ဝိုၚ်မဝ်၊ မာတ် ၂၂
ဒပ်ပၞာန်ဗၠးၜးကချေၚ် KIA ထ္ပက်ဒၟံၚ်ပၞာန် ကုဗ္ဒိုပ်ဒပ်ကံၚ်ဇြဳပၞာန် မၞုံအပ္ဍဲတွဵုရးကချေၚ်တံဂှ်ဝွံ အပ္ဍဲပွိုၚ်ၜါသတ္တာဟ သီဂွံလဝ် ဗ္ဒိုပ်ဒပ် ဗ္ဒါဲ ၃၀ ဂှ် ညးဒုၚ်တာလျိုၚ်လလောၚ်ပရိုၚ် KIA ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒပ်ပၞာန်ဗၠးၜးကချေၚ် KIA ဝွံ ပ္ဍဲဂိတုမာတ် ၇ တေံ ကရောံဒပ်ပၞာန်ရခေၚ် AA ဒပ်မဟာမိတ်ဂှ်ကီု သီုကဵုဒပ်ပံၚ်ကောံ PDF တံဂှ် ဗ္တိုက်လဝ် ဗ္ဒိုပ်ဒပ်ကံၚ်ဇြဳပၞာန် မွဲဒမြိပ်ဂၠံၚ်ကွဳစက်မျေတ်ကျဳဏာ−ဗာန်မဝ် ကဵု ဗ္ဒါဲဍုၚ်လိုၚ်ဇြာဂှ်ရ။
“ဗ္ဒိုပ်ဒပ်ကံၚ်ဇြဳပၞာန် မၞုံမွဲဒမြိပ်ဂၠံၚ်ကွဳစက် မျေတ်ကျဳဏာ−ဗာန်မဝ် ဗ္ဒိုပ်ဒပ်ပၟိက်ဇၞော် ၜိုတ် ၁၀ ပြၚ် ပိုယ်တံ သီဂွံလဝ်ရ။ ဗ္ဒိုပ်တံဏံဂှ် ပံၚ်ထောံ ကဵုကၚ်စဵုဒၞါတံ၊ ဗ္ဒိုပ်မုက်ပၞာန်တံ၊ ဗ္ဒိုပ်ဍောတ်တ်တံဂှ်မ္ဂး ၜိုတ် ၃၀ နွံဏောၚ်” သာ်ဝွံ ညးဒုၚ်တာလျိုၚ်လလောၚ်ပရိုၚ် KIA သ္ကိုပ်ဗိုလ်ဇၞော် နဝ်ဗူ သ္ဂးရ။
ပ္ဍဲပရေၚ်ဗ္တိုက်သီ ဗ္ဒိုပ်ဒပ်ကံၚ်ဇြဳပၞာန်တံဂှ် ကောန်ဒပ်ရပ်ဂွံလဝ်ဂျိုၚ်ၚ်တံလေဝ် နွံဒၟံၚ်တုဲ ပြဟ်ဟ်ဏံ စွံလဝ် ပ္ဍဲမုက်ပၞာန်သၟးတုဲ ဂွံကလေၚ်ပလံၚ်ဖျဴ ပၞောန်လက္ကရဴဏံ ဟွံမွဲဂှ်ရ လၟိဟ်ဂှ်တှ်ေ ဟွံဂွံတီကေတ်တၞဟ်ခြာဏီပုဟ်ဂှ် သ္ကိုပ်ဗိုလ်ဇၞော် နဝ်ဘူ ဟီုလဴထ္ၜးလဝ်ရ။
မွဲလ္ပာ်ဂှ်ပၠန် ဝန်ဇၞော်ကာစဵုဒၞါ အလဵုအသဳညဳသၟဟ်ဂကူ NUG ဥူယဳမန်ဂှ် ဗ္ဒိုပ်(ဘွမ်ရေဘွမ့်) သီဂွံလဝ် အပ္ဍဲပရေၚ်ပၞာန်ဒေသကချေၚ်ဂှ် အာစိုပ်ကျောဝ်ဗဵုလဝ် ကရောံသ္ကိုပ်က္ဍိုက်ပၞာန် KIA ဒုသ္ကိုပ်ဗိုလ်ဇၞော် ခံၚ်လောန်ရ။
ဗ္ဒိုပ်ဏံဝွံ ဒှ်ဗ္ဒိုပ်ပၞာန်ဒုၚ်ကံၚ်ဇြဳပၞာန် ပၟိက်ဇၞော် ပွိုက် ၇၇၁ ဌာန်ဂအုပ်ကောပ်ကာဲပရေၚ်ပၞာန် စၟတ် (၂၁) မုက်ပၞာန်တုဲ ပ္ဍဲဂိတုမာတ် ၁၅ ဂှ် ဒပ်ပၠန်ဂတး နူကဵုဒပ်ပၞာန်ဗၠးၜးကချေၚ် KIA သ္ကိုပ်သ္ကတံဂှ် သီဂွံလဝ်ရ။
ပ္ဍဲဂိတုမာတ် ၂၁ ဂှ်လေဝ် ဒပ်ပံၚ်ကောံ KIA လုပ်စိုပ်ဗ္တိုက်လဝ် ဗ္ဒိုပ်ဒပ်နာဖအ် ကံၚ်ဇြဳပၞာန် ပ္ဍဲပွိုၚ်ဍုၚ်ဝိုၚ်မဝ်ဂှ်တုဲ လ္ပာ်ကံၚ်ဇြဳပၞာန် ဟိုတ်နူဗ္တိုက်ထောံလဝ်မခတိုဟ်ဂှ်ရ ပေါဲဗ္တိုက်သ္ကာတ်မြဟ်လဝ်ဂှ် သ္ကိုပ်ဗိုလ်ဇၞော် နဝ်ဘူ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ပေါဲဗ္တိုက်ဂှ် သ္ကာတ်မြဟ်ဒၟံၚ်ရောၚ် ဟီုဂွံရ။ ဗ္ဒိုပ်ဒဵုနာဖအ်ဂှ်လေဝ် နူဂယးဏံ နူ ၇ နာဍဳ ၈ နာဍဳဂှ် ပေါဲဗ္တိုက်သ္ကာတ်မြဟ်ဒၟံၚ်ရ။ လ္ပာ်ကံၚ်ဇြဳပၞာန် ကၠုၚ်ကဵုက္ၜၚ်ကျာတုဲ ထောံမခတိုဟ်ဗ္တိုက်ဒၟံၚ်တံ နွံရ။ အကာဲအရာသီဏာဖအိုတ်မာန်ဂှ်တှ်ေ ဟွံဂွံသ္ပဒတန်ဏီပုဟ်။ ဗွဲမဂၠိုၚ်ဂှ်တှ်ေ သီဂွံယျဂှ် ဟီုဒၟံၚ်အိုတ်ရ။ ဆ္ဂး ဂွံသ္ပဒတန် ဗွဲမလုပ်သၞောဝ်ဂှ်တှ်ေ ရဲမုက်ပၞာန်မဆေၚ်စပ်တံ ဂွိုအ်ကဵုဏီပုဟ်” သာ်ဝွံ ဟီုရ။
ဗ္ဒိုပ်ဒပ်နာဖအ်ဝွံ ဒှ်ဗ္ဒိုပ်ဒပ်ကံၚ်ဇြဳပၞာန် မၞုံဗ္ဒါဲဍုၚ်လိုၚ်ဇြာ ဌာန်ဂအုပ် KIA တုဲ ဒှ်ဗ္ဒိုပ်ဒပ်ပၟိက်ဇၞော် သွက်ဗျူဟာပရေၚ်ပၞာန်မွဲတုဲ ပပ္တံနူကဵုဂိတုမာတ် ၁၈ ဂှ် ဒပ်ပံၚ်ကောံ KIA တံ စဗ္တိုက်လဝ်ရ။
ဌာန်ပရိုၚ်ဖျေံသ္ဇိုၚ်အပ္ဍဲဒေသလ္ၚဵုတံဂှ် KIA သီဂွံလဝ် ဗ္ဒိုပ်နာဖအ်ဂှ်တုဲ အပ္ဍဲဗ္ဒိုပ် လွဟ်လက်နက်မကမ်တံ သှ်ေဒၟံၚ်တုဲ ကောန်ဒပ်ကံၚ်ဇြဳပၞာန်တံလေဝ် မၞိဟ်ဂြိပ်တိတ်တံကဵု မၞိဟ်ချိုတ်အာတံလေဝ် နွံဒၟံၚ်ဂှ် နိဿဲကေတ် ဂလာန်သၞာဲဒဴ KIA မွဲတၠတုဲ ထ္မံက်ထ္ၜးလဝ်ရ။
ပ္ဍဲဂိတုမာတ် ၁၉ ဂှ်လေဝ် KIA သီဂွံလဝ် ဗ္ဒိုပ် ၆၆၆၇ ဗ္ဒါဲဗ္ဒိပ်နာဖအ်ဂှ်ကဵု ဗ္ဒိုပ် (ရၚ်ဆိုၚ်ကုန်း) ၜါဗ္ဒိုပ်တုဲ ဗ္ဒိုပ်ဒပ်သှ်ေဒၟံၚ် အူဂါယှာန်၊ အူလဝ်ဂံၚ်တံဂှ်လေဝ် ပ္ဍဲဂိတုမာတ် ၂၁ တေံ သီဂွံလဝ်ရ။
သ္အာၚ်နူဂှ်ပၠန် လ္ပာ်ကွာန် (ကုန်းလော၊ မြို့သစ်) ပွိုၚ်ဍုၚ်မိုဝ်မံက်ဂှ်လေဝ် ပေါဲဗ္တိုက် နွံဒၟံၚ်တုဲ လ္ပာ်ကံၚ်ဇြဳပၞာန် ဟိုတ်နူထောံဒၟံၚ်မခတိုဟ် နကဵုက္ၜၚ်ကျာဂှ်တုဲ ပေါဲဗ္တိုက်တံ ဆက်သ္ကာတ်မြဟ်ကၠုၚ်မာန်ရောၚ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−NUG