ၜဳကလေၚ်၊ မေ ၂၆
ဒဒန်မသဝ် ကေုာံ ဒဒန်ကြုက်အုက် နူလ္တူဂၠံၚ်ကွဳစက် လ္ဂုၚ်−မတ်မလီု ပွိုၚ်ဍုၚ်ၜဳကလေၚ် တွဵုရးဍုၚ်မန် ကြဴနူဒးဒုၚ်ဖံက်ခတိုဟ်မာၚ်တုဲ ပ္ဍဲဂၠံၚ်ဒးသပဝ်အာတံဂှ် ဗြဲဂူတုဲ ဂၠံၚ်လီုက္တဵုဒှ်ဒၟံၚ်ဂှ်ရ ကွဳစက်ဂၠိုၚ်ကဵုဖ္ဍိုက် ဆက်ကၟာတ်ဆိုအ်ဒၟံၚ်ရောၚ် ဂွံတီကေတ် ဇရေၚ်ညးဒေသတံရ။
ဒဒန်ကြုၚ်အုက်ဝွံ ပ္ဍဲဂိတုမေ ၁၁ တုဲကၠုၚ်တေံ ကြဴနူဒးဒုၚ်ဖံက်ခတိုဟ်မာၚ်တုဲ မ္ၚးနူကဵုဒဒန်ကောန်ကရေတ်ဂှ် သီုဒဒန်ဗေလဳ သိုၚ်လဝ်တၟိဂှ် သရိုဟ်စှ်ေလီုအာလဝ်ဂှ်ရ ဂိတုမေ ၁၇ တေံ သ္ကဲဒဒန်ဂှ် ဖံက်ဂၠံၚ်တိတုဲ ကဵုကွဳစက်ဍောတ်ဇၞော်တံ တတ်ကၠောံလဝ်ရ။
ပ္ဍဲသ္ကုတ်ဂၠံၚ်ဏံဂှ် အကြာဏံ ဗြဲဂူဆက်ဒၟံၚ်တုဲ ဂၠံၚ်တိသ္ကဲဒဒန်ဂှ် လၟက်က္တဵုတုဲ ဂၠံၚ်ကလိတ်၊ သဝ်စှ်ေကၠုၚ်တံ က္တဵုဒှ်ဒၟံၚ်တုဲ ပ္ဍဲဂၠံၚ်ကွာန်ဆက်စၠောံလဝ်တံဂှ်လေဝ် ဗြဲဂူတုဲ လီုဒၟံၚ်နွံဂှ်ရ ဂွံတတ်ကၠောံအာကၠုၚ်ဂှ် ဒှ်ဒၟံၚ်အခက်အခုဲရ။
သ္အာၚ်နူဂှ်ပၠန် ဂၠံၚ်ကွာန်ဆက်စၠောံ နွံဗ္ဒါဲဒဒန်မသဝ်ဂှ်လေဝ် ကွဳစက်ဍောတ်ဇၞော် တတ်ကၠောံဂၠိုၚ်တုဲ ဗြဲဂူ ဂၠံၚ်လီုဒၟံၚ်တုဲ ကွဳစက်ဂမၠိုၚ်လေဝ် ကြေပ်လုပ်အတေၚ် ထပ်ဒၟံၚ်ဂှ်ရ ကွဳစက်ကဵုကၠံ အာကၠုၚ်ဟွံဂွံ က္တဵုဒှ်ဒၟံၚ်ရောၚ် ဂွံတီကေတ်ရ။
“ ဂၠံၚ်တိ ကြုၚ်အုက်ဂှ်တှ်ေ ဂွံဂှ်ဂွံမံၚ်ရ။ ပြဟ်ဟ်ဏံ လၟက်က္တဵုမံၚ် ကွေံကွေံဂှ်ဟွံသေၚ်ပုဟ်။ ဗြဲဂှ်လေဝ် ဂူဒၟံၚ်တုဲ ဂၠံၚ်လီုဒၟံၚ်ညိည။ ဂၠံၚ်မသဝ်လေဝ် အာကၠုၚ်ဂၠိုၚ်တုဲ အတိုၚ်ဏံရ။ အခိၚ်လၟုဟ် ဒှ်ဒဒိုက်ညိည။ အာကၠုၚ်ဟွံဂွံ ကွေံကွေံဂှ်ဟွံသေၚ်။ အာဂှ်ဂွံဒၟံၚ်ရ။ ကွဳစက်ကြေပ်ဒၟံၚ်ညိ။ မွဲဖ္ဍိုက်တုဲမွဲဖ္ဍိုက် ဒးအာဒၟံၚ် သိုက်က်ရ” သာ်ဝွံ ညးဒေသၜဳကလေၚ်မွဲတၠ ဟီုရ။
သ္အာၚ်နူဂှ်ပၠန် ဗ္ဒါဲဂၠံၚ်ကွာန်ဆက်စၠောံ ဒးသပဝ်အာ ဒဒန်လၟုဟ်ဂှ် ပေါဲဗ္တိုက် က္တဵုဒှ်ဒၟံၚ်ဂှ်ရ တတ်ကၠောံဟွံဂွံတုဲ ဒးမၚ်ဒၟံၚ်ကဵုနာဍဳတုဲ ကွဳစက်ၜေတ် က္တဵုဒှ်ဂၠိုၚ်ဒၟံၚ်ရောၚ် ညးဆက်ဟီုရ။
ညးဍုၚ်ကွာန်အာတရဴမွဲတၠဂှ်လေဝ် ပ္ဍဲဂၠံၚ်ကွာန်ဆက်စၠောံတံဂှ် ဗြဲဂူမ္ဂး တိလာ်နွံဒၟံၚ်ဂှ်ရ တတ်ကၠောံဟွံဂွံတုဲ ကွဳစက်အာတရဴတံ ဆက်ကၟာတ်ဆိုအ်ဒၟံၚ်တုဲ ဒးဂဗဒၟံၚ်ကဵု အကာဲအရာ ဒးတိက်အာဗ္တံတံဏောၚ်ဂှ် ဟီုရ။
“အကာဲအရာဂၠံၚ်ဍာန်ဂှ်တှ်ေ ဂတပိုယ်ဏံရ ကွဳစက်ဂမၠိုၚ် ကၟာတ်ဆိုအ်ဒၟံၚ်။ အာဟွံဂွံ ဒှ်ဒၟံၚ်ရ။ ဗြဲဂူတှ်ေ ကၠောံဟွံဂွံပုဟ်။ မုဒှ်ရောဟီုတှ်ေ ဍေံဂှ် ဂၠံၚ်လ္ပာ်လ္တူလေဝ် ဗြဲဂူမ္ဂး တိလာ်အာဟဂှ်။ ဒၞါဲသပဝ်အာ ဒဒန်ဏံဂှ်လေဝ်။ တိလာ်အာတုဲ ကွဳစက်ဇၞော်တံဂှ်လေဝ် ဟွံဂွံပုဟ်။ လျိုၚ်ဒဒန်ကဵု လျိုၚ်ကွဳစက်ဂှ်တှ်ေ ဒုၚ်ဒဝ်မာန်ဟွံသေၚ်ပုဟ်။ ဟိုတ်ဂှ်ရ ပြဟ်ဟ်ဏံ ကြေပ်ဒၟံၚ်ဂတဏံရဏောၚ်၊ အရိုဟ်တွဵု ကၠာဗြဲဟွံဂွံဂူ တတ်အတေံ တတ်အဏံဂှ် အာဂွံဒၟံၚ်ဏီ။ ဗြဲဂူအာတုဲ ဂၠံၚ်တံဏံလေဝ် လျိုၚ်တံဂှ် ဒုၚ်ဟွံမာန်ရပုဟ်” သာ်ဝွံ သ္ဂးရ။
ဂၠံၚ်ဒးသပဝ်အာ ဒဒန်ကြုၚ်အုက်ကဵု ဒဒန်မသဝ် ၜါတၞုၚ်ဂှ်ဝွံ ဟိုတ်နူဗြဲဂူတုဲ အာကၠုၚ်ဝါတ်ဂါတ်တုဲ အပ္ဍဲဒေသ ကၠေၚ်စက်ပိုတ်အိုတ် က္တဵုဒှ်ဒၟံၚ်တုဲ မ္ၚးနူကဵုဗၞိက်ဇွောဝ်စှ်ေ ဂှ် စနူကဵုအာကၠုၚ်တရဴတံ ဒှ်တမ် ပွမလအ်လတံ က္တဵုဒှ်ကၠုၚ်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ ဒဒန်ဏံသီုၜါတၞုၚ်ဂှ် ကံၚ်ဇြဳပၞာန် ကၠောန်ဒၟံၚ် သ္ဂောံထ္ပက်ဒဒန်ယာယဳကီုလေဝ် ဟိုတ်နူပလေဝ်ပလေတ် ဟွံတုဲဒှ်ဏီဂှ်ရ ပရေၚ်ပလံၚ်ဗစိုပ်တံ က္တဵုဒှ်ဒၟံၚ် အခက်အခုဲရ။
ဒဒန်ၜါတၞုၚ် နူပွိုၚ်ဍုၚ်ၜဳကလေၚ် ဒးဒုၚ်ဖံက်ခတိုဟ်လဝ်မာၚ်ဂှ်ဝွံ နွံဒၟံၚ်လ္တူဂၠံၚ်ဇၞော် ပျဳထံၚ်သု လ္ဂုၚ်−မတ်မလီုတုဲ သွက်ပရေၚ်အာကၠုၚ်တရဴ ကေုာံ ပရေၚ်သွံရာန်ဗၞိက် ဒေသသ္ကုတ်သၠုၚ်ကျာ တွဵုရးဍုၚ်မန်၊ ကရေၚ် ကေုာံ ရးတၞၚ်သဳတံဂှ် ဒှ်ဂၠံၚ်ပၟိက်ဇၞော်လောန်မွဲရ။
ပရိုၚ်−သြၚ်လောန်တိုၚ်(မ်)
ဗီု−CJ/TLT