နေဗျဳဒဝ်၊ မာတ် ၂၃
ပ္ဍဲကဵုစရၚ်သြန်သွက်ဂွံရပ်စပ် ခယျရန်လဝ် သွက်သၞာံဘဏ္ဍာ ၂၀၂၄−၂၀၂၅ ဂှ် ကဵုက္ဍိုပ်တုဲ သွက်ဂွံရပ်စပ်အာခရိတ်အရပ်စပ် မဒှ်အထံက်အပၚ် ကုပရေၚ်ညိၚ်ဝတ်ၜိုဟ်သြိုဟ်ကၟိန်ဍုၚ်၊ ပရေၚ်သၞောဝ်အုပ်လဒံတံဂှ် က္ဍိုပ်သ္ကိုပ်ပၞာန်သီအဝဵု ဟီုရ။
က္ဍိုပ်သ္ကိုပ်ပၞာန် သ္ကိုပ်ပၞာန်ဇၞော် မေန်အံၚ်လှာၚ် မဒှ်ဥက္ကဌကမ္မယှေန် စပ်ကဵုပရေၚ်ဘဏ္ဍာဂှ် ဟီုလဝ် ပ္ဍဲဂိတုမာတ် ၂၁ တေံ ပ္ဍဲကဵုကောံဓရီု ကမ္မယှေန်စပ်ကဵုပရေၚ်ဘဏ္ဍာကံၚ်ဇြဳပၞာန် မကၠောန်ဗဒှ်လဝ် ပ္ဍဲနေဗျဳဒဝ်တေံရ။
က္ဍိုပ်သ္ကိုပ်ပၞာန်ဂှ် ခရိတ်အရပ်စပ် မဒှ်အထံက်အပၚ် သွက်ကၟိန်ဍုၚ်ဂွံညိၚ်ဝတ်၊ ပရေၚ်အုပ်လဒံသၞောဝ်တံဂှ် တိုက်ရိုက်ကဵုဒှ်၊ တိုက်ရိုက်ဟွံသေၚ်ကဵုဒှ် ကဵုက္ဍိုပ်တုဲသ္ဂောံရပ်စပ်အာ ခရိတ်အရပ်စပ်မဒှ်အထံက်အပၚ်တံဂှ် ဟီုလဝ်ရ။
အတိုၚ်ဂလာန်က္ဍိုပ်သ္ကိုပ်ပၞာန်ဂှ်မ္ဂး ပ္ဍဲသၞာံဘဏ္ဍာကၠုၚ်စိုပ်ဏံ နကဵုကံၚ်ဇြဳပၞာန် နကဵုတၚ်ထ္ၜးဟိုတ်စဵုဒၞါကၟိန်ဍုၚ်ဂှ် ထပ်ပပဵုပ္တိုန်အာ ခရိတ်အရပ်စပ်ပၞာန်တံဏောၚ် ဂွံကၠိုဟ်ကေတ်ရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန်၊ ပရေၚ်ပၞာန် ဥူတာန်သဵုနာၚ်ဂှ်လေဝ် ဂလာန်က္ဍိုပ်သ္ကိုပ်ပၞာန်ဟီုဂှ်ဝွံ ပ္ဍဲကဵုသၞာံဘဏ္ဍာဏံလေဝ် နကဵုကံၚ်ဇြဳပၞာန် ထ္ၜးဟိုတ်ကဵုသၞောဝ်ယိုက်ဂၠေၚ်လျိုၚ်ပၞာန်တုဲ သၠုၚ်ပ္တိုန်ခရိတ်အရပ်စပ်ပရေၚ်စဵုဒၞါဏောၚ်ဂှ် သ္ၚဳဂၠိပ်လဝ်ရ။
“ကံၚ်ဇြဳပၞာန်ဂှ် သၠုၚ်ပ္တိုန်ဒၟံၚ် ခရိတ်အရပ်စပ်ပရေၚ်ဘဏ္ဍာဍေံတံရဏောၚ်။ သၞာံတုဲကၠုၚ်တေံဟီုတှ်ေ ခရိတ်အရပ်စပ်အလဵုအသဳ စဵုကဵု ၅၀ တၟံကၠံ ရပ်စပ်လဝ်သွက်ပရေၚ်စဵုဒၞါဂၠိုၚ်အိုတ်တုဲ ကၠောန်ၜိုတ်ရေၚ်တၠုၚ်ဒၟံၚ် ပွပကီုပရာပ်တံ နွံရ။ အေ ဂှ်တှ်ေ လၟုဟ်ဂှ်လေဝ် ထ္ၜးဟိုတ်ကဵုသၞောဝ်ယိုက်ဂၠေၚ်လျိုၚ်ပၞာန်တုဲ ဂလိုၚ်ပ္တိုန်သြန်ဘဏ္ဍာပၠန်ဏောၚ်။ အေ ဂှ်တှ်ေ ၅၀ တၟံကၠံပြၚ်တုဲ သၠုၚ်ပ္တိုန်ၜိုတ်လဵုရောဟီုဂှ် ဒးမၚ်ကျောဝ်မံၚ်ဏီဏောၚ်” သာ်ဝွံ သ္ဂးရ။
ကံၚ်ဇြဳပၞာန်ဝွံ ကြဴနူသီအဝဵုတုဲ ဒဵုကဵုအခိၚ်လၟုဟ် သီုနေဗျဳဒဝ် ဒၞါဲဗြိုဟ်အာဏာစက်ဂှ်ကီု ပါဲနူကဵုဍုၚ်လ္ဂုၚ် ကေုာံ ရးဨရာဝတဳတံဂှ်မ္ဂး ကြပ်အလုံဍုၚ်မွဲ ဒးပံက်လဝ်မုက်ပၞာန်တုဲ ပ္ဍဲကဵုပရေၚ်ပၞာန်ဗလးတိတံဂှ် ဟိုတ်နူကျကၠုၚ်ဒၟံၚ်ပရေၚ်ဂှ်ရ ဒးသ္ပပဓာန်ကၠုၚ် အရီုဗၚ်ပၞာန်ကျာတံရ။
မွဲလ္ပာ်ဂှ်ပၠန် အပ္ဍဲသီအဝဵုဏံ နကဵုဂကောံရပ်လွဟ်ကောန်ဍုၚ်အရၚ်ဂမၠိုၚ် ဟိုတ်နူပၞာန်ထ္ပက် ဂကောံဇြဟတ်ပၠန်ဂတးက္ညၚ်တံဂှ်တုဲ သွက်ဂွံဗပေၚ်ဇြဟတ်ဒပ်လေၚ်ဒိုက်ဒၟံၚ်တံဂှ် ပ္ဍဲဂိတုဖေဖဝ်ဝါရဳ ၁၀ တေံ ဂယိုၚ်ပ္တိုန်လဝ် သၞောဝ်ယိုက်ဂၠေၚ်လျိုၚ်ပၞာန် မစၞောန်ပျးလဝ် ပ္ဍဲလက်ထက်ဥူတာန်ယှိုဲ တၠအဝဵုတြေံတေံဂှ်ရ။
ဟိုတ်ဂှ်ရ နကဵုကံၚ်ဇြဳပၞာန် ပ္ဍဲသၞာံဘဏ္ဍာတုဲကၠုၚ်တေံ ဟိုတ်နူရပ်စပ်လဝ် ခရိတ်အရပ်စပ်ပရေၚ်စဵုဒၞါ စဵုကဵု ၅၆၀၀ ဗဳလျာန်ဒ္ကေဝ်ပြၚ်ဂှ်ရ ပ္ဍဲသၞာံဘဏ္ဍာဏံလေဝ် ဂလိုၚ်ပ္တိုန်နူကဵုပမာဏ သၞာံတုဲကၠုၚ်တေံမာန်ဂှ် ညးခါတ်အကာဲပရေၚ်ပၞာန်တံ သ္ၚဳဂၠိပ်လဝ်အိုတ်ရ။
နကဵုကံၚ်ဇြဳပၞာန် သွက်သၞာံဘဏ္ဍာ ၂၀၂၄−၂၀၂၅ လမျီုစလုပ်အာ ပ္ဍဲဂိတုဨပရဴ ၁ ဂှ် ပ္ဍဲဂိတုမာတ် ၃၁ ဏံ သွက်ဂွံလလောၚ်တြးစၞောန်ပျးအာ စရၚ်သြန်ကၟိန်ဍုၚ် သ္ဂောံရပ်စပ် မရန်ခယျလဝ်ဂှ်ကဵု သၞောဝ်စပ်ကဵုသြန်ဘဏ္ဍာတံ ဗွဲမလုပ်သၞောဝ် နွံဒၟံၚ်ရ။
ဟိုတ်ဂှ်ရ သၞောဝ်အပြောံ စပ်ကဵုသြန်ဘဏ္ဍာ ကေုာံ စရၚ်သြန်ကၟိန်ဍုၚ်သ္ဂောံရပ်စပ် မရန်ခယျလဝ်တံဂှ် နူကဵုဂကောံအလဵုအသဳကၟိန်ဍုၚ်မွဲကဆံၚ် ဂွံပ္တိုန်ထ္ၜးဇရေၚ်ကံၚ်ဇြဳပၞာန် ဗွဲမဂတာပ်အခိၚ် ကောန်ကမ္မယှေန်စပ်ကဵုပရေၚ်ဘဏ္ဍာတံ သွက်ဂွံဘိုၚ်သဳကၠဳ သ္ပဒတန်ကဵုအိုတ်ဂှ် က္ဍိုပ်သ္ကိုပ်ပၞာန် ဟီုလဝ် ပ္ဍဲကောံဓရီုရ။
ပ္ဍဲကဵုစရၚ်သြန်သ္ဂောံရပ်စပ် မရန်ခယျလဝ် သၞာံဘဏ္ဍာဏံဂှ် သွက်တမ်ရိုဟ်မၞိဟ်ဂွံဖောအ်ဗြေဝ်တောတက် မပ္တံကဵုခရိတ်အရပ်စပ် ပရေၚ်ပညာ၊ ပရေၚ်ထတ်ယုက်၊ ပရေၚ်ကၠောန်ပ္တိတ်ဇြဟတ်ဓာတ်လလဳ၊ ပရေၚ်ဆက်စၠောံအာကၠုၚ်၊ ကွတ်စက်၊ ပရေၚ်တဵုလွဳ၊ ခရိတ်အရပ်စပ် တန်သၠုၚ်ပရေၚ်လွဳတိရစ္ဆာန်တံ ကဏ္ဍတံဏံဒှ်တမ် ကဵုက္ဍိုပ်ရပ်စပ်သုၚ်စောဲအာဏောၚ်ဂှ် သ္ဂးလဝ်ရ။
သ္အာၚ်နူဂှ်ပၠန် ပ္ဍဲသၞာံဘဏ္ဍာတုဲကၠုၚ်တေံ ဌာနဝန်ဇၞော်ကၟိန်ဍုၚ်ဂမၠိုၚ် ရံၚ်ကဵုအကာဲအရာတိဍာ်တုဲ ရေၚ်တၠုၚ်ကမၠောန်ဟွံမာန်ဂှ်ကီု ဒၟါနူဟိုတ်နာနာတုဲ ပ္ဍဲကဵုသြန်ဂအုံနာနာပဵုဒၟံၚ်တံဂှ် နဒဒှ်ကိစ္စတၟေၚ်မွဲ သွက်ဂွံပြံၚ်လှာဲသုၚ်စောဲအာ ပ္ဍဲကဵုပရေၚ်ပညာ၊ ပရေၚ်ထတ်ယုက်၊ ပရေၚ်သိုၚ်ခၞံတံဂှ် က္ဍိုပ်သ္ကိုပ်ပၞာန် ဟီုလဝ်ရ။
ဥူဖေတာန် ညးစၞးကၠတ်ထဝ်တြေံ ဂွံလဝ်ဇၞးပေါဲရုဲမာဲ ပ္ဍဲလက်ထက်အလဵုအသဳဒဳမဝ်ကရေဇြဳၜါဝါအဆက်က်ဂှ် ပွမဟီုဂး သ္ဂောံရပ်စပ် ပ္ဍဲပရေၚ်ပညာ၊ ပရေၚ်ထတ်ယုက် ကေုာံ ကဏ္ဍတၞဟ်ဟ်တံဂှ်ဝွံ ဟီုဒၟံၚ်ညံၚ်ဂွံကလၚ်ခိုဟ်ဏောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဂလိုၚ်ပ္တိုန်ခရိတ်ပၞာန်တုဲ ပါဲနူကဵုကၟိန်ဍုၚ်ဟွံဖောအ်ဗြေဝ်ကၠုၚ်ဂှ် တၠအဝဵုပၞာန်တံ သာတုဲက္တဵုကၠုၚ်ရဏောၚ်။ သာတုဲ ထ္ၜးကၠုၚ်အဇှ်ေအမှ်ေတံရ။ ဟိုတ်ဂှ်ရ အာတ်မိက်ခရိတ်အရပ်စပ်ပၞာန်ဂှ်ဝွံ အခိၚ်လၟုဟ် ဒှ်ဟွံထေက်ပုဟ်။ သုၚ်စောဲ ပ္ဍဲပရေၚ်ပညာ ကေုာံ ပရေၚ်ထတ်ယုက် ကဏ္ဍတၞဟ်ဟ်တံဟီုဂှ် ဟီုမံၚ် ၜိုတ်ကလၚ်ခိုဟ်ရဏောၚ်။ ဍာံဍာံဂှ် ခရိတ်အရပ်စပ်ပၞာန်ဂှ် ဂၠိုၚ်ဒၟံၚ်တၟာလအ်ရ။ လဆောဝ်လဆောဝ် ဒးကဵုဒၟံၚ် လ္တူ ၂၀ တၟံကၠံဏောၚ်။ ဟိုတ်ဂှ်ရ အခိၚ်ဏံ ခရိတ်အရပ်စပ်ပၞာန်တံဂှ် ယဝ်သုၚ်စောဲပ္ဍဲပရေၚ်ဖောအ်ဗြေဝ်ကၟိန်ဍုၚ်မာန်မ္ဂး သာခိုဟ်ရ” သာ်ဝွံ သ္ဂးရ။
ခရိတ်အရပ်စပ်ပရေၚ်စဵုဒၞါ ဒပ်ပၞာန်ဂှ်ဝွံ သွက်ဂွံကေတ်ဇၞး ပ္ဍဲပေါဲဗ္တိုက် မ္ဒးဗ္တိုက်ဒၟံၚ်မၞိဟ်ဇကုကဵုဇကု ပ္ဍဲပၞာန်အပ္ဍဲဍုၚ်တံဂှ်ကီု၊ သွက်ဂွံရာန်လွဟ်လက်နက် စပ်ကဵုပရေၚ်ပၞာန်တံ ကေုာံ သွက်ကောန်ပၞာန်တံဂှ် သာတုဲရပ်စပ်အာဒှ်မာန်ဂှ် ညးထံက်ထ္ၜးလဝ်ရ။
အတိုၚ်သၞောဝ်စပ်ကဵုသြန်ဘဏ္ဍာ မစၞောန်ပျးလဝ် ပ္ဍဲသၞာံဘဏ္ဍာတုဲကၠုၚ်တေံ ပ္ဍဲဂိတုမာတ် ၃၁ ဂှ်မ္ဂး သွက်ဌာနဝန်ဇၞော်ကၟိန်ဍုၚ် ကေုာံ သွက်ဌာနက္ဍိုက်ပ် ၄၅ ကဏ္ဍဂှ် ကဵုလဝ်အခေါၚ် ခရိတ်အရပ်စပ် ၁၉၀၀၀ ဗဳလျာန်ဒ္ကေဝ်ပြၚ်ရ။
ပ္ဍဲကဵုဏံ ခရိတ်အရပ်စပ်ကာစဵုဒၞါ ဒပ်ကံၚ်ဇြဳပၞာန်ဂှ် ကဵုလဝ်အခေါၚ် စဵုကဵု ၅၆၀၀ ဗဳလျာန်ဒ္ကေဝ်ပြၚ်တုဲ ခရိတ်အရပ်စပ် ကဵုလဝ်အခေါၚ် ပ္ဍဲကဵုကဏ္ဍပရေၚ်ပညာ၊ ပရေၚ်ထတ်ယုက် ကေုာံ ကဏ္ဍဇြဟတ်ဓာတ်လလဳ မၞုံပၟိက်သွက်ညးဍုၚ်ကွာန်တံဂှ်ဝွံ ၜတ်ကၞာတ်ကဵုခရိတ်အရပ်စပ်ကာစဵုဒၞါမ္ဂး အောန်စှ်ေအာလဝ် တီတီရ။
ခရိတ်အရပ်စပ်ကာစဵုဒၞါ ပ္တိုန်ထ္ၜးကၠုၚ် ပ္ဍဲလက်ထက်အလဵုအသဳကောန်အရာပ်ဂှ် ၜိုတ်ပမာဏ ကၠတ်ထဝ်ကၟိန်ဍုၚ် ကဵုအခေါၚ်ဂှ်ဟေၚ် ဂွံရပ်စပ်လဝ်ကီုလေဝ် ကြဴနူသီအဝဵုတုဲ ၜိုတ်ပမာဏနွံပၟိက်ဂှ် ကံၚ်ဇြဳပၞာန် ပ္တိတ်ရပ်စပ်ဒၟံၚ်ရောၚ် ပါ်ပါဲဒၟံၚ်တံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−MOI