မတ်မလီု၊ မေ ၂၈
ပ္ဍဲတွဵုရးဍုၚ်မန် ပ္ဍဲရာသဳတဵုသြောံကသီုသၞာံဏံဂှ် ဟိုတ်နူခရိတ်အိုတ်ဂၠိုၚ်ကီု သီုကဵုအခက်အခုဲနာနာသာ်တုဲ တဵုကၠုၚ်မဟရာတ် ဂၠိုၚ်ကၠုၚ်ဂှ်ရ ဒမြိပ်သြောံတိတ် အောန်စှ်ေဂှ် ဒးဂဗအာမာန်ရောၚ် သၟာဗ္ၚဂမၠိုၚ် ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ပ္ဍဲတွဵုရးဍုၚ်မန် တိဨကတဵုသြောံ ဗ္ဒါဲ ၇ ကိုဋ်နွံဂှ် လၟေၚ်သၞာံ နူလဒေါဝ်ဂိတုမေ စဵုကဵုဂိတုဂျူလာၚ်မံက် ကၠောန်ၜိုတ်တဵုလွဳဒၟံၚ် သြောံဗြဲတုဲ သၞာံဏံဂှ် ကၠောန်ကၠုၚ်မဟရာတ် ဂၠိုၚ်နူကဵု ဗွဝ်မတုဲ ပတမ်ကေတ်တံဂှ်ရ။
သၟာဗ္ၚ တဵုသြောံကသီုတံဂှ်ဝွံ ဟိုတ်နူကောန်ကလောန်စိုန်သကီု အောန်စှ်ေကၠုၚ်ကီု၊ ကၠေၚ်စက်၊ ဝါဲဓာတ် မပါလုပ် ခရိတ်အိုတ်နာနာ က္ဍၚ်တိုန်ကၠုၚ် ဂၠိုၚ်ကဵုဆဂှ်တုဲ ရုဲစှ်ကၠုၚ် တဵုမဟရာတ်တံအိုတ်ရ။
သၟာဗ္ၚ နူပွိုၚ်ဍုၚ်ပံၚ်မွဲတၠဂှ် ဟိုတ်နူတဵုမဟရာတ်ဂၠိုၚ်ဂှ်ရ အခိၚ်သြောံတိတ် သၞာံဂတဏံတှ်ေ ဒးဆေၚ်အာမုက် ကုအကာဲအရာ ဒမြိပ်တိတ်ယအ်စှ်ေကၠုၚ် တီတီမာန်ရောၚ်ဂှ် ဟီုရ။
“သၟာဗ္ၚလ္ၚဵုတံဂှ်တှ်ေလေဝ် သီုကောန်ကလောန်အောန်ကီု၊ သီုခရိတ်အိုတ်ဂၠိုၚ်ကီု၊ ဗွဲမဂၠိုၚ်ဂှ် ဟွံကၠောန်မဏံရတုဲ ကၠောန်ကၠုၚ် မဟရာတ်အိုတ်ရ။ မူဟိုတ်ရောဟီုတှ်ေ ဟိုတ်နူကောန်ကလောန်အောန်၊ ခရိတ်တဵုလွဳဂၠိုၚ်ကၠုၚ်ဂှ်တုဲ သၟာဗ္ၚ ကၠောန်အာ မဟရာတ်တံဂှ်တှ်ေ ကၠောန်ဏောၚ်။ မွဲကသီုဏံတုဲအာတှ်ေ ဒမြိပ်တိတ်ယအ်စှ်ေတံ မုတံ က္တဵုဒှ်မာန်ရ” သာ်ဝွံ သ္ဂးရ။
ပ္ဍဲအရာတဵုသြောံဂှ် တဵုပၠောမ်နကဵုသၞောတ်မဟရာတ်ဂှ်ဝွံ မွဲဨကမ္ဂး ဂၠိုၚ်အိုတ် ၜိုတ် ၄၀ န တိတ်ဒၟံၚ်တုဲ ဗွဝ်မတုဲ ပတမ်ကေတ်ဂှ် မွဲဨကမ္ဂး အောန်အိုတ် နူ ၅၀ န စဵုကဵု ၇၀ န တိတ်ဒၟံၚ်ရ။
သၟာဗ္ၚ နူပွိုၚ်ဍုၚ်ၜဳကလေၚ်မွဲတၠဂှ်လေဝ် ဟိုတ်နူကောန်ကလောန်အောန်စှ်ေတုဲ တဵုဒၟံၚ် နကဵုမဟရာတ်သၟးရတုဲ မဟရာတ်ဂှ်မ္ဂး သီုဘဲရာသဳဥတု သီုဟွံစှ်ေကဵုသၞောတ်တံဂှ်တုဲ ဒမြိပ်တိတ်တံ ယအ်စှ်ေမာန်ရောၚ် ဟီုရ။
“လ္ပာ်ပိုယ်တံဂှ်တှ်ေ ကိစ္စကောန်ကလောန်အောန်ကၠုၚ်လဝ် နွံလဝ်တုဲ ဂြာတ်ထောံလဝ် ဒကှ်ရ။ ဒးဟီုမ္ဂး မဟရာတ်ဟီုဂှ် ၜိုတ်ကၠဟ်ထောံမကြေဟ် ပ္ဍဲဒမၠုရဏောၚ်။ ရာသဳဥတုဂှ် ဂူထောံစဵုဍာ်ဇၞော်မ္ဂး မဟရာတ်ဏံဂှ် ဒးဆောံအာဟဂှ်ရ။ တုဲပၠန် ဗီုလဵုရောဟီုတှ်ေ တဵုလဝ်ဟွံသေၚ်တုဲ ကဵုဂၠံၚ်၊ ကဵုပၞောန်တံ ဟွံသေၚ်ဂှ်ရ ဍေံတံ တီုတှ်ေတီုဏောၚ်၊ ကြဳတှ်ေကြဳဏောၚ်၊ ချောဲလေဝ်တိုန် ဟီုတှ်ေ ဒမြိပ်တိတ်ဂှ် တၞဟ်ခြာအာဟဂှ်ရ” သာ်ဝွံ သ္ဂးရ။
သၟာဗ္ၚအပ္ဍဲဒေသတံဝွံ အခိၚ်တဵုသြောံကသီုသၞာံဏံဂှ် ဒးဂဗဒၟံၚ်ကဵု ၚုဟ်ကပေါတ်တမ် ထပ်သၠုၚ်တိုန်ကၠုၚ်တံဂှ်တုဲ ဟိုတ်နူသၞောဝ်ယိုက်ဂၠေၚ်လျိုၚ်ပၞာန် ကံၚ်ဇြဳပၞာန် ပၠောပ်လဝ်လမျီုဂှ်တုဲ ဒးဆေၚ်ဒၟံၚ်မုက်ကဵု ပြသၞာကောန်ကလောန်အောန်စှ်ေတံရ။
အခက်အခုဲသာ်ဏံ နွံကၠုၚ်ဂှ်ရ သၟာဗ္ၚလ္ၚဵုတံဂှ် ဖအောန်ဖျေံတိဨကတဵုလွဳသြောံတံဂှ်တုဲ တဵုလွဳကၠုၚ်နွံတုဲ နကဵုသၟာဗ္ၚလ္ၚဵုတံဂှ်တှ်ေ ၜိုတ်ဂြောဝ်ဂတာ စရုမ်ရ တဵုလွဳဒၟံၚ်အိုတ်ဂှ် သၟာဗ္ၚဂမၠိုၚ် ဟီုလဴထ္ၜးရ။
တွဵုရးဍုၚ်မန်ဝွံ အတိုၚ်ဗ္ၜတ်ကၟိန်ဍုၚ်မ္ဂး ဒမြိပ်ထၜိုတ်တိတ် နွံဒၟံၚ် ကဆံၚ်ဒ္စါံတုဲ လၟေၚ်သၞာံ သြောံတိတ်ဒၟံၚ် ၄၃၀ ကိုဋ်န ပြၚ်ဒၟံၚ်တုဲ သြောံတိတ်ကၠုၚ်တံဂှ် ပလံၚ်ပ္တိုန်သြောံတြးဒၟံၚ် ရးဒေသ ကေုာံ တွဵုရးလ္ၚဵုတံ မဒှ်ရ။
ပရိုၚ်−သြၚ်လောန်တိုၚ်(မ်)
ဗီု−CJ