မတ်မလီု၊ မာတ် ၂၃
နူအပ္ဍဲတွဵုရးဍုၚ်မန် ညးအာတရဴ ဌာန်ဒေသနာနာတံဂှ် ဒပ်ကံၚ်ဇြဳပၞာန် ကေုာံ ဒပ်ဗၠာဲသၟိၚ်တံ လိက်ထံက်ဂလာန်ဟွံပါမ္ဂး စၟဳတ်တုဲ ရပ်ဒက်အာတ်ဒၟံၚ်သြန်ဂှ် ဂွံတီကေတ် အတိုၚ်ဂလာန် ညးအာတရဴ ကေုာံ ညးလျိုၚ်လာၚ်ကွဳစက်တံရ။
ကံၚ်ဇြဳပၞာန်ဝွံ ကၠာတေံ ယဝ်ရတၞးကာဒ်ကောန်ဍုၚ်ပါမ္ဂး ကဵုအခေါၚ်အာကၠုၚ်တရဴကီုလေဝ် ဗွဲကြဴဏံ ယဝ်ရလိက်ထံက်ဂလာန်အရာပ် ဟွံသေၚ်မ္ဂး လိက်ထံက်ဂလာန်ဗ္ဒိုပ်ဗၠာဲသၟိၚ်ပါမှ ကဵုအခေါၚ်အာကၠုၚ်အာတရဴဏောၚ်ဂးတုဲ စၟဳတ်ကၠုၚ်ရ။
ကောန်ဒပ်ကံၚ်ဇြဳပၞာန်ဝွံ ပ္ဍဲအရာစၟဳတ် လိက်ထံက်ဂလာန် ညးအာတရဴတံဂှ် စၟဳတ်ပ္ဍဲသၞေဟ်ကွဳစက်တံဟွံသေၚ်မွဲသာ် ကြတ်စၟဳတ်ဒၟံၚ် အကြာဂၠံၚ်တံတုဲ လိက်ထံက်ဂလာန်ဟွံပါမ္ဂး အာတ်မိက်ဒၟံၚ်သြန် ကဵုဠက် နွံဒၟံၚ်ရ။
ညးတာလျိုၚ် လာၚ်ကွဳစက်ဓရိပ်တရဴဇမ္ၚောဲမွဲတၠဂှ် ကောန်ဒပ်ကံၚ်ဇြဳပၞာန်တံ စၟဳတ်ညးအာတရဴတံ လိက်ထံက်ဂလာန် ပါ၊ဟွံပါဂှ်တုဲ အာတ်မိက်ဒၟံၚ်သြန်တံဂှ်ရ ဂွံကၠုၚ်ညးအာတရဴ အောန်စှ်ေကၠုၚ်တီတီဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ဍေံတံ (စကစ) အာတ်မိက်ဒၟံၚ်လိက်ထံက်ဂလာန်တံ ပ္ဍဲဂၠံၚ်ရဏောၚ်။ ကေတ်ဒၟံၚ်သီုလိက်ထံက်ဂလာန်ဗ္ဒိုပ်ဗၠာဲသၟိၚ် သီုလိက်ထံက်ဂလာန်အရာပ်တံဏောၚ်။ ညးအာတရဴတံ ဒှ်ဒၟံၚ်အခက်အခုဲညိညရ။ တၞးကာဒ်ကောန်ဍုၚ်ဂှ်တှ်ေ ပါမံၚ်ရ။ မတံဏံ ဟွံပါမ္ဂး ဒးကဵုလှုဲပ္ဍဲဂၠံၚ်တံ မုတံ နွံဒၟံၚ်ဏောၚ်။ ဟိုတ်ဂှ်ရ အာကၠုၚ်တရဴတံဂှ်တှ်ေ သိၚ်အာအိုတ်ယျ။ တိတ်နူမတ်မလီု တိုန်လ္ဂုၚ်ဂှ်တှ်ေ သိၚ်အာယျ” သာ်ဝွံ သ္ဂးရ။
အခိၚ်ကာလလၟုဟ်ဝွံ ဟိုတ်နူဒှ်အခိၚ်ကၟာတ်ဘာက္ညၚ်ဂှ်ရ ကၠာတေံ အာလ္ၚောဝ်ကျာ်ကီု၊ စဴဌာန်ဒၟံၚ် စဴသ္ၚိတံ နွံကီုလေဝ် လၟုဟ်ဂှ် တေၚ်ဂြတ်ကၠုၚ် စဵုကဵုစၟဳတ် လိက်ထံက်ဂလာန်တံဂှ်တုဲ နူကဵုသၞာံတုဲတုဲတေံဂှ် ညးအာတရဴ စှ်ေကၠုၚ်တီတီဂှ် ညးဆက်ဟီုရ။
ညးအာတရဴမွဲတၠဂှ်လေဝ် ကံၚ်ဇြဳပၞာန် အာတ်မိက်လိက်ထံက်ဂလာန်အခေါၚ်အာတရဴတံဂှ်ဝွံ ကၠောန်ဒၟံၚ်ညံၚ်ညးဍုၚ်ကွာန်တံ ဂွံဒှ်ဒဒိုက်နာနာဏောၚ်တုဲ ဖေက်သၟတ်တံ ဟွံယိုက်ဂၠေၚ်လျိုၚ်ပၞာန် ဂြိပ်တိတ်အာဂှ်တုဲ ကဵုဒၟံၚ်ဒဒိုက်ဏောၚ် ပါ်ပါဲလဝ်ရ။
“ညအ်ဂှ်တှ်ေ ဍေံတံ ကၠောန်ဒၟံၚ်ညံၚ်ဂွံဒှ်အခက်အခုဲရဏောၚ်ဂှ် ထေၚ်ကေတ်ရ။ ညံၚ်ညးဍုၚ်ကွာန်တံ ဂွံဒှ်ဒဒိုက် ကၠောန်ဒၟံၚ်နာနာရဏောၚ်။ ဍေံတံဂှ်တှ်ေ သၟတ်တံတိတ်ဍုၚ်သ္အာၚ်တံ တုဲတှ်ေ နွံနာနာသာ်ရ။ ကၠောန်လဝ် ညံၚ်ညးဍုၚ်ကွာန်တံ ဂွံဒှ်ဒဒိုက်ရဏောၚ်၊ သၟတ်တံ တိတ်တရဴတှ်ေ ဗီုကဵုတိတ်ဍုၚ်သ္အာၚ်တံ မုတံ သာ်ဏံရ။ ရဲကံက်မာဲဒးအာတံ ဍေံတံဖေက်ဂြိပ်တုဲ ကဵုဒၟံၚ်ဒဒိုက် မၞိဟ်ဂမၠိုၚ်နာနာသာ်ဂှ် အဲညာတ်ရ” သာ်ဝွံ သ္ဂးရ။
ကံၚ်ဇြဳပၞာန်ဝွံ ကြဴနူဂယိုၚ်ပ္တိုန်သၞောဝ်ယိုက်ဂၠေၚ်လျိုၚ်ပၞာန်တုဲ သၟတ်အပ္ဍဲဒေသတံ ညံၚ်ဂွိုအ်တိတ်စ္ဍးဂှ် ပ္ဍဲကဵုလ္ဂုၚ်၊ မာန္တလေဝ် မပါလုပ် ပ္ဍဲကဵုရးဒေသဇၞော် ကေုာံ တွဵုရးတံဂှ် အာတရဴမ္ဂး လိက်ထံက်ဂလာန်ဒးပါဏောၚ်ဂှ် အာတ်မိက်ကၠုၚ်ရ။
မွဲလ္ပာ်ဂှ်ပၠန် လာၚ်ကွဳစက်ဓရိပ်ဇမ္ၚောဲတံဝွံ ဟိုတ်နူၚုဟ်ကၠေၚ်စက် သၠုၚ်တိုန်ဒၟံၚ်ဂှ်ကီု၊ ဒးကဵုၚုဟ်သၞေဟ်ကၚ် ဂၠိုၚ်ကဵုဆကီု၊ ဟိုတ်နူအကာဲအရာ ပရေၚ်ဂီုကၠီုတံတုဲ အာတရဴအောန်စှ်ေအာတုဲ ဟိုတ်နူကံၚ်ဇြဳပၞာန် ပတေၚ်ဂြတ်လဝ်တံတုဲ လာၚ်ကွဳစက်တံ ဂွံဆက်ဒတူလိုၚ် ဒှ်ဒၟံၚ်အခက်အခုဲရ။
ပ္ဍဲတွဵုရးဍုၚ်မန် လာၚ်ကွဳစက် ဓရိပ်ဒၟံၚ်တရဴဇမ္ၚောဲ ပ္ဍဲကဵုရးဒေသ ကေုာံ တွဵုရးနာနာတံဂှ် ဟွံအောန်နူကဵု ၇၀ နွံဒၟံၚ်တုဲ ဂြောဝ်ဂတာ ဒးဗ္ဒဗ္ဒါဲဒၟံၚ် လ္တူကမၠောန်ဏံဂှ် ဂၠိုၚ်ကဵုလ္ၚီ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ