ဂောံကၠောန်သ္ဘၚ်အတးကွာ်ဂၠံၚ်ဂှ်ဝွံ ဟိုတ်ဒၟါနူညးဍုၚ်ကွာန်ဂမၠိုၚ် ဒှ်ဒၟံၚ်ဒဒိုက်အိုတ်ဂှ်ရ ကၠောန်ဟွံထေက်ပုဟ်ဂှ် ပါ်ပါဲလဝ်ရ။
“လၟုဟ်တှ်ေ ပလီုကၞာထးအတးဏောၚ်ဂးတုဲ ကၠောန်ကၠုၚ်သ္ဘၚ်အတးကွာ်ဂၠံၚ်တုဲ ဖျေံဒၟံၚ်တိုၚ်ကဳဍာ်တံရ။ တုဲတှ်ေ ပက်ဍာ်ပၠန်ဏောၚ်ဟီုတှ်ေ ကၠောန်ဟွံထေက်ပုဟ်။ မုဟိုတ်ရောဟီုတှ်ေ ပ္ဍဲဍုၚ်ဇကု မၞိဟ်ဒှ်ဒၟံၚ်ဒဒိုက်အိုတ်တုဲ မၞိဟ်ချိုတ်ဂှ်ချိုတ် မၞိဟ်သှ်ဂှ်ေသှ်ေ မၞိဟ်ဝဲလီုဂှ်လီု မၞိဟ်ဒးဘဲကၠောဝ်ဂှ်ကၠောဝ် ဘဲဒဏ်ပၞာန်ဂှ်လေဝ် နွံဒၟံၚ်ဏီ။ ဒှ်ဒၟံၚ်ဒဒိုက်သာ်ဏံဂှ် ယဝ်ချပ်ဗ္စာရဏာဒးဏောၚ်မ္ဂး ညအ်ဂှ် ကလောန်ကၠောန်ထေက်ဟွံသေၚ်ဂှ် ပိုယ်တံ ညာတ်ကေတ်ရ” သာ်ဝွံ သ္ဂးရ။
သ္အာၚ်နူဂှ်ပၠန် သ္ဘၚ်အတးကွာ်ဂၠံၚ် ကံၚ်ဇြဳပၞာန်ဏံဂှ် ပလေဝ်ပလေတ်ဒၟံၚ် သ္ဂောံကၠောန်အာ နကဵုမၞိဟ်ဂၠိုၚ်ၚ် နကဵုဗီုပြၚ်ပေါဲသ္ဘၚ်တံဂှ်ဝွံ ကာလလၟုဟ်ဏံ ဒှ်ဟွံထေက်တုဲ ထေက်ကဵုဒးစွံဓဝ်ဗ္စာရဏာ သွက်ညးဍုၚ်ကွာန်ဒးဘဲတိချဳတံဂှ်ရောၚ် ညးဆက်ဟီုရ။
ကံၚ်ဇြဳပၞာန်တွဵုရးဍုၚ်မန်ဝွံ နူကၠာတေံ သွက်ဂွံကၠောန်ဗဒှ်အာသ္ဘၚ်အတးဂှ် ဒက်ပ္တန်လဝ် ကမ္မတဳကမၠောန် ၁၅ တုဲ ကၠောန်ကၠုၚ်လဝ်ရ။
ဆ္ဂး ပ္ဍဲဂိတုမာတ် ၂၈ တေံ ပ္ဍဲဍုၚ်ဗၟာ ကြဴနူတိချဳအာလဝ် ဇၞော်ကဵုဇြဟတ်တုဲဂှ် ဟီုပ္တိတ်ကၠုၚ်လဝ် သ္ဘၚ်အတးသၞာံဏံဂှ် သ္ဘၚ်မိပ်၊ ပေါဲလှ်ေဒယှ်ေတံ ဟွံပါမွဲသာ် ကၠောန်ဗဒှ်အာ သ္ဘၚ်အတးၜိုဟ်ဟ်သြိုဟ်ဟ်ဏောၚ် မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ