ၜဳကလေၚ်၊ မေ ၂၉
တွဵုရးဍုၚ်မန် ပ္ဍဲပွိုၚ်ဍုၚ်ၜဳကလေၚ် ကြဴနူဒးဒုၚ်ဖံက်ခတိုဟ်မာၚ်တုဲ ဒဒန်သရိုဟ်စှ်ေလီုအာလဝ်ၜါတၞုၚ် ဒဒန်ကြုၚ်အုက်ကဵု ဒဒန်မသဝ်ဂှ် ဗွဲမတာပ်အခိၚ် ကလေၚ်သိုၚ်ဟွံမာန်မ္ဂး ပရေၚ်ဆက်စၠောံ ပိုတ်အာမာန်ရောၚ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
ဒဒန်ကြုၚ်အုက်ကဵု ဒဒန်မသဝ်ဝွံ နွံဒၟံၚ်လ္တူဂၠံၚ်ဇၞော်ပျဳထံၚ်သု လ္ဂုၚ်−မတ်မလီုတုဲ သွက်ဒေသသ္ကုတ်သၠုၚ်ကျာဍုၚ်ဗၟာ တွဵုရးဍုၚ်မန်၊ တွဵုရးကရေၚ် ကဵု ရးတၞၚ်သဳတံဂှ် ဒှ်ဂၠံၚ်ဗၞိက်ဂေတ်ဂြိပ်ဒၟံၚ် အဓိကမွဲရ။
ဒဒန်ၜါတၞုၚ်ဏံဂှ် သွက်ဂွံတတ်ကၠောံယာယဳမာန် ဗ္ဒါဲဒဒန်ဂှ် ဖံက်လဝ်ဂၠံၚ်တိကီုလေဝ် ဗြဲဂူမ္ဂး လၟက်ကတဵု အာကၠုၚ်ဝါတ်ဂါတ်ကီု၊ ဂၠံၚ်ကလိတ်ကီု ကေုာံ တိဂၠံၚ်လာ်စှ်ေတံ က္တဵုဒှ်ဒၟံၚ်ရောၚ် ဂွံတီကေတ် အတိုၚ်ဂလာန်ညးဒေသတံရ။
ညးဒေသၜဳကလေၚ်မွဲတၠဂှ် ဂၠံၚ်ယာယဳတံဂှ်ဝွံ ဗြဲဂူမ္ဂး တတ်ကၠောံဝါတ်ဂါတ်တုဲ ကြုၚ်တံဏံဂှ်တှ်ေ ဍာ်ဗၠိုက်အရိုဟ်သၞာံတုဲ ဍာ်ဇွောဝ်ထတ်ဂှ်ရ ယဝ်ရဗွဲမဂတာပ်အခိၚ် ဒဒန်ဂှ်ဟွံတုဲမ္ဂး တတ်ကၠောံအာဂွံဟွံသေၚ်ဂှ် ဟီုရ။
“ဗြဲဂူတှ်ေ ဂၠံၚ်ဂှ် ဒးတတ်ကျာတ်။ မုဒှ်ရောဟီုတှ်ေ ဂၠံၚ်ဂှ်ဗဝ်လဝ်တိသၟးရတုဲ ဍိုန်မံၚ်။ ဗြဲဂူတှ်ေ ဂၠံၚ်ဏံ အာကၠုၚ်ဟွံဂွံတုဲ ဒးကၟာတ်ရ။ ဒၞါဲဂှ်ဂှ် ဒှ်ဒၞါဲဍာ်ဗၠိုက်ဒၟံၚ်လၟိုန်။ ဍာ်ဇွောဝ်ဂှ် ထတ်မံၚ်။ ဒၞါဲဂှ်ဂှ် ဒှ်ဒၞါဲဍာ်ဇွောဝ်ထတ် ဒှ်ဒၞါဲဍာ်ဗၠိုက်ရ၊ ဒဒန်ဟွံတုဲမ္ဂး တတ်ကၠောံဟွံဂွံရပုဟ်” သာ်ဝွံ သ္ဂးရ။
အခိၚ်လၟုဟ်ဂှ်လေဝ် သ္ကဲဒဒန် ဂၠံၚ်တိတံဂှ်ဝွံ ဗြဲဂူလဝ်တုဲ လၟေက်က္တဵုတုဲ ကလိတ်ဒၟံၚ်ဂှ်ရ ကွဳစက်ဍောတ်တ်တံဂှ်ဟေၚ် ကဵုလဝ်အခေါၚ်တတ်ကၠောံတုဲ ကွဳစက်ဇၞော်ဇၞော်တံဂှ်တှ်ေ ကၟာတ်လဝ်အခေါၚ်တတ်ကၠောံယာယဳရောၚ် ဂွံတီကေတ်ရ။
ညးဒေသၜဳကလေၚ်မွဲတၠပၠန်ဂှ်လေဝ် သီုဒဒန်ၜါတၞုၚ်ဂှ် ကၠောန်ဒၟံၚ်သွက်ဂွံထ္ပက်ဒဒန်ယာယဳဂှ် ဂွံဆဵုညာတ်ကေတ်တုဲ ကဵုရပ်စပ်ဒၟံၚ် ဂၠံၚ်ကွာန်သပဝ်ဂှ်ရဂၠိုၚ်တုဲ ကွဳစက်ထပ်တုဲ ဂၠံၚ်ကၟာတ်ဆိုအ်ဒၟံၚ်ရောၚ် ဟီုရ။
“မသဝ်ဂှ်တှ်ေ ကလေၚ်ဗဝ်ဒၟံၚ် ဗီုပြၚ်ဒဒန်ကြုၚ်အုက်ဂှ်ရဏောၚ်။ ပြဟ်ဟ်ဏံ ဍေံလေဝ် ကၠောန်ယာယဳ သာ်ဂှ်ကီုရဏောၚ်။ ဒဒန်ၜါတၞုၚ်ဂှ် ဂေတ်ဒၟံၚ်ဏောၚ်။ လ္ပာ်တေံ လ္ပာ်ဏံ ပြဟ်ဟ်ဏံ ဒဒန်ကြုၚ်အုက်ဂှ်တှ်ေ ကၠောန်ဒၟံၚ်ကၠာ ပါ်ကၠောန်ဒၟံၚ် သီုၜါလ္ပာ်၊ ဂၠံၚ်သပဝ်ကွာန်ဂှ်ရ ကဵုသုၚ်စောဲဂၠိုၚ်။ ကွဳစက်ဂမၠိုၚ် ကၟာတ်ဒၟံၚ်ကွေံကွေံလေဝ် ဟွံသေၚ်ပုဟ်။ အခိၚ်ကွဳစက်ကြေပ်တှ်ေ လဆောဝ်လဆောဝ် ကွဳစက်ထပ််တုဲ အခိၚ်လၟုဟ် ကာၜေတ်ဒၟံၚ်ရ” သာ်ဝွံ သ္ဂးရ။
သ္အာၚ်နူဂှ်ပၠန် ဂၠံၚ်ကွာန် ဒးသပဝ်အာ ဒဒန်ၜါတၞုၚ်ဂှ်ဝွံ ဂၠံၚ်ဍန်တုဲ ဗြဲဂူမ္ဂး အာကၠုၚ်ဝါတ်ဂါတ်တုဲ အခိၚ်ကသီု ဒှ်အခက်အခုဲမာန်ရောၚ်ဂှ်လေဝ် ညးဆက်ဟီုရ။
အခိၚ်လၟုဟ် ဂၠံၚ်ကွာန် ဒးသပဝ်အာဂှ်ကဵု ဂၠံၚ်တိ သ္ကဲဒဒန် တတ်ကၠောံ ဒဒန်ကြုၚ်အုက်ကဵု ဒဒန်မသဝ်ဂှ်မ္ဂး အာကၠုၚ်ခက်ခုဲတုဲ အပ္ဍဲဒေသ ကၠေၚ်စက်ပိုတ်အိုတ် ဒးက္တဵုဒှ်ဒၟံၚ်တုဲ စနူကဵုဗၞိက်ဂေတ်ဂြိပ်တံကဵု အာကၠုၚ်အာတရဴတံဂှ် ဒးဒှ်ဒၟံၚ်အခက်အခုဲရ။
ဒဒန်ကြုၚ်အုက် နွံလ္တူဂၠံၚ်ပျဳထံၚ်သု လ္ဂုၚ်−မတ်မလီု ပွိုၚ်ဍုၚ်ၜဳကလေၚ်ဂှ်မ္ဂး တုဲကၠုၚ်ဂိတုမေ ၁၁ တေံ ကြဴနူဒးဒုၚ်ဖံက်ခတိုဟ်မာၚ်တုဲ မ္ၚးနူကဵုဒဒန်ကောန်ကရေတ်ဂှ် သီုကဵုဒဒန်ယာယဳလေဝ် လီုဒၟံၚ်ရ။
သ္အာၚ်နူဂှ်ပၠန် ဒဒန်မသဝ်ဂှ်လေဝ် ဂိတုမေ ၂၃ တုဲကၠုၚ်တေံ ဒးဒုၚ်ဖံက်ခတိုဟ်မာၚ်တုဲ ဒဒန်မၞုံဇမၠိၚ် ၁၀၀ ပေပြၚ်၊ ဗွိုက် ၂၄ ပေ အတိုၚ်မွဲတၞုၚ်ဂှ် သရိုဟ်စှ်ေအာလဝ်တုဲ ညးဍုၚ်ကွာန်အာတရဴ ၁ တၠ ချိုတ်တုဲ ၃ တၠ ကလိဂွံလဝ်ဝပ်သၟးဟွံက သီုကဵုလာၚ်ဖုၚ်ကဵု လာၚ်အေန်တာနိတ်လ္ၚဵုတံလေဝ် ပိုတ်ဒၟံၚ်ယာယဳရ။
ပရိုၚ်−သြၚ်လောန်တိုၚ်(မ်)
ဗီု−Social Media