မတ်မလီု၊ မေ ၂၉
ဒဒန်ဂၠံၚ်ကွဳစက် ပွိုၚ်ဍုၚ်ၜဳကလေၚ် တွဵုရးဍုၚ်မန် ဒးဒုၚ်ဖံက်ခတိုဟ်မာၚ်တုဲ စၟတ်တဲကွဳပၟတ် လ္ဂုၚ်−မတ်မလီုဂှ် ဒးကဵုရာန်ဒၟံၚ် ပ္ဍဲဗွဝ်ဖျာဒမၠုက် ၚုဟ်ၜါဆပြၚ်ရောၚ် ဂွံတီကေတ် အတိုၚ်ဂလာန်ညးဍုၚ်ကွာန်အာတရဴတံရ။
အပ္ဍဲဂိတုမေ သတ္တာဟဒုတိယ တုဲကၠုၚ်တေံ လ္တူဂၠံၚ်ကွဳစက်လ္ဂုၚ်−မတ်မလီုဂှ် ကြဴနူဒဒန်ကြုၚ်အုက်ကဵု ဒဒန်မသဝ် ဒးဒုၚ်ဖံက်ခတိုဟ်မာၚ်တုဲ ညးဍိုက်ကၠုၚ်ကွဳပၟတ်ဂၠိုၚ်ကၠုၚ်ဂှ် ကေတ်အခေါၚ်ခိုဟ်တုဲ ကၠတ်သွံတြးကၠုၚ် စၟတ်တဲကွဳပၟတ်တံနွံကၠုၚ်ရ။
ပ္ဍဲဗွဝ်ဖျာဒမၠုက်ဂှ် သွက်လၟေၚ်တရဴ လ္ဂုၚ်−မတ်မလီုဂှ် စၟတ်တဲကဆံၚ်လ္တူမွဲတၞး ၂၀၀၀၀ ဒ္ကေဝ်၊ ကဆံၚ်ဓမ္မတာ မွဲတၞး ၇၅၀၀ ဒ္ကေဝ် ဒးကဵုဒၟံၚ်တုဲ ၚုဟ်စၟတ်တဲ သၞေဟ်အကြာတံဂှ်လေဝ် တိုန်ကၠုၚ်ဒၟံၚ် ၜါဆပြၚ်ရောၚ် ညးအာတရဴတံ ဟီုရ။
အတိုၚ်ဂလာန် ညးဍုၚ်ကွာန်အာတရဴတံဂှ်မ္ဂး အခိၚ်အာရာန်စိုပ် စၟတ်တဲကွဳပၟတ်ဂှ် နကဵုဟိုတ် အိုတ်အာဂှ် ညးယိုက်ဝန်ကွဳပၟတ်တံ သွံတြးကဵုဒၟံၚ် နကဵုၚုဟ်ဓလုက်ဏောၚ်ဂှ် ဂွံတီကေတ်ရ။
ၚုဟ်စၟတ်တဲကွဳပၟတ် လ္ဂုၚ်−မတ်မလီု နူကွဳပၟတ်ဍုၚ်ဗၟာ ခုတ်ပ္တုန်လဝ် ဗွဲမလုပ်သၞောဝ်ဂှ် ကဆံၚ်လ္တူမ္ဂ ၇၅၀၀ ဒ္ကေဝ်၊ ကဆံၚ်ဓမ္မတာမ္ဂး ၃၅၀၀ ဒ္ကေဝ်ဓဝ်ဂှ် ဂွံတီကေတ်ရ။
သွက်သ္ဂောံသွံ ၚုဟ်စၟတ်တဲကွဳပၟတ် နကဵုၚုဟ်ဓလုက်ဂှ် ညးယိုက်ဝန်စၟတ်တဲဂမၠိုၚ် ပံၚ်ကဵု ညးဇၞော်လျိုၚ်ကၟဳပၟတ်ဂှ်တုဲ သွံတြးကဵုညးဍုၚ်ကွာန်ဂမၠိုၚ် နကဵုၚုဟ်ဓမ္မတာဂှ် ဟွံမွဲတုဲ လေပ်ပသှ်ေတဴဂှ် ညးအာတရဴဂမၠိုၚ် လဴထ္ၜးရ။
ညးကၠတ်သွံစၟတ်တဲကွဳပၟတ်တံဂှ်ဝွံ ညးယိုက်ဝန်ကွဳပၟတ်တံကဵု သၞာဲဒဴဗၠာဲသၟိၚ် ဒးတာလျိုၚ်သၞေဟ်ကွဳပၟတ်လ္ၚဵုတံ ပါလုပ်တုဲ ဆက်ဆောံကဵုညးဍုၚ်ကွာန်အာတရဴတံလေဝ် ဟွံခိုဟ်ဂှ် သ္ဂးရ။
ကၠတ်သွံတြးဒၟံၚ် စၟတ်တဲကွဳပၟတ် လ္ဂုၚ်−မတ်မလီုတံ နွံကီုလေဝ် လ္ပာ်ကံၚ်ဇြဳပၞာန်ဂှ် ကေတ်အရေဝ်ရေၚ်တၠုၚ် ကုသၞာဲဒဴတံ ဟွံမွဲပုဟ်ဂှ် ဂွံတီကေတ် အတိုၚ်ဂလာန် ညးဍုၚ်ကွာန်အာတရဴတံရ။
ပရိုၚ်−သြၚ်လောန်တိုၚ်(မ်)
ဗီု−CJ