ပ္ဍဲကျာ်ပိ ကောန်ဍုၚ်ကြုက် ကၠောန်ဒၟံၚ်ကလောန်ကျာဖျ ဗွဲမဂၠိုၚ်ဂၠေၚ် စိုပ်ကၠုၚ်ဒၟံၚ်ရောၚ် ညးဒေသတံ ဟီု

ကျာ်ပိ၊ မေ ၂၉

ဍုၚ်ကျာ်ပိ တွဵုရးကရေၚ် ပယျဵုသေံ−ဗၟာဂှ် ကောန်ဍုၚ်ကြုက် ကၠောန်ဒၟံၚ်ကလောန်ကျာဖျ ဗွဲမဂၠိုၚ်ဂၠေၚ် ဆုဲပြံၚ်မံၚ်ကၠုၚ်တုဲဂှ် ကမၠောန်ဝေၚ်ၛၚ်ဟွံလုပ်သၞောဝ်တံ ဂၠိုၚ်ကၠုၚ်ဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။

ဗွဲကြဴဂှ် ကောန်ဍုၚ်ကြုက်ဂမၠိုၚ်ဝွံ သီုကဵုဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA ချဳဒရာၚ်ဖျေံဒၟံၚ်သ္ဇိုၚ်ကျာ်ပိ၊ BGF တံ မပါလုပ် နကဵုအရီုဗၚ် ရဲရပ်လွဟ်တံဂှ် ဆုဲပြံၚ်ကၠုၚ်သိုက်က်ရ။

ကောန်ဍုၚ်ကြုက် ဂၠိုၚ်ကဵုလ္ၚီ ကဵုၚုဟ်ခိုဟ်ဟ်တုဲ လိၚ်မံၚ်ဒၟံၚ် သ္ၚိအပ္ဍဲဍုၚ်ကဵု ဗ္ဒမ်ဇူဒီုတံဂှ်တုဲ ကမၠောန်ဝိုၚ်ဝေၚ်ဟွံလုပ်သၞောဝ် ဝိုၚ်ဝေၚ်ကာဇြဳနဝ်တံ ဒှ်ကၠုၚ်ဗွဲမဂၠိုၚ်ဂၠေၚ်ရ။

ညးဒေသဍုၚ်ကျာ်ပိ ဟွံထ္မံက်ယၟုမွဲတၠဂှ် ကြဴနူကောန်ဍုၚ်ကြုက်တံ စိုပ်ကၠုၚ်တုဲ ဝိုၚ်ဝေၚ်အပ္ဍဲဍုၚ် ဂၠိုၚ်ကၠုၚ်တုဲ သိုၚ်ဒၟံၚ်ရုၚ်ဝိုၚ်ဝေၚ်တၟိတၟိတံ နွံဒၟံၚ်ရောၚ် ဟီုရ။

သ္အာၚ်နူဂှ်ပၠန် ကောန်ဍုၚ်ကြုက်တံဝွံ နကဵုအရီုဗၚ် ဒပ်ပၠန်ဂတးတံဂှ် ကဵုၚုဟ်ခိုဟ်ခိုဟ်တုဲ ရာန်ဒၟံၚ်တိဂအာၚ် ဇိုၚ်ဒဵုဓမ္မဂီရိတံဂှ်တုဲ ပလေဝ်ပလေတ်ဒၟံၚ် သွက်ဂွံသိုၚ်ခၞံ သ္ၚိတာဲကြုက်တၟိ နွံဒၟံၚ်ရောၚ် ညးဆက်ဟီုရ။

ၜိုတ်သၞာံဏံမံက်တေံ လ္ပာ်သ္ကိုပ်ဗိုလ်(အယား) ဂကောံသၟဝ်တဲ ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA ဂှ် သိုၚ်ခၞံဒၟံၚ် သ္ၚိတာဲကြုက်တၟိမွဲရ။

စမြိုၚ်ကြုက် သိုၚ်ခၞံဒၟံၚ်လၟုဟ်ဂှ်ဝွံ သိုၚ်ဒၟံၚ် သွက်ကမၠောန်လီဠာန်သြန်အောန်လာၚ် ကော်ကျာဖျဂှ်ကဵု ဝိုၚ်ဝေၚ်ကာဇြဳနဝ်တံဂှ်ရောၚ် ဂလာန်တံဏံလေဝ် နွံဒၟံၚ်ရ။

စနူကဵုသၞေဟ်ကၚ် (မျိုးချစ်) အရာပ် ၄ ဍုၚ်ကျာ်ပိ စဵုကဵုမွဲဒမြိပ် ဗၟံက်ဘာဒယိုၚ်ကၠံ စၟအ်အ်သ္ၚိ ကၠောန်ဒၟံၚ်ကလောန်ဝိုၚ်ဝေၚ်ကာဇြဳနဝ်တံအိုတ်ဂှ် ဂွံတီကေတ်ရ။

ညးမကၠောန်ၜိုတ်ဒၟံၚ် ကမၠောန်ကာဇြဳနဝ် ဟွံလုပ်သၞောဝ် လ္တူဍုၚ်ကျာ်ပိတံဂှ်ဝွံ ကဵုလဝ်အကံက် လၟေၚ်ဂိတု ကုဂကောံရပ်လွဟ်တံကဵု ဒပ်ပၞာန်ဒတုဲဖဵုဒဳမဝ်ကရေဇြဳကရေၚ် DKBA တံတုဲ လ္ပာ် DKBA လေဝ် ကေတ်လဝ်ကဵုဂီုကၠီု ကမၠောန်ဝိုၚ်ဝေၚ်ဂှ်ရ။

ကောန်ဍုၚ်ကြုက် ဆုဲပြံၚ်ကၠုၚ်လၟုဟ်တံဂှ်ဝွံ ဒှ်ကောန်ဍုၚ်ကြုက် ကၠောန်ဒၟံၚ်ကလောန် ရုၚ်ဝိုၚ်ဝေၚ်ကာဇြဳနဝ် ကဵု ဂိုဏ်လီဠာန်သြန် နူကဵုဇိုၚ်ၜဳ (သောၚ်းရၚ်း) ဍုၚ်ဗြဝတဳတံဂှ် ဂွံတီကေတ် အတိုၚ်ဂလာန် ညးဒေသတံရ။

ကြဴနူပရေၚ်ပၞာန် ၁၀၂၇ စလဝ် ပ္ဍဲသ္ကုတ်သၟဝ်ကျာရးသေံတုဲဂှ် ဂကောံမဟာမိတ်ကောဒေံပိဂကောံ ဗ္တိုက်သရိုဟ်လဝ် ကမၠောန်လီဠာန်သြန်အောန်လာၚ် မကော်ဂး ကျာဖျဂှ်ကီုလေဝ် ပ္ဍဲသ္ကုတ်သၠုၚ်ကျာဍုၚ်ဗၟာ တွဵုရးကရေၚ်ဂှ် ကမၠောန်ကျာဖျကဵု ကမၠောန်ဝိုၚ်ဝေၚ်ကာဇြဳနဝ်တံ ဇၞော်ပၟဝ်ကၠုၚ် သိုက်က်ရ။

ပရိုၚ်−သြၚ်လောန်တိုၚ်(မ်)

ဗီု−TLT