ဘာပန်၊ မာတ် ၂၃
ပ္ဍဲခရိုၚ်ဘာပန် ဗော်သွးကောန်ဂကူကရေၚ် KNU ဂှ် ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်တုဲ သွက်ညးပါဲဒဴဘဲပၞာန် ဒးပါဲဒလေတ်ဒၟံၚ်တံဂှ် နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ်တံရောၚ်ဂှ် ဂွံတီကေတ် အတိုၚ်ဂလာန် ညးမၞုံအခေါၚ်ဟီုဂး ဒပ်မဟာ ၅ တံရ။
ပ္ဍဲအကြာတ္ၚဲတံဏံ ဒပ်ကံၚ်ဇြဳပၞာန် ပန်ပှော်လွဟ်ဇၞော်ကြာန်န်၊ ထောံမခတိုဟ်နကဵုက္ၜၚ်ကျာ၊ ဂြာတ်မခတိုဟ် နကဵုဒရုၚ် လ္တူဍုၚ်ဘာပန် ကေုာံ ကွာန်ရးဗ္ဒါဲဗ္ဒါဲ ပ္ဍဲတိဍာ်ဒပ်မဟာ ၅ ခရိုၚ်ဘာပန် KNU ဂှ် အရိုဟ်ဟ်တ္ၚဲရ။
ဟိုတ်နူပရေၚ်ဗ္တိုက်ပန်ပှော် ဒပ်ကံၚ်ဇြဳပၞာန်တုဲ ကောန်အရာပ်ဇီုကပိုက်ချိုတ် ဟွံမွဲကီုလေဝ် တိရစ္ဆာန်သ္ၚိ ဇီုကပိုက်ချိုတ်အာလဝ်တံ နွံတုဲ စမြိုၚ်သ္ၚိဒၟံၚ်ဗွဲမဂၠိုၚ်ဂၠေၚ်လေဝ် ဇီုကပိုက်လီုလာ်ဒၟံၚ်ဂှ် ညးမၞုံအခေါၚ်ဟီုဂး ဒပ်မဟာ ၅ သ္ကိုပ်ဗိုလ်သဝ်ကလေဝ်ဒိုဝ် ဟီုရ။
ပ္ဍဲဂိတုမာတ် ၁၉ ကဵု ၂၀ ပွိုၚ်ၜါတ္ၚဲ ဒပ်ကံၚ်ဇြဳပၞာန် ထောံလဝ်မခတိုဟ်ဒရုၚ် ၂၂၂ မ လ္တူကွာန် ၆ ကွာန် ခရိုၚ်ဘာပန်ဂှ်တုဲ ကောန်အရာပ် ၁၂၀၀ ပြၚ် ဒးဂြိပ်ဒဴပါဲဒလေတ်ဒၟံၚ်ရောၚ် ဒပ်မဟာ ၅ လလောၚ်ပ္တိတ်လဝ်ရ။
ညးပါဲဒဴဘဲပၞာန် ဒးဂြိပ်ဒဴပါဲဒလေတ်ဒၟံၚ်တံဝွံ ဒးဇူဒီုဒၟံၚ် ဒၞါဲမကြပ်တံဂှ်တုဲ နွံပၟိက်ဒၟံၚ်ကဵု အရီုဗၚ်ပရေၚ်ဗ္စာရဏာမၞိဟ် မပ္တံကဵု ဇွောံမစၞစ၊ ဖ္ဍာန်ဒဒၚ် ကေုာံ ဂဥုဲဇဗတံရောၚ်ဂှ်လေဝ် သ္ကိုပ်ဗိုလ်သဝ်ကလေဝ်ဒိုဝ် သ္ဂးရ။
ညးဍုၚ်ကွာန်ပါဲဒဴဘဲပၞာန်တံဝွံ အခိၚ်ဒးဂြိပ်ဒဴပါဲဒလေတ်ဒၟံၚ်ဂှ် ဇွောံမပိုတ်သ္ကုတ်တံ က္တဵုဒှ်လဝ်တုဲ ယဲကၠောံထၞာန်တံလေဝ် က္တဵုဒှ်ဒၟံၚ်ဂှ် ဂွံတီကေတ် အတိုၚ်တၚ်လလောၚ်တြး ခရိုၚ်ဘာပန် KNU ရ။
ပရိုၚ်−သြၚ်လောန်တိုၚ်(မ်)
ဗီု−KNU