နေဗျဳဒဝ်၊ မေ ၂၉
ပ္ဍဲလက်ထက်အလဵုအသဳဒဳမဝ်ကရေဇြဳကဵု အပ္ဍဲကာလသီအဝဵုဏံ ပ္ဍဲကဏ္ဍပရေၚ်ပိုန်ဒြပ်ဍုၚ်ဗၟာကဵု ကဏ္ဍပရေၚ်ဘဏ္ဍာတံဂှ် ဥူအံၚ်နာၚ်ဥူ ကေုာံ ဥူမာၚ်ၚ်ဝေန် ယိုက်လဝ်တာလျိုၚ် ကဵုစှော်သၞာံတံဂှ် ကဵုဒေါအ်ဇူထောံ နူကဵုတာလျိုၚ်လၟုဟ်ရောၚ် ကံၚ်ဇြဳပၞာန် လလောၚ်ပ္တိတ်လဝ်ပရိုၚ် ပ္ဍဲဂိတုမေ ၂၇ တေံရ။
အတိုၚ်တၚ်လလောၚ်တြးဂှ်မ္ဂး ဥူအံၚ်နာၚ်ဥူ ဝန်ဇၞော်ကၟိန်ဍုၚ် ဌာနဝန်ဇၞော်ရုၚ်ကံၚ်ဇြဳပၞာန် (၃) ကဵု ဥူမာၚ်ၚ်ဝေန် ဒုတိယဝန်ဇၞော် ဌာနဝန်ဇၞော်ပရေၚ်ကိုန်စဳမာန် ကေုာံ ပရေၚ်ဘဏ္ဍာတံဂှ် ကဵုဒေါအ်ဇူထောံတာလျိုၚ် အတိုၚ်သၞောဝ်သ္ဇိုၚ်ဒက်ပ္တန်ရ။
ဆ္ဂး ညးဆက်ကေတ်တာလျိုၚ် ဒၞါဲညးတံ မၞိဟ်ၜါဂှ် လ္ပာ်ကံၚ်ဇြဳပၞာန် ထ္ပက်အဇာခါန်ကၞက်ကၠုၚ်ဂှ် ဟွံဂွံဆဵုကေတ်ဏီရ။
ဥူအံၚ်နာၚ်ဥူဝွံ လက်ထက်အလဵုအသဳဒဳမဝ်ကရေဇြဳၜါအဆက် လက်ထက်ဥူတုၚ်ဇြုၚ်ကဵု လက်ထက်အလဵုအသဳ NLD တံဂှ် ဒှ်ညးကေၚ်ဒှ်လဝ် သ္ကိုပ်စၞောန်ပ္ညုၚ် ဌာနက္ဍိုက်ပ်စၞောန်ပ္ညုၚ်ကမ္ပဏဳ ကေုာံ ပရေၚ်ဓလိုက်တမ်ရိုဟ် DICA ရ။
သၞာံ ၂၀၁၉ ဂှ် ဒးဒုၚ်ကဵုတာလျိုၚ် ပ္ဍဲဌာနဝန်ဇၞော်ပရေၚ်ဓလိုက်တမ်ရိုဟ် ကေုာံ ပရေၚ်ဆက်စၠောံပရေၚ်ပိုန်ဒြပ်ဍုၚ်သ္အာၚ် နဒဒှ်ဝန်အပ္ဍဲလၟိုန်တုဲ ပ္ဍဲကာလပၞာန်သီအဝဵုဂှ် ပအပ်ခါန်ကၞက်ကဵုလဝ် နဒဒှ်တန်ဇၞော်ကၟိန်ဍုၚ် ဌာနဂှ်ရ။
သၞာံ ၂၀၂၂ ဂှ် ကြဴနူကဵုထောံတာလျိုၚ် နဒဒှ်ဝန်ဇၞော်ပရေၚ်ပိုန်ဒြပ် ကေုာံ ဝန်ဇၞော်သွံရာန်ဗၞိက် ကံၚ်ဇြဳပၞာန်တုဲ ကြဴနူဂှ်တုဲ ထပ်ဆုဲပြံၚ်လဝ် ဌာနဝန်ဇၞော်ဂကောံအလဵုအသဳကၟိန်ဍုၚ် (၁) ကဵု ဌာနဝန်ဇၞော် ရုၚ်ဥက္ကဌကံၚ်ဇြဳပၞာန်ရ။
ဥူမာၚ်ၚ်ဝေန် ကေၚ်ဒှ်လဝ်ဒုဝန်ဇၞော် ဌာဝန်ဇၞော်ကိုန်စဳမာန် ကေုာံ ဝန်ဇၞော်ပရေၚ်ဘဏ္ဍာဂှ် ယိုက်လဝ်တာလျိုၚ် သၟဝ်တဲကံၚ်ဇြဳပၞာန် အပ္ဍဲကာလပၞာန်သီအဝဵုပွိုၚ်ပိသၞာံပြၚ်ဏံ နကဵုကဆံၚ် ဒးဒုၚ်ပဒေါအ်ဇူလဝ်လၟုဟ် နူလက်ထက်အလဵုအသဳ NLD တေံရ။
ညးလ္ၚတ်သ္ၚဳဂၠိပ်ပရေၚ်ဍုၚ်ကွာန် ဥူတာန်သဵုနာၚ်ဂှ် မူဝါဒပရေၚ်ဘဏ္ဍာ ညးတံၜါတၠ ချူဓဇက်ကဵုလဝ်ဂှ်ဝွံ နှေန်လှာဲသြန် မက္တဵုဒှ်ဒၟံၚ် နူကဵုသြန်ဗၟာ သြန်ဖောဝ်ဒၟံၚ် ဂွံညိၚ်ဝတ် ကၠောန်ဟွံမာန်တုဲ ပ္တိတ်ထောံလဝ် နူကဆံၚ်ဌာနန္တရညးရောၚ် သ္ၚဳဂၠိပ်လဝ်ရ။
“ ဒှ်ပေါဲပၞာန်သီအဝဵုတုဲလေဝ် ဆက်ပံၚ်တောဲကၠောန်လဝ်ကဵု ကံၚ်ဇြဳပၞာန်ဂှ်ရ ပ္ဍဲကံၚ်ဇြဳပၞာန်ဂှ် စပ်ကဵုပရေၚ်ဘဏ္ဍာတုဲ ညးဟွံဆိုက်ဗ္ဒက်တံ နွံဂှ်ရ စကာလဝ်ညးတံ။ ဆ္ဂး အကာဲအရာပရေၚ်ဘဏ္ဍာ ဍုၚ်ဗၟာလၟုဟ်ဂှ် ဟွံခိုဟ်ပုဟ်။ သ္ပဟိုတ်ကဵု သြန်ဖောဝ်ဍုၚ်ဗၟာတုဲ ကမၠောန်ထိၚ်နှေန်လှုဲ ကမၠောန်ကၠောန်ညံၚ်ဂွံညိၚ်ဝတ်ဟီုဂှ် အံၚ်ဇၞးဟွံမာန်ရပုဟ်ဟီုဂှ် ကံၚ်ဇြဳပၞာန် ကၠိုဟ်အာယျ။ ဟိုတ်ဂှ်ရ ပ္တိတ်ထောံညးတံ နူကဵုဒၞါဲညးတံရောၚ် ချိၚ်ခယျကေတ်ရ” သာ်ဝွံ သ္ဂးရ။
ကြဴနူပၞာန်သီအဝဵုတုဲ ဒၟါနူကံၚ်ဇြဳပၞာန် ကောပ်ကာဲဖန်ဇန်ဗၠေတ်မှာကီု၊ ကၟာတ်လဒဵုလဝ်ကီုတံဂှ်တုဲ ပရေၚ်ဍုၚ်ကွာန်ဟွံညိၚ်ဝတ် မက္တဵုဒှ်ဒၟံၚ် အပ္ဍဲဍုၚ်တံ ပဋိပက္ခတံဂှ်တုဲ ပရေၚ်ပိုန်ဒြပ်ဍုၚ်ဗၟာဝွံ ထ္ၜးကၠုၚ်လက္ချန်နုက်တုဲ သြန်ဖောဝ်တံဂှ်လေဝ် သၠုၚ်တိုန်ဒၟံၚ် သိုက်က်ရ။
မွဲလ္ပာ်ဂှ်ပၠန် ကံၚ်ဇြဳပၞာန်ဝွံ အပ္ဍဲပၞာန်သီအဝဵုဏံ တန်တဴကဵုလ္တူအကာဲအရာ ကောန်ဂကောံကံၚ်ဇြဳတံ၊ သ္ကိုပ်ဗိုလ် ဒပ်ပၞာန်ကဆံၚ်လ္တူတံ၊ သ္ကိုပ်ရး ကေုာံ ဝန်ဇၞော်တံဂှ်တုဲ ကၠာဂွိုအ်ပပဵုပ္တိုန်အာယုက်ကာလကာတၟေၚ်ကဵု ပပဵုပ္တိုန်တုဲဂှ် ကၠောန်သ္ပဒၟံၚ်အပြံၚ်အလှာဲရ။
အတိုၚ်လိက်ဒုၚ်စဳရေၚ် ISP-Myanmar မလလောၚ်ပ္တိတ်လဝ် ပ္ဍဲဂိတုဖေဖဝ်ဝါရဳကြပ်အိုတ်ဂှ်မ်ဂး အပ္ဍဲပၞာန်သီအဝဵုပွိုၚ်ပိသၞာံဏံ ကောန်ကံၚ်ဇြဳ ဂကောံပၞာန်တံကဵု မၞိဟ်ပူဂဵုကဆံၚ်ဇၞော်ဇၞော် ပါလုပ်ဒၟံၚ် ပ္ဍဲယန္တယာ ပရေၚ်အုပ်ဓုပ် ၁၅၂ တၠတံဂှ် ကၠောန်သ္ပလဝ်အပြံၚ်အလှာဲရောၚ် ဂွံတီကေတ်ရ။
ပ္ဍဲယန္တယာပရေၚ်အုပ်ဓုပ်ဏံဂှ် နူကဆံၚ်ဝန်ဇၞော်ကၟိန်ဍုၚ်၊ ဒုဝန်ဇၞော် စဵုကဵုကဆံၚ်သ္ကိုပ်ဝန်ဇၞော်တွဵုရး ကေုာံ တွဵုရးတံ ပါလုပ်တုဲ သ္ပလဝ်အပြံၚ်အလှာဲသာ်ဏံဂှ်ဝွံ ပ္ဍဲဒၞါဲဖျေံဒၞါဲဝါဲတံကဵု ပါ်တာလျိၚ်တံဂှ် အရာဟွံညိၚ်ဝတ်တံ က္တဵုဒှ်ဒၟံၚ်ရောၚ် လိက်ဒုၚ်စဳရေၚ်ဂှ် သ္ၚဳဂၠိပ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−MOI