ရေဝ်၊ ဨပရဴ ၁၀
က္ဍိုပ်သ္ကိုပ်ဂကောံလကိုဟ်ဍုၚ်ရေဝ် ဟီုကဵု ဌာန်ပရိုၚ်သြၚ်လောန်တိုၚ်(မ်) ဒဒှ်ရရပ်ဂွံလဝ် ကောန်ဒပ်ကံၚ်ဇြဳပၞာန်မွဲတၠ မဂြိပ်တိတ်ကၠုၚ် နူကဵုတမ်ဒပ်ခမရ စၟတ် ၅၉၁ ဖျေံသ္ဇိုၚ်ကွာန်ဘာ ပွိုၚ်ဍုၚ်ရေဝ် တွဵုရးဍုၚ်မန်ရ။
တုဲကၠုၚ် ပ္ဍဲဂိတုဨပရဴ ၉ ၜိုတ်အခိၚ်နူဂယး ၜိုတ် ၆ နာဍဳဂှ် ကောန်ဒပ်ကံၚ်ဇြဳပၞာန် မဒှ်ကောန်ဒပ် စှ်ေနူတန်ဗ္တောန်ကွတ်ပၞာန် လၟေၚ် ၄ အာယုက် ၁၉ သၞာံ မၞုံယၟုကျဝ်ဇြေန်ဖျဵု မဂြိပ်တတ်ကၠုၚ်နူဒပ် ခမရ ၅၉၁ အခိၚ်ဒးမၚ်ကၚ်ဂှ် ရပ်ဂွံလဝ် ဗ္ဒါဲကွာန်ဘာရ။
ကောန်ဒပ်ကံၚ်ဇြဳပၞာန် ရပ်ဂွံလဝ်ဂှ်ဝွံ ယူနဳဝှမ်မွဲကယျိုၚ်ရ ပါကၠုၚ်တုဲ ပါဲနူဂှ် မုဟွံပါကၠုၚ်တုဲ ကေတ်လဝ်အဆက်ကဵုဂကောံပၠန်ဂတးတံတုဲလေဝ် တိတ်ကၠုၚ်ဟွံသေၚ်ဂှ်ရ ပြဟ်ဟ်ဏံ ထိၚ်လဝ်တုဲ စၟဳတ်ဒၟံၚ်ရောၚ် သ္ဂးရ။
ကောန်ဒပ်ကံၚ်ဇြဳပၞာန် ဒးဒုၚ်ရပ်လဝ်ဂှ်ဝွံ ဒှ်နူဇာတိ ပွိုၚ်ဍုၚ်ဝန်တိုဝ် ဒေသဇၞော်ရးသက်ကိုၚ်တုဲ အခိၚ်ကၠောန်ဒၟံၚ်ကလောန် ပ္ဍဲလ္ဂုၚ်ဂှ် ဒးဒုၚ်ပကောံပလဝ်ကောန်ပၞာန် ကုကံၚ်ဇြဳပၞာန်တံရ။
ကြဴနူဂှ်တုဲ ဒးတိုန်စိုပ်လဝ်တန်ဗ္တောန်ကွတ်ပၞာန် ပ္ဍဲဘာပ္ကတ်ပ္ကေၚ်ကွတ်ပၞာန်သ္ဇိုၚ် (မၚ်းကုန်း) ပ္ဍဲ(ဖောၚ်ကြီး) တုဲ စိုပ်ကၠုၚ် ဒပ်ခမရ ၅၉၁ ဏံရောၚ် ဂွံတီကေတ်ရ။
တုဲကၠုၚ် ပ္ဍဲဂိတုမာတ် ၁၄ တေံဂှ်လေဝ် ကောန်ဒပ်ကံၚ်ဇြဳပၞာန် စကခ ၁၉ ဖျေံသ္ဇိုၚ်ပွိုၚ်ဍုၚ်ရေဝ် တြဴတၠဝွံ လုပ်စိုပ်ဖျေံကၠုၚ်လွဟ် ဇရေၚ်ဂကောံလကိုဟ်ဍုၚ်ရေဝ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−လကိုဟ်ဍုၚ်ရေဝ်