ၜဳကလေၚ်၊ မာတ် ၂၄
အပ္ဍဲပေါဲဗ္တိုက်ၜါလ္ပာ် မက္တဵုဒှ်လဝ် ဗ္ဒါဲကွာန်ယှိုဲယံၚ်ပျ ပွိုၚ်ဍုၚ်ၜဳကလေၚ် တွဵုရးဍုၚ်မန်ဂှ် ကောန်အရာပ် ၂ တၠ ချိုတ်တုဲ ၄ တၠ ကလိဂွံလဝ်ဝပ်ဂှ် ဂွံတီကေတ် အတိုၚ်ဂလာန် ညးတာလျိုၚ် ဂကောံရီုဗၚ်ဟံၚ်ပြာ်မှာဇန်တံကဵု ညးဒေသတံ ဟီုလဴထ္ၜးလဝ်ရ။
ပ္ဍဲဂိတုမာတ် ၂၃ အခိၚ်နူဂယး ၜိုတ် ၉ နာဍဳ ဒပ်ကံၚ်ဇြဳပၞာန် မၚ်တောပ်ဗ္တိုက်ဒၟံၚ် လ္တူဂၠံၚ်ကွဳစက် လ္ဂုၚ်−မတ်မလီု ဗ္ဒါဲကွာန်ယှိုဲယံၚ်ပျဂှ်ကဵု ဒပ်ပံၚ်ကောံ ဒပ်ပၞာန်ဗၠးၜးကောန်ဂကူကရေၚ် KNLA တံ က္တဵုဒှ်လဝ် ပေါဲဗ္တိုက်ရ။
အပ္ဍဲပေါဲဗ္တိုက်ၜါလ္ပာ် လလအ်ပွိုၚ် ၂၀ မိနေတ်ဂှ် ကွဳစက်ကောန်အရာပ်မွဲဖ္ဍိုက် ဒးဒုၚ်ပန်လဝ်အကြာတုဲ မၞိဟ်တြုံၜါတၠ ပါကၠုၚ်လ္တူကွဳစက်ဂှ် ချိုတ်အာတုဲ ၄ တၠ ကလိဂွံလဝ်ဝပ်ရ။
ညးဍုၚ်ကွာန်ကောန်အရာပ် ဇီုကပိုက်ကလိဂွံလဝ်ဝပ် အပ္ဍဲပေါဲဗ္တိုက်တံဂှ် ပလံၚ်ဗစိုပ်လဝ် ရုၚ်ဂဥုဲညးဍုၚ်ကွာန် ပွိုၚ်ဍုၚ်ၜဳကလေၚ် နကဵုအရီုဗၚ် ဂကောံရီုဗၚ်ဟံၚ်ပြာ်မှာဇန်တံဂှ် ဂွံတီကေတ်ရ။
အခိၚ်ပေါဲဗ္တိုက်ဒှ်ဂှ် ဂၠံၚ်ကွဳစက်မတ်မလီု−လ္ဂုၚ် အာကၠုၚ်ဟွံဂွံ ဒှ်အာၜိုတ်ပွိုၚ်မွဲနာဍဳပြၚ်တုဲ အခိၚ်နူဂယး ၜိုတ် ၁၁ နာဍဳဂှ် ကလေၚ်အာကၠုၚ် အတိုၚ်သၞောတ်တြေံဂွံယျဂှ် ဂွံတီကေတ် ဇရေၚ်ညးဒေသတံရ။
အကာဲအရာ ဇီုကပိုက်ချိုတ်အာ အပ္ဍဲပေါဲဗ္တိုက်တံဂှ် ဟွံဂွံတီကေတ် သောဲသောဲဗြောဲဗြောဲကီုလေဝ် ပရေၚ်ပၞာန်ၜါလ္ပာ် ကြံၚ်မ္ၚိုဟ်ဒၟံၚ်ရ။
စပ်ကဵုပေါဲဗ္တိုက်ဏံတုဲ မ္ၚးနူကဵုဒပ်ကံၚ်ဇြဳပၞာန်ဂှ် ဒပ်ပံၚ်ကောံဇြဟတ်ပၠန်ဂတးတံလေဝ် ဒဵုကဵုအခိၚ်လၟုဟ် လလောၚ်ပ္တိတ်လဝ်ပရိုၚ် ဟွံမွဲဏီရ။
အပ္ဍဲကာလသီအဝဵုဏံ လ္တူဂၠံၚ်ကွဳစက် လ္ဂုၚ်−မတ်မလီု ပွိုၚ်ဍုၚ်ၜဳကလေၚ်ဂှ် ဒပ်ကံၚ်ဇြဳပၞာန် ကေုာံ ဇြဟတ်ပၠန်ဂတးတံ က္တဵုဒှ်ဒၟံၚ်ပေါဲဗ္တိုက် မွဲဏှမွဲဏှတုဲ ကောန်အရာပ်ချိုတ်အာ အပ္ဍဲပေါဲဗ္တိုက်တံလေဝ် နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−Ko Zaw Fb