တယိတ်ချံၚ်၊ မေ ၂၈
သၞေဟ်ကၚ်စၟဳတ်ဒဒန်ပသဲ နွံအရာပ်ပါန်တဝ် ပွိုၚ်ဍုၚ်တယိတ်ချံၚ် ရးတၞၚ်သဳ ဒးဒုၚ်လုပ်စိုပ်ဗ္တိုက်တုဲ ကောန်ဒပ်ကံၚ်ဇြဳပၞာန် ၇ တၠ ချိုတ်အာလဝ်ရောၚ် ဂွံတီကေတ် အတိုၚ်တၚ်လလောၚ်တြး ဒပ်ပံၚ်ကောံ ဂကောံဇြဟတ်ပၠန်ဂတးတံရ။
တုဲကၠုၚ် ဂိတုမေ ၂၅ ပယျာံဂယး ၜိုတ် ၆ နာဍဳဂှ် ဒပ်ပံၚ်ကောံမဟာမိတ်တံ လုပ်စိုပ်ဗ္တိုက်လဝ် သၞေဟ်ကၚ်စၟဳတ်ဒဒန်ပသဲ ဒၞါဲကံၚ်ဇြဳပၞာန် ဖျေံလဝ်ဒပ် ၜိုတ်ဇြဟတ် ၂၀ တုဲ အာတ်မိက်ဒၟံၚ်သြန်ဂှ်ရ။
ဟိုတ်နူပရေၚ်ဗ္တိုက်ဏံတုဲ ပေါဲဗ္တိုက်က္တဵုဒှ်လဝ် စဵုကဵုလလအ်ဘာ်နာဍဳတုဲ ကောန်ဒပ်ကံၚ်ဇြဳပၞာန် ၇ တၠ ချိုတ်အာလဝ်တုဲ ၆ တၠ ဇီုကပိုက်ကလိဂွံလဝ်ဝပ်ရောၚ် ညးဒုၚ်တာလျိုၚ် လလောၚ်ပရိုၚ် ကရောၚ်ပၞာန် ဒံၚ်ညဳနံၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
သၞေဟ်ကၚ်စၟဳတ်ဒဒန်ပသဲ ဒးဒုၚ်ဗ္တိုက်တုဲ ဒပ်ကံၚ်ဇြဳပၞာန် ကၟာတ်ထောံလဝ် သၞေဟ်ကၚ်ဂှ်တုဲ ၜိုတ်နူဂယး ၈ နာဍဳဝိုက်ဂှ် ကလေၚ်ပံက်ကဵုလဝ်ရောၚ် ဂွံတီကေတ်ရ။
ကြဴနူသၞေဟ်ကၚ်စၟဳတ်ဒဒန်ပသဲ ဒးဒုၚ်ဗ္တိုက်တုဲ ဒပ်ကံၚ်ဇြဳပၞာန် ဗပေၚ်လဝ်ဇြဟတ်ကီု၊ ပစူမာၚ်တိုပ်တိ ဗ္ဒါဲပွဳပွူ သၞေဟ်ကၚ်စၟဳတ်တံကဵု ဗ္ဒါဲသ္ၚိညးဍုၚ်ကွာန်တံ မံၚ်တန်တဴတံဂှ်ရောၚ် ဂွံတီကေတ် အတိုၚ်ဂလာန်ညးဒေသတံရ။
သၞေဟ်ကၚ်စၟဳတ်ဒဒန်ပသဲဂှ် ကံၚ်ဇြဳပၞာန် ကၠုၚ်စိုပ်ပံက်လဝ် နူဂိတုမာတ် သၞာံဏံဂှ်တုဲ ဒပ်ကံၚ်ဇြဳပၞာန် ကဵု ဒပ်ပံၚ်ကောံပျူသဝ်ထဳတံ ဖျေံလဝ်ဒပ် အကြာ ၁၀ တၠကဵု ၁၅ တၠတုဲ စၟဳတ်ဒၟံၚ်ရ။
ပရေၚ်ဗ္တိုက်ဏံဂှ် တမ်ဒပ် (၂၇) ဒပ်မဟာ (၆) KNLA ၊ ကဝ်တူလေဝ်အာမဳ KTLA ကေုာံ ကရောၚ်ပၞာန်ဒံၚ်ညဳနံၚ်တံ ပံၚ်တောဲဗ္တိုက်လဝ်ရ။
တုဲကၠုၚ် ဂိတုမေ ၈ တေံဂှ်လေဝ် ဒပ်ပံၚ်ကောံမဟာမိတ် ဂကောံဇြဟတ်ပၠန်ဂတးတံ ဗ္တိုက်သီဂွံလဝ် ဗ္ဒိုပ်ဒပ်(ပဲဒက်) ကံၚ်ဇြဳပၞာန် ဖျေံလဝ်သ္ဇိုၚ် ကွာန်(ပဲဒက်) ပွိုၚ်ဍုၚ်တယိတ်ချံၚ်ဂှ်ရ။
ပရိုၚ်−သြၚ်လောန်တိုၚ်(မ်)
ဗီု−ကရောၚ်ပၞာန်ဒံၚ်ညဳနံၚ်