မတ်မလီု၊ မေ ၂၆
ပ္ဍဲတွဵုရးဍုၚ်မန် သ္ကုတ်သၠုၚ်ကျာကၟိန်ဍုၚ် ဒၞါဲတိဍာ်ထိၚ်ဒက်မန်ကဵု ကရေၚ်တံ နွံဂှ် လ္ပာ်ကံၚ်ဇြဳပၞာန် ပလေဝ်ပလေတ်ကၠုၚ် သ္ဂောံကလေၚ်ထ္ပက်ပၞာန်တံဂှ် ညးတာလျိုၚ် ဂကောံဒပ်ပၠန်ဂတးရပ်လွဟ် အပ္ဍဲဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲခရိုၚ်သဓီု ဗော်သွးကောန်ဂကူကရေၚ် KNU ဒၞါဲပရေၚ်ပၞာန်ၜါလ္ပာ် ကလေၚ်ကြံၚ်မ္ၚိုဟ်ဒၟံၚ်ဂှ် စနူဂိတုမေ ၂၁ တုဲ နူဒပ်ကံၚ်ဇြဳပၞာန် ထံၚ်ဒၟံၚ်ပရိုၚ် နကဵုက္ၜၚ်ကျာဗ္တိုက်၊ က္ၜၚ်ကျာသၞေၚ်ဝဲ၊ က္ၜၚ်ကျာထံၚ်ပရိုၚ်တံ အရိုဟ်တ္ၚဲအဆက်က်ရ။
ကိုဝ်အေမေန်ထောန် ညးဒုၚ်တာလျိုၚ် PDF ခရိုၚ်သဓီုဂှ် လ္ပာ်ကံၚ်ဇြဳပၞာန် ထံၚ်ပရိုၚ်ဂှ်ဝွံ ကြပ်အရိုဟ်တ္ၚဲ ပဝ်ယာန်ဒၟံၚ်တုဲ သွက်ဂွံထ္ပက်ပၞာန် နူကဵုတရဴကျာဂှ် ချိုတ်ပၠိုတ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“လ္ပာ်ကံၚ်ဇြဳပၞာန်ဂှ်တှ်ေ က္ၜၚ်ကျာသၞေၚ်ဝဲတံ ပဝ်ဒၟံၚ် အဆက်က်ဏောၚ်။ ဍေံတံ ကေတ်ဒၟံၚ်စၟတ်သမ္တီတံ နွံဒၟံၚ် အဆက်က်ရ။ ညအ်ဂှ် ကြပ်အရိုဟ်တ္ၚဲရဏောၚ်။ ပၞာန်ထ္ပက်ဗလးတိဂှ် ဟွံတီပုဟ်။ လ္ပာ်ဍေံတံ ထ္ပက်ပၞာန်ဟာ ကၠောန်ပၞာန်ဒုၚ်ရဟာဂှ် ဟွံတီပုဟ်။ နကဵုပၞာန်ကျာ ကၠောန်အာဏောၚ်ဂှ် ချိုတ်ပၠိုတ်ရ။ ပၞာန်ကျာဂှ်တှ်ေ ကၠောန်ကၠုၚ်ချိုတ်ပၠိုတ်ဏောၚ်ဂှ် အဲထေၚ်ရ။ ဂကောံပၠန်ဂတး ဒပ်ပံၚ်ကောံတံသီုဖအိုတ်ဂှ်တှ်ေ သွက်အရာတံဏံဂှ် ပလေဝ်ပလေတ်လဝ်တုဲယျ” သာ်ဝွံ သ္ဂးရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ကြပ်အရိုဟ်တ္ၚဲ ပန်ဒၟံၚ်လွဟ်ဇၞော် ပ္ဍဲပွိုၚ်ဍုၚ်ကျာ်ထဝ်၊ ၜဳကလေၚ် ကေုာံ ပွိုၚ်ဍုၚ်သဓီု မဒှ်ပွိုၚ်ဍုၚ် ခရိုၚ်သဓီု KNU တံဂှ်တုဲ ညးဍုၚ်ကွာန်ကောန်အရာပ် ဇီုကပိုက်ချိုတ်တံ နွံဒၟံၚ်ရ။
အတိုၚ်တၚ်နၚ် နူကဵုသြၚ်လောန်တိုၚ်(မ်) ပ္ကောံပ္ကေဝ်ဂွံလဝ်ဂှ်မ္ဂး အပ္ဍဲဂိတုမေဏံ ဟိုတ်နူပရေၚ်ပန်ပှော်လွဟ်ဇၞော် ဒပ်ကံၚ်ဇြဳပၞာန်တုဲ ပ္ဍဲခရိုၚ်သဓီု ညးဍုၚ်ကွာန်ကောန်အရာပ် ၄ တၠ ချိုတ်တုဲ ဟွံအောန်နူကဵု ၂၂ တၠ ဇီုကပိုက်ကလိဂွံလဝ်ဝပ်ရောၚ် ဂွံတီကေတ်ရ။
စနူဂိတုမေမံက်တုဲ အခိၚ်ဗ္တံမ္ဂး ကံၚ်ဇြဳပၞာန် ရပ်စပ်က္ၜၚ်ကျာသၞေၚ်ဝဲ၊ က္ၜၚ်ကျာထံၚ်ပရိုၚ်တံတုဲ လ္ၚတ်ထံၚ်ပရိုၚ် ပွဳပွူဗ္ဒါဲပွိုၚ်ဍုၚ်ရေဝ်၊ မတ်မလီု၊ မုဟ်ဍုၚ် ကေုာံ ဇြပ်ဗုတံ နွံဒၟံၚ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် နကဵုကံၚ်ဇြဳပၞာန် ထံၚ်ကၠုၚ်ပရိုၚ်သာ်ဏံဂှ်ဝွံ သွက်ဂွံကလေၚ်ကၠောန် ပရေၚ်ၚးတးတိဍာ် မဒေါအ်ဇူလဝ်တံဂှ် ဒှ်မာန်တုဲ ဒှ်သဘဴ ပလေဝ်ပလေတ်ကၠုၚ် သွက်ဂွံဗ္တိုက် လ္ပာ်ဗ္ဒိုပ်ဒပ်ပၠန်ဂတးတံ နကဵုက္ၜၚ်ကျာရောၚ်ဂှ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
“ ဒပ်ကံၚ်ဇြဳပၞာန်တံဂှ်တှ်ေ နူဂိတုအံက်တဝ်ဗာ သၞာံတုဲကၠုၚ်တေံရ ပရေၚ်ၚးတးတိဍာ်ဂှ် ဍေံတံ ကၠောန်ကၠုၚ်ဟွံမာန်လဝ်ရ။ လၟုဟ်ဗပေၚ်ကၠုၚ်ဇြဟတ်တံ ဗပေၚ်ကၠုၚ်လွဟ်ဇၞော်တံရ။ ထံၚ်ကၠုၚ်ပရိုၚ်သာ်ဏံဂှ်ဝွံ ပရေၚ်ၚးတးတိဍာ် ဒေါအ်ထောံလဝ် ကၠာတေံဂှ် သ္ဂောံကလေၚ်ထ္မံက် ဒှ်မာန်တုဲ ယဝ်ရပေါဲဗ္တိုက်ဇၞော် က္တဵုဒှ်ကၠုၚ်မ္ဂး သွက်ဂွံလုပ်စိုပ်ဗ္တိုက် လ္ပာ်ဗ္ဒိုပ်ပိုယ်တံဂှ်လေဝ် ဖျေံလဝ်ဇြဟတ် နကဵုက္ၜၚ်ကျာသၞေၚ်ဝဲတုဲ ဒှ်သဘဴပလေဝ်ပလေတ်ကၠုၚ် သ္ဂောံဗ္တိုက်ကဵုက္ၜၚ်ကျာဂှ် အဲချိၚ်ကေတ်ရ” သာ်ဝွံ သ္ဂးရ။
အပ္ဍဲဂိတုဨပရဴ တုဲကၠုၚ်တေံ ကံၚ်ဇြဳပၞာန် ပြံၚ်ဆုဲယိုက်ဏာ အမၠံက်ဇၞော်ဟံၚ်ဝှေတ်ဇြာ လ္ပာ်တွဵုရးဍုၚ်မန်တုဲ လွဟ်ဇၞော် ၁၂၀ မမတံဂှ်လေဝ် ကလေၚ်ဗပေၚ်ဒၟံၚ်တုဲ ကောန်ဒပ်ဍောၚ်ဒၟံၚ်ပၞာန် နူသ္ကုတ်သၟဝ်ကျာတေံဂှ်လေဝ် ဗပေၚ်လဝ်ဇြဟတ် လ္ပာ်ရေဝ်ကဵု ဇြပ်ဗုရ။
ဟိုတ်ဂှ်ရ သွက်ဂွံဝေၚ်ကၠုၚ်ပၞာန် ကုဗ္ဒိုပ်ဒပ် ဂကောံဒပ်ပၠန်ဂတးတံ အခိၚ်ဗ္တံမာန်ဂှ် လ္ပာ်ကံၚ်ဇြဳပၞာန် ဗပေၚ်ဇြဟတ် ၜိုတ်ဒးရးတုဲ ထံၚ်ဒၟံၚ်ပရိုၚ်ဂှ်ဝွံ ခြာဟွံလအ် သွက်ဂွံလုပ်ဗ္တိုက် မွဲဒမြိပ်ဂှ် စဳဇန်ဒၟံၚ်ဏောၚ် နာဲနဂါ ထေၚ်ခယျကေတ်ရ။
နကဵုဒပ်ကံၚ်ဇြဳပၞာန် ဒးဆေၚ်ဒၟံၚ်မုက် ကုပၞာန်ထ္ပက်ဗလးတိ ကြပ်အလုံဍုၚ်မွဲဂှ် စနူဂိတုအံက်တဝ်ဗာကြပ်အိုတ် သၞာံ ၂၀၂၃ ပရေၚ်ပၞာန် ၁၀၂၇ ဂကောံမဟာမိတ်ကောဒေံသ္ကုတ်သၟဝ်ကျာပိဂကောံ စလဝ်ဂှ်တုဲ ပ္ဍဲတွဵုရးဍုၚ်မန်ဂှ် ဒေါအ်ဒေၚ်လဝ် ပွမထ္ပက်ပၞာန်တံရ။
အခိၚ်လၟုဟ် သ္ကုတ်သၠုၚ်ကျာကၟိန်ဍုၚ် သီုရးတၞၚ်သဳ သီုကဵုကချေၚ် ကေုာံ ရခေၚ်တံဂှ် ကံၚ်ဇြဳပၞာန် ဒးဆေၚ်ဒၟံၚ်မုက် ကုပၞာန်ထ္ပက်ဗလးတိ ဂကောံဇြဟတ်ရပ်လွဟ်ကောန်ဍုၚ်အရၚ် အပ္ဍဲဒေသတံကဵု ဂကောံဇြဟတ်ပၠန်ဂတးတံ ဇၞော်ကဵုဇြဟတ်ရ။
ပ္ဍဲအကာဲအရာက္တဵုဒှ်ဒၟံၚ်သာ်ဏံဂှ် ပ္ဍဲတွဵုရးဍုၚ်မန် ထိၚ်ဒက်ဂွံလဝ် တိဍာ်အုပ်ဓလီု မဂၠိုၚ်ဂၠေၚ်ဂှ် လ္ပာ်ဇြဟတ်ပၠန်ဂတးရပ်လွဟ်တံ ကၠာဂွိုအ်ထ္ပက်ကၠုၚ်ပၞာန်ဂှ် လ္ပာ်ကံၚ်ဇြဳပၞာန် ထံၚ်ကၠုၚ်ပရိုၚ် နကဵုက္ၜၚ်ကျာသၟးဟွံက သီုကဵုပန်ပှော်ဒၟံၚ်လွဟ်ဇၞော်တံရ။
ပရိုၚ်−သြၚ်လောန်တိုၚ်(မ်)
ဗီု−MOI