တဳဟဳရာန်၊ ဨပရဴ ၁၀
အပ္ဍဲပေါဲသဳကၠဳ ကုအမေရိကာန် ပ္ဍဲဂိတုဨပရဴ ၁၂ တေံ နကဵုဍုၚ်အဳရာန် သွက်ဂွံပ္ညဳပ္ညပ်အာ စပ်ကဵုကိုန်စဳမာန်နျူကလဳယျာညးတံတုဲ ဂွံကေတ်တၚ်တုပ်စိုတ်ဂှ် ဒှ်ဒၟံၚ်ဒတုဲရောၚ် ဝန်ဇၞော်ကာဍုၚ်သ္အာၚ် အဗက် အာရက်ချဳ ဟီုလဝ်ရ။
ဆ္ဂး နကဵုသမ္မတအမေရိကာန် ဒဝ်နေဝ်ထြာမ် ဗွဲကိုပ်ကၠာ ဒးကေတ်တၚ်တုပ်စိုတ် ညံၚ်ဟွံဂွံကေတ်အရေဝ် နကဵုပရေၚ်ပၞာန်ဏောၚ်တုဲ နကဵုအဳရာန် ပွမဘပဠ ကရေပ်ဓရတ်တံဂှ် ဒုၚ်အာတဲဟွံသေၚ်ပုဟ်ဂှ် ဝန်ဇၞော် အာရက်ချဳ ဟီုဗပေၚ်စုတ်လဝ်ရ။
သမ္မတထြာမ်ဂှ်တှ်ေ ဒဒှ်ရသဳကၠဳအာ ကုအဳရာန် တိုက်ရိုက်ဏောၚ်ဂှ် ပ္ဍဲဂိတုဨပရဴ ၇ တေံ ဟွံထေၚ်လဝ်မွဲသာ် လလောၚ်တြးကၠုၚ်လဝ်ကီုလေဝ် ပေါဲသဳကၠဳပ္ညဳပ္ညပ် ပ္ဍဲဂိတုဨပရဴ ၁၂ ပ္ဍဲဍုၚ်အိုဝ်မာန်ဂှ်ဝွံ ဒှ်ပရေၚ်ပ္ညဳပ္ညပ် တိုက်ရိုက်ဟွံသေၚ်ပုဟ်ဂှ် ဝန်ဇၞော် အာရက်ချဳ ဟီုကၠုၚ်လဝ်ရ။
အပ္ဍဲအာယုက်သမ္မတအလန်ပထမတေံ ထြာမ် မနုက်ပ္တိတ်လဝ် အမေရိကာန် နူကဵုတၚ်တုပ်စိုတ်နျူကလဳယျာ ၂၀၁၅ အကြာအဳရာန်ကဵု ဍုၚ်ဇြဟတ်ဇၞော်ဂမၠိုၚ်ဂှ် ယဝ်ပေါဲသဳကၠဳ ဟွံအံၚ်ဇၞးမ္ဂး အဳရာန် ဒှ်အန္တရာယ်ဇၞော်ဇၞော်ဏောၚ်ဂှ် ကဵုလဝ်သတိရ။
အကြာအမေရိကာန်ကဵု အဳရာန်ဂှ် ဟိုတ်နူပရေၚ်ဆက်ဆောံကလုတ်တမာန်ဟွံမွဲတုဲ ပ္ဍဲဂိတုတုဲကၠုၚ်တေံ နူကဵုဍုၚ်ယူအေအဳမွဲကဆံၚ် ထြာမ် ချူပလံၚ်ဗစိုပ်လဝ်လိက် ဇရေၚ်က္ဍိုပ်သ္ကိုပ်အဳရာန် အယာတိုဝ်လာ အလဳခါမေနဳရ။
ပ္ဍဲလိက်ဏံဂှ် နကဵုအဳရာန် သွက်ဂွံဝေၚ်ပါဲအာ ပရေၚ်ဗ္တိုက် နူကဵုအမေရိကာန်ကဵု အေဿရဂှ်ေ ထြာမ် ကဵုလဝ်သမ္တီ ဒဒှ်ရအခေါၚ်ပိုၚ်ပြဳလွဟ်နျူကလဳယျာဟွံမွဲ မဒှ်ရ။
အပ္ဍဲပရေၚ်ဆဵုဂဗကဵု သ္ကိုပ်ဝန်ဇၞော်အေဿရေ နေတာန်ညာဟု ပ္ဍဲသ္ၚိဗုဂှ် အမေရိကာန် ကေုာံ အေဿရေ ၜါဍုၚ် တုပ်လဝ်စိုတ် နကဵုအဳရာန် အခေါၚ်ပိုၚ်ပြဳလွဟ်နျူကလဳယျာ ဟွံမွဲမဒှ်ရ။
ယဝ်ရတၚ်တုပ်စိုတ်ဂမၠိုၚ် လအ်လဒၟံၚ်မ္ဂး ကေတ်အာအရေဝ် ကုအဳရာန် နကဵုပရေၚ်ပၞာန်ဏောၚ်ဂှ်လေဝ် အမေရိကာန် ကေုာံ အေဿရေတံ တုပ်လဝ်စိုတ်ရ။
အဳရာန်ဂှ်တှ်ေ ကိုန်စဳမာန်နျူကလဳယျာညးတံဝွံ ဒှ်သွက်ပရေၚ်ၜိုဟ်လလမ်ရဏောၚ်တုဲ သွက်ဂွံကၠောန်ပ္တိတ်လွဟ်နျူကလဳယျာ ကေုာံ သွက်ဂွံပိုၚ်ပြဳအာဂှ် ချပ်အာဟွံသေၚ်ပုဟ်ဂှ် ဟီုလဝ်ရ။
ဆ္ဂး ကြဴနူအမေရိကာန် နုက်တိတ် နူတၚ်တုပ်စိုတ်နျူကလဳယျာ ၂၀၁၅ တေံတုဲဂှ် အဳရာန် ကၠောန်ပ္တိတ်သ္အးဇ္ၚးဒၟံၚ်ယူရေနဳယာန် ကြပ်အဆံၚ်ကၠောန်ပ္တိတ်လွဟ်ဂွံဂှ် လအ်ဒၟံၚ်ယျ မဒှ်ရ။
နကဵုအဳရာန် ယဝ်ကၠောန်ပ္တိတ်သ္အးဇ္ၚးဒၟံၚ် ယူရေနဳယာန် အတိုၚ်ဗ္ၜတ်လၟုဟ်မ္ဂး အပ္ဍဲပွိုၚ်မွဲသၞာံ ကၠောန်ပ္တိတ်မဗုမ်နျူကလဳယျာမာန်ရောၚ် တၠပညာဂမၠိုၚ် ချိၚ်ခယျလဝ်အိုတ်ရ။
Ref: BBC