လံၚ်လုၚ်၊ မာတ် ၂၃
ရးတၞၚ်သဳ လ္တူဍုၚ်လံၚ်လုၚ် ပ္ဍဲကဵုဗ္ဒါဲၝောံခန်ပွိုၚ်ဍုၚ် မၞုံအရာပ်(ကကြီး) ဂှ် ကွဳစက်ကံၚ်ဇြဳပၞာန်မွဲဖ္ဍိုက် ဒးဒုၚ်ဗ္တိုက်လဝ်တုဲ ကောန်ဒပ်ကံၚ်ဇြဳပၞာန် ၃ တၠ ချိုတ်အာလဝ်ဂှ် ဂွံတီကေတ် နူကဵုညးဒေသ ကေုာံ ဂကောံဒပ်ဒမၠုက်နွေဥူတံရ။
သွက်အခန်ကၞာတ္ၚဲဒပ်ပၞာန်ဗၟာ ပ္ဍဲဂိတုမာတ် ၂၇ ပလေဝ်ပလေတ်လဝ် ပ္ဍဲကဵုၝောံခန်ပွိုၚ်ဍုၚ်လံၚ်လုၚ်တံဂှ် ပ္ဍဲဂိတုမာတ် ၂၁ အခိၚ်ဗ္တံဂှ် ဒပ်စဵုဒၞါညးဍုၚ်ကွာန်တံ လုပ်စိုပ်ပလီုပလာ်လဝ်ရ။
ပလေဝ်ပလေတ်လဝ်အခန်ကၞာဂှ် ဒၟါနူဒးဒုၚ်ပလီုလဝ်တုဲ ကွဳစက်ကံၚ်ဇြဳပၞာန်မွဲဖ္ဍိုက် ကၠုၚ်စၟဳတ်ဂှ် ပ္ဍဲဂိတုမာတ် ၂၂ အခိၚ်နူဂယး ၜိုတ် ၇ နာဍဳဂှ် ဒပ်စဵုဒၞါညးဍုၚ်ကွာန်တံ မၚ်ဗ္တိုက်လဝ်ရ။
အပ္ဍဲပရေၚ်ဗ္တိုက်ဏံ ကောန်ဒပ်ကံၚ်ဇြဳပၞာန် ပါကၠုၚ်လ္တူကွဳစက် ၃ တၠ ချိုတ်အာလဝ်တုဲ ဟိုတ်နူကြပ်ဒၟံၚ်ကဵု ဗ္ဒိုပ်ဗၠာဲသၟိၚ်ဂှ်ရ ဂွိုအ်ကပှ်လဝ် လွဟ်လက်နက်မကမ်တံပုဟ်ဂှ် ညးဒုၚ်တာလျိုၚ်လလောၚ်ပရိုၚ် ဂကောံဒပ်ဒမၠုက်နွေဥူတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်ဒပ်ကံၚ်ဇြဳပၞာန်တံ ဒးဒုၚ်ဗ္တိုက်တုဲ နူကဵုဗ္ဒိုပ်ဗၠာဲသၟိၚ်ၝောံဍုၚ်လံၚ်လုၚ် ပန်ပှော်လဝ် နကဵုလွဟ်ဇၞော်၊ လွဟ်ဍောတ်တံဂှ် ဂွံတီကေတ်ရ။
ဟိုတ်နူလၟေၚ်ဒဒှ်ဏံတုဲ ကၟာတ်လဝ် ဂၠံၚ်ကြပ်ဗ္ဒိုပ်ဗၠာဲသၟိၚ်လ္ၚဵုတံ ယာယဳတုဲ အခိၚ်လဒေါဝ်တ္ၚဲဂှ် ကလေၚ်ကဵုအခေါၚ်တတ်ကၠောံအာကၠုၚ်ကီုလေဝ် စၟဳတ်ဒၟံၚ်တံ သာတုဲတေၚ်ဂြတ်လဝ်ဂှ် ဂွံတီကေတ် အတိုၚ်ဂလာန် ညးလ္တူဍုၚ်တံရ။
လ္တူဍုၚ်လံၚ်လုၚ်ဂှ် စနူဂိတုတုဲကၠုၚ်တေံတုဲ ပရေၚ်ပၞာန်ညိၚ်ဝတ်ဒၟံၚ်တုဲ အရာပ်လ္တူဍုၚ်တံဂှ်တှ်ေ သ္ကိုပ်အုပ်ဓုပ် ကံၚ်ဇြဳပၞာန်ခါန်ကၞက်လဝ်တံ ကံက်ဒၟံၚ်စရၚ် သွက်ဂွံယိုက်ဂၠေၚ်လျိုၚ်ပၞာန် မွဲအရာပ် ၅ တၟံကၠံဂှ် သ္ဂးရ။
တုဲကၠုၚ် ပ္ဍဲဂိတုဂျာန္နဝါရဳ ၃၁ တေံဂှ်လေဝ် ဗ္ဒိုပ်ဗၠာဲသၟိၚ်တိဍာ်မံၚ်မကာန် ပွိုၚ်ဍုၚ်လံၚ်လုၚ် ဒးဒုၚ်ဗ္တိုက်တုဲ ကောန်ဒပ်ကံၚ်ဇြဳပၞာန် ၃ တၠ ချိုတ်တုဲ ၇ တၠ ကလိဂွံလဝ်ဝပ်ဂှ် ဂွံတီကေတ်ရ။
ပရိုၚ်−သြၚ်လောန်တိုၚ်(မ်)
ဗီု−ဒပ်ဒမၠုက်နွေဥူ