ဍာ်ဗု၊ မေ ၃၀
အ္စာၝောံဗ္တောန်လိက် CDM ၜါတၠ ဒပ်ကံၚ်ဇြဳပၞာန် ရပ်ဒက်လဝ် နူဒေသ (ကံပေါက်) ပွိုၚ်ဍုၚ်ဍာ်ဗု ရးတၞၚ်သဳဂှ် ဂိတုမေ ၂၈ တေံ ဖျေံစၟတ်ထောံ ညးမွဲ ဒဏ်ထံၚ် ၁၀ သၞာံဂှ် ညးဒေသတံ ဟီုကဵု ဌာန်ပရိုၚ်သြၚ်လောန်တိုၚ်(မ်) ရ။
အ္စာၝောံဗ္တောန်လိက် CDM ဒဝ်သဳတာဥူ ကေုာံ ဒဝ်နဳလာသာန်တံဂှ် နူရုၚ်သၞောဝ်ဓဝ်ထံၚ်ထဝါဲ ဖျေံစၟတ်လဝ် ညးမွဲ ဒဏ်ထံၚ် ၁၀ သၞာံ နကဵုၝောံပိုဒ်ရာဇသာတ်ဇၞော် ၅၀၅ က၊ ၝောံပိုဒ် ၅၀ ည သၞောဝ်ဗ္တိုက်သရိုဟ်ပွပကီုပရာပ်တံဂှ်ရ။
အ္စာၝောံဗ္တောန်လိက် CDM ဏံၜါတၠဂှ် ကံၚ်ဇြဳပၞာန် ရပ်ဒက်လဝ် အပ္ဍဲဂိတုဖေဖဝ်ဝါရဳတုဲကၠုၚ်တေံတုဲ ဂွံပိဂိတုဂှ် ဖျေံစၟတ်လဝ် ဒဏ်ထံၚ်သာ်ဏံရ။
အ္စာၝောံဗ္တောန်လိက် CDM ၜါတၠဝွံ နကဵုတၚ်စောဲစပ် လုပ်ဗ္တောန်လိက် ပ္ဍဲဘာလပှ်ကျာ နူအလဵုအသဳညဳသၟဟ်ဂကူ NUG ပံက်လဝ်ဂှ်ကီု၊ ဇီုကပိုက်ကဵုပရေၚ်လျုၚ်သ္ဍိုက်ကၟိန်ဍုၚ်တုဲ ကံၚ်ဇြဳပၞာန် ဖျေံလဝ်အမိၚ်သာ်ဏံရ။
အ္စာၝောံဗ္တောန်လိက် CDM ၜါတၠ ဒးဒုၚ်ဖျေံစၟတ်လဝ်ဒဏ်ထံၚ် မွဲတၠ ၁၀ သၞာံဂှ် ဆက်စွံလဝ် ပ္ဍဲထံၚ်စာတ်ထဝါဲရဂှ် ဂွံတီကေတ် ဇရေၚ်ညးမစုက်လုက်ကဵု ဂြောဝ်ဂတာညးတံရ။
တုဲကၠုၚ်ဂိတုမေ ၇ တေံဂှ်လေဝ် ဒဝ်တတမဝ်၊ ဒဝ်ယေန်န်အေ မဒှ်အ္စာၝောံဗ္တောန်လိက် CDM ၜါတၠ ဒပ်ကံၚ်ဇြဳပၞာန် ရပ်ဒက်ဏာလဝ် နူဒေသ (ကံပေါက်) ဂှ် ရုၚ်သၞောဝ်ဓဝ်ဍာ်ဗု ဖျေံစၟတ်ထောံလဝ် ဒဏ်ထံၚ် ၄ သၞာံစၟအ်အ်ဂှ် ဂွံတီကေတ်ရ။
အတိုၚ်တၚ်နၚ် ဂကောံမၚ်မွဲရီုဗၚ်ကောန်ထံၚ်ပရေၚ်ဍုၚ်ကွာန် AAPP ဂှ်မ္ဂး အပ္ဍဲကာလသီအဝဵုဏံ မၞိဟ် ၂၆၀၀၀ ပြၚ် ဒးဒုၚ်ရပ်လဝ်တုဲ ပ္ဍဲကဵုဏံ လၟိဟ်မၞိဟ် ၂၀၀၀၀ ပြၚ်ဝွံ ဒးဒုၚ်ဆက်ရပ်ထိၚ်လဝ်ရောၚ် ဂိတုမေ ၂၈ တေံ လလောၚ်ပ္တိတ်လဝ်ရ။
ပရိုၚ်−သြၚ်လောန်တိုၚ်(မ်)
ဗီု−CJ