ရေဝ်၊ သေပ်တေမ်ဗာ (၁၂)
ကွဳစက် ဂကောံရီုဗၚ်ဟံၚ်ပြာ်ပရေၚ်မၞိဟ် ကေုာံ ပရေၚ်ရီုဗၚ်ဂိယဲ (အောၚ်မၚ်္ဂလာ) မွဲဖ္ဍိုက် မဖျေံသ္ဇိုၚ်ပွိုၚ်ဍုၚ်ရေဝ်၊ တွဵုရးဍုၚ်မန်ဂှ်ဝွံ ပ္ဍဲဂိတုသေပ်တေမ်ဗာ (၉) ပယျာံဂယး ၜိုတ် (၁၂) နာဍဳကဝက်ဂှ် ဒးဒုၚ်ဗ္တိုဟ်လဝ်မာၚ်ဂှ်ရ ကိုဝ်နေလေန်ဥူ ညးမဒှ်မၞိဟ်ဒဳယာန် ကောန်ဂကောံဂှ် ဂွံလဝ်ဝပ်သ္ကာတ်မြဟ်ရဂှ် ညးတာလျိုၚ်ဂကောံတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကွဳစက်ဖ္ဍိုက်မၞိဟ်ယဲ ဂကောံဂှ်ဝွံ အခိၚ်ကလေၚ်စဴ နူပလံၚ်မၞိဟ်ယဲ ဍုၚ်မတ်မလီုတုဲဂှ် ဒးဒုၚ်ဗ္တိုဟ်လဝ်မာၚ် ပ္ဍဲဗ္ဒါဲကွာန် (ပိန္နဲတော) ၊ ပွိုၚ်ဍုၚ်ဇြပ်ဗုဂှ်ရ မၞိဟ်ဗက်လက္ကရဴယာန် မပါလုပ် မၞိဟ်ဒဳယာန် (၂) တၠ ဂွံလဝ်ဝပ်ရ။
မၞိဟ်ဗက်လက္ကရဴယာန်ကဵု မၞိဟ်ဒဳယာန် (၂) တၠ မဂွံလဝ်ဝပ်တံဂှ် ပလံၚ်ဗစိုပ်ကဵုလဝ် ရုၚ်ဂဥုဲညးဍုၚ်ကွာန်ဍုၚ်မတ်မလီုတုဲ ပ္ဍဲကိုဝ်နေလေန်ဥူ မဒှ်ညးဒဳယာန်ဂှ် ဟိုတ်နူဂွံလဝ်ဝပ် ကဝေက်မာၚ်လုပ်လဝ် ပ္ဍဲဗဒါဲကအ်ကဵု ဂမ္တက်တံဂှ်ရ ဒးဒုၚ်လွဳဒၟံၚ် ကာမံက်တိုန်ရ။
“မၞိဟ်ဒဳယာန်ဂှ် ဒးဂွိၚ်ဒၟံၚ်ဏောၚ်၊ ပြဟ်ဟ်ဏံ လုပ်လဝ်ဗ္ဒမ်ကရေက်ပါ်ရ၊ မၚ်ဒၟံၚ်အရေဝ် အ္စာဂဥုဲဇၞော်ဂှ်ရ၊ မၞိဟ်ဗက်လက္ကရဴယာန်ဂှ် ၜိုတ်ဘဲဝပ် ဂုဟ်မပ်တံရ၊ ဂကောံလဵုကၠောန်န် ပိုယ်တံ ဗျိပၠုတ် ဒစဵုဒစးရ၊ ဣဏံဂှ် ဟိုတ်ဂွံဒုၚ်တဲမာန်ဟွံမွဲလးလးရ” သာ်ဝွံ ညးတာလျိုၚ် ဂကောံရီုဗၚ်ဟံၚ်ပြာ် ပရေၚ်မၞိဟ် ကေုာံ ပရေၚ်ရီုဗၚ်ဂိယဲ (အောၚ်မၚ်္ဂလာ) မွဲတၠ ဟီုရ။
တုဲကၠုၚ် ပ္ဍဲဂိတုဂျောန် (၉) တေံလေဝ် လ္တူဂၠံၚ်ကွဳစက်ကာ လ္ဂုၚ်−မတ်မလီု ဂတသုသာန်(လက်ပံပၚ်) ၊ ကွာန်အေန်ဂဗိုဝ်၊ ပွိုၚ်ဍုၚ်ကျာ်ထဝ်ဂှ် ကွဳစက်ဂကောံရီုဗၚ်ဟံၚ်ပြာ်သက်တိုၚ် ဒးဒုၚ်ပန်ပှော်တုဲ ကောန်ဂကောံမွဲတၠ ချိုတ်အာတုဲ လၟေၚ်ဒဒှ်ဂွံဝပ်တံလေဝ် နွံလဝ်ရ။
တုပ်သာ်ဏံကီု ပ္ဍဲဗ္ဒါဲဍာ်လဂေါဝ် တဝ်နဝ်၊ ဂၠံၚ်အာယှ မြဝတဳ−ကအ်ကြိက် ပွိုၚ်ဍၚ်ကအ်ကြိက်၊ တွဵုရးကရေၚ်ဂှ် တုဲကၠုၚ် ပ္ဍဲဂိတုအဝ်ဂါတ် (၂၂) ၜိုတ်ပယျာံဂယး (၉) နာဍဳဂှ် ကွဳစက်ရီုဗၚ်ဟံၚ်ပြာ် ခရိုၚ်မြဝတဳ ဒးဒုၚ်ပန်ပှော်လဝ်တုဲ ကွဳစက်ဂှ် ဒးလဝ်မကမ်ကီုလေဝ် မၞိဟ်ဂွံဝပ်ဇီုကပိုက်ဂှ် ဟွံမွဲရ။
ပရိုၚ်−သြၚ်လောန်တိုၚ်(မ်)