ရေဝ်၊ မေ ၂၈
ကောန်သ္ဂံၚ်ဒပ်ပၠန်ဂတးရပ်လွဟ် ဖျေံသ္ဇိုၚ်ချဳဒရာၚ်ဒၟံၚ် ပ္ဍဲပွိုၚ်ဍုၚ်ရေဝ် ဒေသသ္ကုတ်သၠုၚ်ကျာတွဵုရးဍုၚ်မန်တံ က္တဵုဒှ်ဒၟံၚ် ယဲဇွဟ် ဗွဲမဂၠိုၚ်ဂၠေၚ် နွံဒၟံၚ်ရောၚ် ဂွံတီကေတ် အတိုၚ်ဂလာန် ညးတာလျိုၚ်ဒပ်တံဂှ်ရ။
စနူဂိတုဨပရဴတုဲကၠုၚ်တေံတုဲ ကောန်သ္ဂံၚ်ပၠန်ဂတးဂမၠိုၚ် စက္တဵုဒှ်ဒၟံၚ် ယဲဇွဟ်တုဲ ဗွဲကြဴဏံ လၟိဟ်ညးက္တဵုဒှ်ယဲ ဂၠိုၚ်တိုန်ကၠုၚ်တီတီရ။
ကောန်သ္ဂံၚ်ပၠန်ဂတးတံဝွံ အခိၚ်နွံဒၟံၚ် ပ္ဍဲဒပ်တံဂှ် ကၞဴ၊ ဂဥုဲဂမိတ်ဟွံရုပ်ဂပ်ကီု၊ အခိၚ်တိတ်မုက်ပၞာန် ဂမိတ်ကိတ်တုဲ က္တဵုဒှ်ယဲဇွဟ် ဂၠိုၚ်ဒၟံၚ်ရောၚ် ဂွံတီကေတ်ရ။
နာဲနဂါ ညးမၞုံအခေါၚ်ဟီုဂး ဒပ်ပၠန်ဂတးဍုၚ်မန် MSRF ဂှ် ကောန်သ္ဂံၚ်ဂမၠိုၚ် ဒးဒုၚ်စသိုၚ်ဒၟံၚ် ဒဒှ်မက္တဵုဒှ် ယဲဇွဟ်တံ ပရေံပရေံတုဲ ကောန်သ္ဂံၚ်လ္ၚဵုတံမ္ဂး က္တဵုဒှ်ဒၟံၚ် ၜိုတ်ၜါဝါနွံဒၟံၚ်ရောၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ကောန်သ္ဂံၚ်ပၠန်ဂတးတံ က္တဵုဒှ်ယဲဇွဟ် ဂၠိုၚ်တုဲ ဂဥုဲဇဗနွံပၟိက်တံဂှ် နူညးဍုၚ်ကွာန်တံ ၜိုတ်ဒးရး ရီုဗၚ်ကဵုဒၟံၚ် နွံကီုလေဝ် အရာမနွံပၟိက်လ္ၚဵုတံလေဝ် နွံဒၟံၚ်ရောၚ် သ္ဂးရ။
ညးဒုၚ်တာလျိုၚ် ကရောၚ်ပၞာန်ဒဝ်န ဒပ်စြေက် (၃) သ္ဂောံဗ္တိုက်သရိုဟ်ဂှ်လေဝ် ကောန်သ္ဂံၚ်ဂမၠိုၚ် ဂွံက္တဵုဒှ်ယဲဇွဟ်ဂၠိုၚ်ဂှ်ဝွံ ဒၟါနူကၞဴဟွံရုမ်ဂပ်တုဲ က္တဵုဒှ်ဒၟံၚ်ဂၠိုၚ်အိုတ်တုဲ တၚ်နွံပၟိက်ဂဥုဲဇဗနွံဒၟံၚ်ရောၚ် ဟီုရ။
ကောန်သ္ဂံၚ်ပၠန်ဂတးတံ က္တဵုဒှ်ယဲဇွဟ်ဂၠိုၚ်ကၠုၚ်တုဲ စနူဂိတုဨပရဴကြပ်အိုတ်ဂှ် သ္ကုတ်သၠုၚ်ကျာတွဵုရးဍုၚ်မန်ဂှ် ဒးဒေါအ်ဇူလဝ် ပရေၚ်ပြုပြေၚ်ပၞာန်လ္ၚဵုတုဲ ဗပေၚ်ဒၟံၚ်မကမ်လွဟ်လက်နက် အရာမနွံပၟိက်တံဂှ်ရောၚ် သ္ဂးရ။
အခိၚ်လၟုဟ် ကံၚ်ဇြဳပၞာန်ဝွံ ဒၞါဲဒပ်ပၠန်ဂတးရပ်လွဟ်တံနွံဏောၚ်ခယျဂှ် ထံၚ်ဒၟံၚ်ပရိုၚ် ကဵုက္ၜၚ်ကျာတံ နွံဒၟံၚ်တုဲ ဗပေၚ်ဒၟံၚ်ဇြဟတ် ပ္ဍဲတမ်ဒပ်ကံၚ်ဇြဳပၞာန် မဖျေံသ္ဇိုၚ်ပွိုၚ်ဍုၚ်ရေဝ်တံ နွံဒၟံၚ်ရောၚ် ဂွံတီကေတ်ရ။
သ္ကုတ်သၠုၚ်ကျာတွဵုရးဍုၚ်မန်ဂှ် ဒပ်ပၠန်ဂတးရပ်လွဟ်ပၠန်ဂတးဒၟံၚ် ကုကံၚ်ဇြဳပၞာန် ဟွံအောန်နူကဵု ၁၀ ဂကောံ နွံဒၟံၚ်တုဲ ဇြဟတ်ဂၠိုၚ်ကဵုလ္ၚီ နွံဒၟံၚ်ရ။
ပရိုၚ်−သြၚ်လောန်တိုၚ်(မ်)
ဗီု−CJ